Read Banggai 2 SAMUEL 13 Bible Online

2 SAMUEL 13 - Banggai bible

2 SAMUEL 13

¹Absalom Daud namalane daano koutuso moluko meeng motambongan, kosambuno Tamar. Amnon Daud namalane luwedoi naboloki bailon, yana yase mokilayo, tukon yase moolo pokoloi yana.

²Bai doiya aki nateali doi yana sabab Tamar akiyoon naosowaan tukon aki naiyase pokoloi komala-malane. Amnon banggadudul momeenggon mopikikene dolanggedoo tukon doibundu yana teali masakit.

³Amnon daano komeeng konasobat mopandoi tuuno, kosambuno Yonadap Simea napau Daud utuso langgongo.

⁴Yonadap bantile doi Amnon, “Tuan, bulaando mosasamba kooloyo ikoo komutokitaan poloon tuuno? Daano kooila?” Amnon timbiliyo, “Yaku yase mokilayo Tamar, doutusonggudoo Absalom utuso pioto.”

⁵Maka Yonadap bantile doi yana, “Doiya gampang tuuno! Moolomokai doi mumooloan, tukon kakaadukon masakit. Kalu kotamamu lubat mokitakon, bantilekai doi yana, ‘Tama, pataikene Tamar nalubat sulano nabeenggu kaan. Kalu yaku kitayo yana momansaang dokinaanoo dimbaa, yaku moola kaan.’ ”

⁶Doibundu Amnon moolo doi namooloan, kakaadukono momasakit. Salataa Tomundo Daud lubat kitayo yana, Amnon bantile doi yana, “Tama pataikenemo Tamar nalubat sulano namasaang kukis dimbaa salaanggu; maka nasodo kuiyase kaan.”

⁷Doibundu Daud makapatu teteba doi Tamar doi kamali, konabantilano, “Tausokai Amnon doi utusomu langgongo nabonua tukon mokubaikene kinaan tuuk yana.”

⁸Maka Tamar taus imbali tukon laate Amnon daano momoolo doi namooloan. Tamar mangala soisik koadonan, maka doi Amnon salaano yana sadiayo kokukis tuuk molinalas.

⁹Sambuno lapa doiya dokukisoo kinalualo luwedoi paang tukon sidokiikenemo. Bai Amnon aki naiyase kaan. Yana bantile, “Sumboliiyo sasaibino komian nasaakon luwe dimbaa!”

¹⁰Sambuno lapa sasaibino domianoo kaluar luwedoi kombiangoo, Amnon bantile doi Tamar, “Babayomo dokukis-kukisoo doisumai, doi mooloan, tukon ikoo komo dodoikanaku!” Tamar loingikene konabantilan.

¹¹Bai salataa Tamar dodoikene dokukisoo doi yana, Amnon taaniyo boinedoo tukon bantile, “Utus pioto, mai nda pokoloi!”

¹²Boinedoo timbiliyo, “Ah, inai, ikoo koutusonggu langgongo! Inaikai mopakisaayo yaku mokubaiyo kolangge molokisoo! Langge mobuno doiya aki nabiasa kinubai doi Israel.

¹³Kalu tealimo bunodoiya, naando daku sookanano kodudusonggu? Tukon koidan ko Israel miano totulaikon. Konamonondokan sio mubisalakene tukon tomundo, tantu tomundo naikon satujuiyo kuteali muboloki.”

¹⁴Bai Amnon aki naiyase motulutiyo doi Tamar nabantilanodoo, tukon sabab yana liisiyo kona bukuanan, maka sabole-bole yana pakisaayo doutusodoo pioto tukon yana pakisaayomo mopobabakene.

¹⁵Bai sambuno lapa doiya Amnon mosikitenemo tuuno doi Tamar tukon donamosikitananodoo liisiyo doi naiyasano tumbe. Salataa lapa doiya maka yana bantile doi utuso piotodoo, “Tobuat!”

¹⁶Tamar timbiliyo, “Ah, bulaando mobuno doiya ikoo koutusonggu langgongo? Kalu ikoo siikaaku, dokulokisanoo lobian konababasalan doi langge molapamo ikoo kubaiyo domo budodoiyadoo!” Bai Amnon aki naiyase ndongoliiyo.

¹⁷Yana uange kona peleleani maka bantile, “Babayomokai naboine nia doi tonggulung, tukon supatekai kotataapon!”

¹⁸Peleleanidoo lakukene dona parentahdoo. Tamar napakean doiyamo jubah mobulusan modaano kobotokono mobulusan. Doi lolukoo koboiboine moakiyoon naosowaan biasa pakeyo kopakean mobuno doiya.

¹⁹Maka Tamar obosiyo abu doi oluno, siake konajubah, tukon taus maka tutupe koduduso tukon looluakon kolimano tukon kokiil odi-odi.

²⁰Salataa Absalom kitayo, yana sadaiyo, “Oilakai Amnon budoo pobabakenemo ikoo? Banggalokai utusonggu pioto, inaimo momopikikon koidan. Sabab yana utusomu langgongo, jadi inaikai mopopitoikene dolanggedoo doi inde-indee komiano.” Maka Tamar taus dungol doi Absalom nabonua, tukon yana susah tuuno tukon lasayo kiis kolipu.

²¹Tomundo Daud lengele dokadadianoo kaliangano, tukon yana nggimalo tuuno.

²²Absalom abos noa tuuno doi Amnon tukon akimo koidan naiyase mopobasalitai tukon yana sabab yana lapamo pobabakene koutuso Tamar.

²³Salataa lua kotaun doibundu Absalom mokubai lamean baguntingan domba buluno doi Baal-Hazor, lolani kokota Efraim, tukon yana koloyo sasaibino kotomundo namalane.

²⁴Yana mangadap doi Tomundo Daud tukon bantile, “Tama, yaku mokubai lamean baguntingan domba buluno. Boliisi Tama nasanaang tukon koidan nalubat doi lameanoo polaing-laing sasaibino kosambu-sambu motatandak doi kamali.”

²⁵Bai tomundo timbiliyo, “Inai, ikoo dakupau, sabab kalu ikami sasaibino lubat kami naikon kubaiyo susah komuyu.” Absalom banggadudul momeenggon modesaake, bai kotamano tataap aki naiyase lubat. Yana tolongo satujuiyo konalamean.

²⁶Maka Absalom bantile, “Kalu buno doiya, pataikenemo koutusonggu Amnon nalainggami.” Tomundo bantile, “Maunaaki namalaing.”

²⁷Bai sabab Absalom desaake, doibundu Daud pataikenemo Amnon tukon sasaibino konamalane bailonggon molainge Absalom. [Maka Absalom mosidokiikene kokinaan momonondok tuuno.]

²⁸Yana popitoikene doi naata-ata, “Popalatikanggene namono-monondok, kalu Amnon malangumo sabab monginum anggur, yaku naikon beenggomuyu tanda-tanda, poakateyomo yana. Inai matakut. Yaku komo tanggung jawape dolanggedoo. Polakukenemokai tukon pokakabarani tukon koi-koidan inai pomata-matakut!”

²⁹Doata-atadoo laksanakanggene doi Absalom naparentah, maka napoo akateyo Amnon. Daud namala-malane bailon salataa kitayo doiya suwe-suwele lokitiyo konakeledai, tukon dampasene kobutongo.

³⁰Salataa yanila daanoon doi napoo ampakonan lalomo momule, komian bontiikene doi Daud, “Absalom akateyomo sasaibino Tomundo namalane — akiyonokai komeeng komo tubo!”

³¹Tomundo kokondong, maka bendinge konapakean sabab poloon, tukon lubanggene kobutongo doi soaan. Sasaibino konapagawe mau doi yaniladoo bai bendingiyo konapoo pakean.

³²Bai Yonadap Simea napau Daud utuso langgongo bantile, “Tuan inai mosusah tukon inai mopikikene baikon sasaibino doi tomundo namalanedoo matemo. Tolongokai Amnon komo mate sabab doiyamo Absalom napinalaluu salataa doutusodoo pioto Tamar Amnon napobabakanano.

³³Jadi inaikai moanggayo baikon Tuan namalane matemo sasaibino, sabab komo mate tolongokai Amnon tolong.”

³⁴Daanoon mobuno doiya Absalom dampasenemo kobutongo. Komo dagaiyo Daud nakamali kitayo baikon badaang komian molubat tokoluiyo kobunggul moluwedoi Horonaim loloono. Maka yana tauso doi tomundo mopelenggene dolanggedoo.

³⁵Maka Yonadap bantile doi Daud, “Doiyamo Tuan namala-malane! Tutuu bisa doi atadoo nabinantil budodoiya.”

³⁶Sodonalapa mobasilingan, usoko Daud namala-malane doi ruanganoo lalomo. Doi yaniladoo tambuuno mokokiil, tukon Daud maka naata-ata koidan kokiil tukon poloon.

³⁷ Absalom taus tukon dungol doi tomundo tano Gesur nakamali, doiyamo Talmai Amihur napau. Yana dungol idoo tolu kotaun konakalumbit. Daud malumbit tuuno kona poloongganano Amnon,

³⁹bai salataa Daud akimo napoloon konoano koidan, yana neneekemo tuuno koidan doi Absalom.