Read Banggai 2 SAMUEL 11 Bible Online

2 SAMUEL 11 - Banggai bible

2 SAMUEL 11

¹ Kotomundo-tomundo nabiasaan polobosi kalu lapamo kotempo tolopot. Tukon doi nalapaanoo kotempo tolopot doi taunnoo Daud sumboliiyo Yoab momaju molobosi polaing sasaibino konasuludadu kapalano tukon sasaibino ko Israel nasuludadu; maka yanila lungguiyo ko Amon miano tukon lubat lobosiyo kokota Raba. Bai Daud dungol doi Yerusalem.

²Daano komeeng kokinobian, salataa Daud bangun doi namooloan yana amba-ambakono doi kamali atono mopatalo. Luwe idoo yana kitayo komeeng koboine modaanoon momasau, tukon boinedoo tambongan tuuno.

³Maka Daud mosumbolii nasinadai indee boinedoo, tukon pinopitoikono doi yana baikon boinedoo kosambuno Batsyeba; kotamano sambuno Eliam tukon konalakai doiyamo Uria Het miano.

⁴Daud monggindokiikene boinedoo, tukon salataa yana lubat doi kamali, Daud pokoloi tukon yana. (Batsyeba sodokai nalapa lakukene kobakolobokiayan pokoliyous salataa nalapa bolokon.) Maka yana mulemo doi nabonua.

⁵Bubula kotempo doibundu Batsyeba tambuuno motianan, maka yana makapatu bilita doi Daud tentang dolanggedoo.

⁶Daud mosobit pelenggene konaparentah doi Yoab, konabantilano, “Sumboliiyo Uria Het mianodoo nalubat doiyaku.” Maka sumboliiyo Uria napososuung Daud.

⁷Salataa Uria mangadap doi Tomundo Daud, tomundo sadaiyo bulaando kondondoong tukon napasukan Israel, tukon koidan bulaandomo kondondoongo dopolobosianoo.

⁸Doibundu Daud bantile doi Uria, “Mulemo doi mubonua tukon balasanaang naapa.” Sambuno lapa Uria tinggale kokamali, Daud makapatu palaseeng doi Uria nabonua.

⁹Bai Uria aki namule tolongo moolo doi kamali tataapono babasal salaano posinggat sasaibino tomundo napadagai.

¹⁰Doi Daud pinopitoikon dolanggedoo kaliangano. Maka yana masadai doi Uria, “Ikoo sodo abali luwedoi muambakonan moodoon, bulaandokai moaki mumule doi mubonua?”

¹¹Uria timbiliyo, “Ko Israel tukon Yehuda nasuludadu daano mokakaate tuuno sabab ko TEMENENO na Peti Perjanjian daanoon yanila mopolainggene; tukon komai talenga Yoab tukon sasaibino kosuludadu kapalano daanoon mobasandung doi padang. Bulaando mosio kumule doi bonua, tukon kaan monginum tukon pokoloy dakuboloki? Tolongo Tomundo naansaang tukon ata naansaang, ata aki nalakukene naikon doiya!”

¹²Maka Daud bantile, “Banggalo, balasanaango koidan dimbaa oloyo nia tukon namodowa dodowa naikon yaku pataikenemo ikoo motaus.” Jadi Uria dungol doi Yerusalem doi oloyodoo. Doi namodoakonan kooloyo koidan Daud undange mokaan.

¹³Maka yana kaano tukon inumio suka mobadaang tobikon yana malangumo. Bai doi popokoo Uria aki koidan namule doi nabonua, tolongo moolo tukon kubaiyo omboson konatoik doi padagai kamali nakombiang lalomo.

¹⁴Modoakon kooloyono Daud batulis surat, tukon kopotuikene doi Yoab tukon Uria komo kanggiyo.

¹⁵Konatulisano, “Abese Uria doi barisan salaano, doiyaando kopolobosian mohebat tuuno, nalapa doiya maka mubangabalinggon bai sio naaki natoiyo sulano namate.”

¹⁶Salataa Yoab lobosiyo dokotadoo, Uria sinumbolii taus doi tampat Yoab motoiyomo baikon idoomo komusuh nabadagaiyan mobukuan.

¹⁷Salataa komusuh nasuludadu sumbut luwedoi kota tukon lobosiyo Yoab napasukan, bubula komian Daud nasuludadu kapalano inakate tongusokon Uria.

¹⁸Doibundu Yoab makapatu bito-bito doi Daud sulano napopitoikene dopolobosianoo ndondoongo.

¹⁹Yoab naparentah doi nabito-bitodoo, “Salataa Tuan lengele komu lapuran tentang napolobosian nia ndondoongo,

²⁰tantu yana teali nggimal tukon masadai doikoo, ‘Bulaando komuyu moloolaniyo dokotadoo? Baanggokai aki potoiyo baikon komusuh tantu naikon panayo komuyu luwedoi napagar-pagar mobinetoon bunggono?

²¹ Baanggokai komuyu toliminggenemo bulaando Abimelekh doi Gideon napaudoo nainakatean doi Tebes? Bolikonkai konamatean sabab meeng koboine mosakule yana batu gilingan tarigu luwedoi pagar mobinetoon bunggono? Jadi, bulaando komuyu mololaniyo dopagaroo mobinetoon?’ Kalu Tuan masadai buno doiya, bantilemokai doi yana, ‘Uria Tuan nasuludadu kapalano, koidan talalaing mate!’ ”

²²Maka tauso dobito-bitodoo momangadap doi Daud tukon popitoikene oila Yoab napinarentakon doi yana.

²³Dobito-bitodoo bantile, “Komai lawan liisiyo komai bukuanan tukon yanila sumbut luwedoi kota lobosiyo kami doi padang. Bai kami kakaate tuuno modesaake yanila abali polong doi kota tataapono mobabasal.

²⁴Doibundu luwedoi pagar mobinetoon bunggono yanila panayo kami, tukon bubula komian luwedoi Tomundo nasuludadu kapalano tongusokon Uria talalaingo momate.”

²⁵Daud bantile doi moinutusoo, “Keenggele Yoab noano tukon bontiikene doi yana sulano naaki napoipoisik konoano sabab aki namoola tinantukanggon indee naikon komo mate doi polobosian lalomo. Bontiikenekai doi yana sulano nalakukanggene kopolobosian molobian konahebatan koidan motuuk doi kotadoo sulano dokotadoo tumbuno nakalah.”

²⁶Salataa Batsyeba lengele baikon momatemo konalangkai, yana susahmo.

²⁷Doibundu salataa lapa kotempo susaan, Daud mosumbolii nandinokii boinedoo nabinaba doi kamali tukon natealikene naboloki. Bubula kobituwon doibundu yana suungemo komeeng komalane. Bai ko TEMENENO aki nasanaang tukon doi Daudtoo nakokubai.