Read Banggai TEALIAN 8 Bible Online

TEALIAN 8 - Banggai bible

TEALIAN 8

¹Ko Mian Bisa aki natoliminggene Nuh tukon sasaibino koiyayon modaano mopolaing yana doi kapaloo lalomo. Mian Bisa kubaiyo puul kombombuul, tobikon dopaisudoo tambuuno momooti.

²Sasaibino kopaisu matano doi dunia taambikon doi bilit tukon sasaibino kopaisu tataapono doi timbu yana tutupemo. Koudan tade,

³tukon kopaisu polokon mooti. Sala lapa 150 kooloyo kopaisu akinduungo naatean koidan.

⁴Doi tanggal songulo pitu bituwon kopituno, keolo kapaldoo doi meeng kobunggul bunggono doi bunggul-bunggul Ararat.

⁵Paisu banggadudul mooti tukon doi tanggal meeng bituwon kosongulono tambuuno tokita, kobunggul-bunggul bunggulo.

⁶Lapa sangkapolono kooloyo, Nuh bukayo kokapal lolombongo meeng,

⁷tukon sodiiyo komeeng kotomisi gagak. Dotomisidoo akimo naabali doi kapal bai banggadudul benga dombalaa doisumai polong doeabadoo lapamo mooti tuuno.

⁸Lapa doiya, Nuh mosodii meeng kotomisi lapatiing sulano natingoniiyo oilakai dopaisudoo bisa molapamo mooti.

⁹Bai sabab kopaisu daano motutupiyo sasaibino kodunia bunggono, tomisi lapatiingoo aki namoposuunggon tampat sulano nasake. Maka dotomisidoo abali doi kapaloo; Nuh ulule kolimano maka babayo usok.

¹⁰Nuh totiili pitu kooloyo koidan, maka nasodiiyo dotomidoo lapatiing.

¹¹Doi nakinobianan abalimo dotomisidoo doi yana makanggi meeng kozaitun lendeno doi suungo. Dia budodoo Nuh toiyomo baikon dopaisudoo lapamo mooti.

¹²Lapa totiili pitu kooloyo koidan, yana sodiiyo dolapatiingoo koidan; tukon doiya kosinggato dotomisidoo akimo naabali doi yana.

¹³Doi tempo Nuh naumur 601 kotaun, doi tanggal meeng bituwon komeengo, paisu lapamo mooti tuuno. Nuh bukayo kapaldoo atono, tukon kitayo potikunggon. Yana kitayo baikon kobuta bunggono lapamo motuul.

¹⁴Doi tanggal luakolono pitu bituwon koluano, dunia motuulo.

¹⁵Maka ko Mian Bisa bantile doi Nuh,

¹⁶“Tobuato luwedoi kapaloo polaing-laing tukon muboloki, mulabuk-labuk tukon napoo bolo-boloki.

¹⁷Kanggiyomo sasaibino kotomisi tukon iyayon bailon, babasal mau mopoipoisik, sulano napoo tosuungi badaang tukon nasasabul doi posaapon kobuta.”

¹⁸Maka Nuh tobuat doi kapaloo polaing-laing tukon naboloki, nalabuk-labuk tukon napoo bolo-boloki.

¹⁹Sasaibino kotomisi tukon iyayon doi lipu tobuat luwedoi kapaloo, suwe-suwele kokaliangano polaing pototongi.

²⁰Nuh mokubai meeng kobalabaan tuuk TEMENENO. Yana alayo luwe memeeng kotomisi kaliangano tukon iyayon bailon mominoolakon, maka sosubakene buno sosubakon mosinua doi balabaanoo bunggono.

²¹Dososubakonoo boono mobabangi sanaanggene ko TEMENENO noano, tukon yana bantile doi noano lalomo, “Yaku akimo naikon kukutukiyo koidan nadunia nia sabab bangkapi nakokubai; Yaku toiyo baikon salataa napaumalanean kobangkapi napikilanoo lokis. Yaku akimo naikon koidan kusilakayo sasaibino komahluk motubo buno domo sosodoan nia Yaku mokubai.

²²Kalu nadunia nia daanoon, sidutu naikon daano kotempo pidokan tukon tempo abasan, tempo tolopot tukon tempo pital, tempo keas tukon tempo udan, oloyo tukon popook.”