Read Banggai 2 SAMUEL 12 Bible Online

2 SAMUEL 12 - Banggai bible

2 SAMUEL 12

¹ Sambuno lapa doiya ko TEMENENO utuse nabi Natan napososuung Daud. Natan taus doi yana tukon bantile, “Daano kolua komian modungol doi meeng kokota lalomo, komeeng komian kaasa tukon meeng komian koidan talalais.

²Domo kaasadoo motooli badaang koiyayon piniala tukon domba,

³sedangkan domiannoo motalalais tolongo meeng konadomba pauno, yana mooliyo. Dodombadoo pauno yana pialayo sampe teali babasal doi nabonua lalomo posinggat-singgat tukon napau-pau. Dodombadoo kona kinaan luwedoi mianoo nakinaan, tukon koidan domiannoo beena monginum paisu doi nacangkir, tukon kalu namoola yana abine; jadi yana kubaiyomo buno napau boineno.

⁴Daano kooloyo meeng domo kaasadoo linubotii tamu. Domo kaasadoo aki naiyase momokolot nadomba kai nasaapi susuungo sulano nasaange tuuk doi natamu.”

⁵Salataa Daud lengele doiya yana teali nggimal tuuno sabab domo kaasadoo nakokubai tukon yana bantile, “Kulokis tuuno konakokubai domianoo mokaasa! Luwedoi TEMENENO sambuno motubo, domianoo sio nasoboliyo dodombadoo napau sangkap luunggon paku tukon yana sio nainukum mate!”

⁷Natan bantile doi Daud, “Tuankai domianoo! Tukon naiyamo ko TEMENENO nabinantil, Israel na Mian Bisa, ‘Ikoo lapamo kuoduduke teali tomundo doi Israel tukon yaku salamatene luwedoi Saul.

⁸Saul nabatomundoan tukon nabolo-boloki lapamo kubeekene doi komuyu, tukonkai ikoo kuoduduke teali tomundo doi Israel tukon Yehuda. Kalukai doiya akiyoon nasukup, tantu naikon yaku beekene koidan doi komuyu bunodoiya konakadaang.

⁹Bulaando moaki mupaduliyo Daku parentah-parentah? Bulaando ikoo molakukanggene dokulokisanoo? Ikoo sumboliiyo Uria nainakate doi polobosian lalomo; ikoo batadikene ko Amon miano naakateo yana, tukon ikoo alayo konaboloki!

¹⁰Sabab ikoo aki mutaatio yaku tukon ikoo alayo Uria naboloki, maka sasamba komukaturunan lalomo poisosoboli komu katurunan daano komo mate inakate.

¹¹ Yaku batotopi sulano kutepokiikene kobalaa-balaa motuuk doi komuyu tukon konalubatan luwedoi mukaluargaa susuungo. Yaku naikon alayo komubolo-boloki doi matamu susuungo salaano tukon yaku beekene doi mian bailon naikon momoolo posinggat yanila doi nasuunan kooloyo.

¹²Ikoo lapamo mokubai lalim tukon aki mubiyok-biyok kobalino yaku naikon buktikanggene daku nggimalan tukon doi natala-talaangan doi sasaibino ko Israel salaano.’ ”

¹³Maka Daud bantile doi Natan, “Yaku baladosamo doi TEMENENO.” Natan timbiliyo, “Ko TEMENENO lapamo ompuniyo Tuan; jadi Tuan aki naikon namate.

¹⁴Bai sabab Tuan lapamo totulaiyo ko TEMENENO tukon dokokubaidoo Tuan namalane mosodo sinuung naikon mate.”

¹⁵Sambuno lapa doiya Natan mulemo doi nabonua. Daud namalane Batsyeba Uria baluno komo suunge, kanakon sesel tukon TEMENENO namongiasan.

¹⁶Maka Daud sambeang doi TEMENENO sulano donapaudoo natangalin. Yana bangapatai tukon sasamba kopopook yana ubanggon moolo banggamodoa doi nakombiang soaano.

¹⁷Maka sasaibino kosambu-sambu motatandak doi kamali taus doi yana tukon yanila oluuliyo sulano nabangun, bai yana tolayo tukon aki naiyase kaan posinggat tukon yanila.

¹⁸Meeng kominggu doibundu dopaudoo matemo, tukon Daud naata-ata yanila matakut mopopitoikene doi yana. Konapoo bantilano, “Salataa dopaudoo daano motubo tomundo aki naiyase molongol kalu kita basilingan doi yana. Bainokai diabudodoo konamalane momatemo! Inai-inaikene yana naikon nabatetel moosokitiyo kobutongo!”

¹⁹Salataa Daud kitayo kona ata-atadoo mopoli-polisauk, yana toiyomo baikon donapaudoo matemo. Maka yana sadaiyo doi yanila, “Oilakai dopaudoo matemo?” Yanila timbiliyo, “Matemo, Tuan.”

²⁰Maka Daud bangun tukon kokondong luwedoi sowaan, maka taus mansau tukon siduwo konabuuk, tukon basoboli pakean. Doibundu yana taus kaleda, doi TEMENENO Na Bonua. Sambuno lapa doiya yana abali doi kamali, tukon makabi nasinidokii kinaan tuuk doi yana, sulano nakaane.

²¹Salataa yanila kitayo doiya, sasaibino konaata bantile doi yana, “Aki mai mangalati, Tuan. Salataa dopaudoo daano motubo, Tuan bangapatai tukon kokiiliyo, bai sambuno lapa yana mate, Tomundo bangun kokondong tukon kaano!”

²²Daud timbiliyo, “Oode, takainomo yaku bangapatai tukon kokiil doi tempo dopaudoo daanoon motubo sabab yaku pikikene; inai-inaikene ko TEMENENO nadaanoon moseseangaku tukon daanoon moiyase dopaudoo natubo.

²³Bai diabudodoo, sambuno lapa yana mate, oila kotakoso yaku mobanggadudul bangapatai? Kai moola kuotuboiyo koikoidan? Doi tempo meeng yaku naikon taus koidan doi natampat daanoan, bai diabudodoo yana aki naikon naabali doiyaku.”

²⁴Doibundu Daud sanaanggene konaboloki Batsyeba noano, maka moolo pokoloi. Batsyeba mosuung meeng komalane Daud mosombuikene Salomo. TEMENENO seseange dopaudoo

²⁵tukon sumboliiyo Nabi Natan mosombuikene dopaudoo Yedija, sabab ko TEMENENO seseange yana.

²⁶Daanoon mobuno doiya Yoab daanoon mopolobosi lawane kotano Amon ibukotano, tukon adukono lambase.

²⁷Maka yana sumboliiyo kona bito-bito doi Daud tukon lapurkanggene, “Yaku lapamo lobosiyo ko Raba, tukon lambase konapaisu sinadia.

²⁸Diabudodoo, Tuan yasemo pototongikene konda suludadu labino, maka nakatuaiyo komolobosian tuuk taklukanggene dokotadoo. Tukon bunodoiya maka komian aki nabantile baikon yaku komo lambase dokotadoo.”

²⁹Maka Daud pototongikene sasaibino konasuludadu, tukon lobosiyo ko Raba, yana lobosiyomo tukon lungguiyomo.

³⁰Daud alayo kosonggo batomundoan luwedoi napoo tomundo oluno tukon pakeyomo susuungo doi oluno. Mahkotadoo konakotoong uga-ugaat 35 kokilogram tukon inobosi bubungano monondok. Daud koidan mababa badaang tuuno kolangge molinambas moluwedoi kotadoo.

³¹Sanglaasan doiya kotumbuno siniika, tukon sinumbolii mababa keledai, pacol besi tukon olowang besi tukon doi yaniladoo sinumbolii balimang doi tampat mokubaiyan batu tela. Dolanggedoo linakukanggon koidan tuuk doi kota-kota Amon bailonggon. Sambuno lapa doiya Daud tukon sasaibino kona suludadu abali doi Yerusalem.