Read Banggai 2 SAMUEL 14 Bible Online

2 SAMUEL 14 - Banggai bible

2 SAMUEL 14

¹Yoab toiyo baikon Tomundo Daud peleenggene tuuno Absalom,

²tobikon doiya yana monggindokiikene komeeng koboine mopandoi modungol doi Tekoa. Salataa polong doi boinedoo, Yoab bantile doi yana, “Tina sio mukakaadukon susah, tukon inai momapake minyak mobabangi. Kakaadukon babunokon boine momalumbito kona kokiiliyano komumian sineang namatean.

³Kalu bunomo doiya tauso doi tomundo tukon bantilemo doi yana bunonaiya.” Maka Yonadab popitoikene oila komo sio nabantile.

⁴Maka boinedoo taus mangadap doi tomundo, tukon somba sosubaiyo tukon bantile, “Ikoo Dakutuan Mo Taangga, tulungiyo namu ata!”

⁵Tomundo sadaiyo doi yana, “Daano kooila?” Boinedoo timbiliyo, “Ata nia meeng kobalu motalalais. Ata nalakai matemo.

⁶Daano kolua ata napau mala-malaneno, tukon daano kooloyo meeng yanila podangaani doi padang. Sabab akiyo komian moatasiyo, maka meeng komian doi yaniladoo mate inakate.

⁷Diabudodoo, sasaibino ata nakaluargaa bamusukenemo ata tukon tuntute sulano ata nasalakanggene ata napau momatedoo doi yanila, sulano yanila naukume tukon ukuman mate, sabab yana lapamo akateyo kuutuso. Kalu ata salakanggene dopaudoo baimokai ata susuungo komo dungol. Yanila naikon akateyomo ata namoinian mobaino meeng tukon akiyono dakupau malaneno mobaino meeng, naikon mobanggadudukene dakulanggai nakaturunan.”

⁸Dotomundodoo timbiliyo, “Mulemo, yaku naikon ulusiyo komu palakala.”

⁹Boinedoo bantile, “Ikoo Dakutuan Mo Taangga, oilano naikon dakutuan nakinubai, ata tukon ata nakaluargaa naikon komo tanggunge koakibato; Dakutuan tukon Kutuan nakaluargaa akiyo konasalah.”

¹⁰Tomundo timbiliyo, “Kalu daano komian moiyase osusayo ikoo, babayo yana doiyaku, sulano naaki nabarani ganggukon koidan.”

¹¹Dobinedoo bantile, “Kalu bunodoiya ikoo Dakutuan sambeango doi TEMENENO ku Tuan na Mian Bisa, sulano komian moiyase balese doi ata napaudoo namatean sulano naaki napoomoola lakukene kokulokisan molobian konababasalan koidan tukon doi naakateanodoo ata napau domo meengoo komian koidan.” Daud timbiliyo, “Luwe TEMENENO sambuno motubo, domupaudoo aki naikon nabinulaandokon oioila.”

¹²Maka boinedoo bantile, “Ikoo Dakutuan Mo Taangga, pataikenemokai sulano ata nabasilingan soisik koidan.” Tomundo napotimbili, “Monondoko.”

¹³Boinedoo bantile, “Tukon Dakutuanoo nabantilan, Dakutuan lapamo mangaku baikon Dakutuan susuungo salamo sabab aki napataikene Dakutuan namalane mula luwedoi nabaseleonan. Bulaando Dakutuan molakukene kokasalahan mopokakana doiya motuuk doi Mian Bisa namian?

¹⁴Kita nia sasaibino mate; kita nia inandekon buno paisu motokundang doi buta tukon akimo namoola pinototongikon koidan. Maukai Mian Bisa aki naikon naotuboiyo koidan komian molapamo mate; tobikonkai doiya siokai Dakutuan nakakaate sulano komian mosinakukon moola mule koidan.

¹⁵Ata mangadap doi Kutuan sabab ata nia komian kubaiyo susah. Maka ata pikikene konamonondokan ata sio naposilingonii tukon Dakutuan tukon doi ata namoinian tukon naata nia nakakabi naikon Dakutuan daanokene.

¹⁶Ata pikikene Dakutuan naikon ndongoliiyo tukon salamatene ata luwedoi mian mokakaate sulano naakateyo ata tukon ata napau. Konapoo napinalaluu siikayo kami luwedoi Mian Bisa nabuta bineekon doi namian.

¹⁷Ata anggayo baikon Dakutuan naperjanjianoo naikon moola dagaiyo daku kasalamatan sabab ikoo Dakutuan daanoon buno Mian Bisa namalaekat, momoola posasalakene oila komo monondok tukon oila komo lokis. Boliisi ko TEMENENO Dakutuan na Mian Bisa naloolainge Dakutuan!”

¹⁸Tomundo timbiliyo, “Yaku daano dakulangge minasadaikon doikoo, timbiliyomo tukon monondok.” Boinedoo timbiliyo, “Basilingano, ikoo Dakutuan.”

¹⁹Dotomundoo bantile, “Kai Yoab komo sumboliikon?” Boinedoo timbiliyo, “Luwedoi Kutuan naansaang, ata aki namoolakene tolayo kobutongo luwedoi Kutuan napasadai. Takainomo tutuu ikoo Dakutuan, Yoab lapamo popitoikene doi ata oila komo sio ata nalakukene tukon ata nabantile.

²⁰Bai yana kubaiyo buno doiya sulano naalapayo dopalakaladoo tukon monondok. Daku Tuan daanokai komeeng komian mopandoi pokakana ko Mian Bisa namalaekat sampe toiyo sasaibino kolangge moteali.”

²¹Sambuno lapa doiya tomundo uange Yoab tukon bantile doi yana, “Komupinalaluudoo yaku naikon daanokene. Tausokai mundokiiyo Absalom tukon babayo yana doisumai.”

²²Yoab somba doi Daud salaano, maka bantile, “Boliisi ko Mian Bisa nabalakaatiyo Tuan! Budodoiya ata toiyo baikon Tuan kilakene ata sabab Tuan lapamo daanokene ata nakakabi.”

²³Maka Yoab lenggeto motaus doi Gesur sulano nandokiiyo Absalom abali doi Yerusalem.

²⁴Bai tomundo aki napataikene Absalom modungol doi kamali. “Yaku aki kuyase mokitayo yana,” tomundo nabantilano. Jadi Absalom banggadudul mule doi nabonua susuungo, tukon akimo namangadap doi tomundo.

²⁵Absalom ngginaal salaku mian motambongan tuuno doi posaapon ko Israel. Akiyono komian moliisiyo konatambonganan. Luwedoi aino salaano polong nabuuk bunduno akiyo komabantilano.

²⁶Konabuuk mandamba tuuno, tukon sio nasataun maka napatele idan sabab narasayo todudulo motoong. Donabuuko mopinatol konakabalat lobian lua kokilogram pokokonoi tukon tomundo natimbangan.

²⁷Absalom daano tolu konamalane tukon meeng koboine motambongan tuuno, kosambuno Tamar.

²⁸Luamo kotaun Absalom nadungolan doi Yerusalem, bai akiyoon koidan napososuung tukon tomundo.

²⁹Maka daano kooloyo meeng yana uange Yoab, sulano nasumboliiyo mangadap doi tomundo, bai Yoab aki naiyase lubat, Absalom uange koikoidan, bai Absalom koidan aki naiyase lubat.

³⁰Doibundu Absalom bantile doi nalabuk-labuk, “Komuyu Yoab naasi doi kuasi sembeleng mosinakai jelai? Suayomo doasidoo.” Salataa lapa doiya yanila tauso mosuayo.

³¹Maka Yoab lubat doi Absalom nabonua tukon masadai, “Bulaando komu labuk-labuk mosuayo dakuasi?”

³²Absalom timbiliyo, “Sabab ikoo aki muiyase lubat salataa kuuangano ikoo. Yaku yase mobintokonggon mangadap doi tomundo tukon pelenggene daku minasadaikon nia, ‘Oila konatotuuk yaku motinggale ko Gesur tukon abali doisumai? Tadukai kudungol indaa tolong.’ ” Tukon Absalom bantile koidan, “Kakaatenggenemokai sulano kumoola mangadap doi tomundo tukon kalu yaku daano moinaanggon salah, yaku basadia sulano kuinukum mate.”

³³Doibundu yoab tausokai momangadap doi Tomundo Daud tukon pelenggene Absalom nakakabi. Maka dotomundodoo uange Absalom, tukon Absalom lubat mosomba doi tomundo salaano. Tukon dotomundodoo ndobotiyo tukon duduso momonondok.