Read Banggai 2 SAMUEL 10 Bible Online

2 SAMUEL 10 - Banggai bible

2 SAMUEL 10

¹Bubula kotempo doibundu Nahas Amon tomundono matemo, tukon namalane Hanun teali tomundo.

²Maka Tomundo Daud bantile, “Nahas daanoon kusobat mosetia. Jadi yaku sio kupoosobat koidan tukon konapau Hanun.” Tobikon doiya Daud bintekene konabito-bito doi tano Amon sulano nasanaanggene Hanun noano sabab kotamano momatemo.

³Salataa yanila polong doi Amon, sasaibino kokatua doi tanodoo bantile doi Tomundo Hanun, “Inaimokai Tuan momopikikon sabab Daud mobitokono bito-bitodoo sabab yana tongo yase moodotiiyo Tuan tamano! Yana sumboliyo domianoo doisumai salaku ondosuuk moondosuuke nakotania sulano namoola lambase.”

⁴Maka Hanun lakeyo sasaibino doi Daud nabito-bitodoo, yana daluwo konapoo simbil sembeleng yana potoliyo konapoo pakean potimbang kopopoolo, tukon sumboliiyo napoo taus.

⁵Bai yanila mammaamo momule doi napoo tano. Salataa dolanggedoo pinopitoikon doi Daud, yana makapatu teteba sulano dobito-bitodoo dungol doi Yerikho konakalumbit polong tubo koidan konapoo simbil.

⁶Doibundu ko Amon miano toiyomo baikon konapoo kokubai mangaanikene Daud musuwo yanila. Tobikon doiya yanila matambo 20.000 komian ko Siria nasuludadu modungol doi Bet-Rehob tukon Zoba, tukon koidan 12.000 komian kosuludadu moluwedoi Tob, tukon tomundo tano Maakha tukon koidan 1.000 komian konasuludadu.

⁷Salataa Daud lengele dolanggedoo, yana sumboliiyo Yoab tukon sasaibino konasuludadu polobosi ambakono molawane komusuh.

⁸Ko Amon miano tobuat tukon atule konapoo barisan doi Raba napoo ibukota tataapono babasal salaano, bai ko Siria miano, Tob miano tukon Maakha yanila atule konapoo barisan doi padang.

⁹Yoab kitayo baikon yana madipoto sabab komusuh napasukan anomo doi salaanoila tukon daanomo doi tonggulungoila. Tobikon doiya yana lilike ko Israel nasuludadu momonondok tukon abese yanila moposasalaan tukon Siria nasuludadu.

¹⁰Tukon kolabino moluwedoi Israel nasuludadu yana salakanggenemo doi utuso piyoto Abisai, moature konapoo barisan moposasalaan tukon ko Amon nasuludadu.

¹¹Yoab bantile doi utuso piyotodoo, “Kalu aki kumoola bataanggon mosasalaane ko Siria nasuludadu, mosobit tomboniiyaku; tukon koidan, kalu ikoo aki mumoola bataanggon mosasalaane ko Amon nasuludadu, yaku naikon lubat motombonii komuyu.

¹²Keenggele konoamu! Mai nda kakaate tukon barani tuuk doi ndabangsa tukon tuuk doi Mian Bisa nakota-kota. Boliisi ko TEMENENO nalakukene oila kona mongiasan.”

¹³Yoab tukon napasukan maju molobosi, tobikon ko Siria nasuludadu bulen.

¹⁴Salataa ko Amon miano kitayo ko Siria nasuludadu mobulenggene kobutongo, yanila koidan bulen luwedoi Abisai tukon bangabalinggon doi kota lalomo. Sambuno lapa lobosiyo ko Amon miano, Yoab mule doi Yerusalem.

¹⁵Ko Siria miano toiyomo baikon ko Israel miano lungguiyomo yanila, tobikon doiya yanila uangemo sasaibino konapoo pasukan sulano napototongi koidan.

¹⁶Maka Tomundo Hadadezer monggiuanggene ko Siria miano modaano tambikon doi tolopot ko Efrat Paisunobatango maka yanila lubato doi Helam Sobakh komo katuaiyo yanila, doiyamo Tomundo Hadadezer moluwe doi Zoba nasuludadu talengano.

¹⁷Salataa lengele dolanggedoo Daud mosobit pototongikene sasaibino konapasukan Israel, salataa lapa doiya maka pintosiiyomo ko Yordan Paisunobatango, doibundu yanila ambakono doi Helam. Idoo ko Siria miano atule konabarisan maka yanila maju lobosiyo Daud napasukan.

¹⁸Bai ko Israel miano lobosiyo tukon ko Siria nasuludadu bulen bangabalinggon. Daud tukon napasukan akateo ko 700 komian mobabayo koloda polobosian, 40.000 komian kosuludadu molakit adalan; sangalaasan doiya Sobakh musuh nasuludadu talengano babasal konapakol tobikon mate doi polobosian lalomo.

¹⁹Salataa Hadadezer natomundo-tomundo kinuasai kitayo baikon ko Israel nasuludadu lungguiyomo yanila, tobikon doiya yanila kabiyo napoo podame tukon taaluk doi Israel miano. Salataa tambuun doiya ko Siria miano akimo nabarani koidan motomboniiyo ko Amon miano.