Read Banggai 2 SAMUEL 15 Bible Online

2 SAMUEL 15 - Banggai bible

2 SAMUEL 15

¹Sambuno lapa doiya Absalom sadiayo komeeng kokereta polobosian tuuk yana tukon adalan tukon lima kolono komian komo lolainge.

²Sasamba kooloyo Absalom bangun dodowa maka kokondong doi loloon bibilo loolani kokamali tataapono mobabasal. Sasamba komian momangadukene konapalakala doi tomundo, Absalom uange tukon sadaiyo konabantilano, “Luwedoi indee kobenseno komuluwean?” Kalu domianoo timbiliyo, “Doi benseno nia kai doiya,”

³maka Absalom bantile, “Kalu menurut hukum, ikoo tutuu bisa, bai soyang moakiyo kotomundo nawakil moiyase ndongoliiyo komupangaduan.”

⁴Maka yana bantile koidan, “Soba, andeno yaku komo teali hakim, maka sasamba komian modaano kona ponggimakonan kai natinuntut moola nalubat doiyaku tukon yaku atasiyo doi naadilan.”

⁵Kalu daano komian mokolaniyo Absalom sulano nasomba sosuba doi yana, Absalom ulule kolimano, tukon domianoo yana lebeke tukon naumayo.

⁶Bunomo doiya Absalom nandondoong motuuk doi sasamba ko Israel miano moiyase mangadukene konapalakala doi tomundo, tukon donakokubai Absalom mangala noa doi Israel miano.

⁷Sambuno lapa toliis sanggap kotaun, Absalom bantile doi Tomundo Daud, “Tama, pataikanakukai kutaus doi Hebron sulano nadaanokene dakuperjanjian doi TEMENENO.

⁸Sabab doi tempodoo yaku daano modungol doi Gesur doi tano Siria, yaku paladandi motaus bakaleda doi TEMENENO doi Hebron kalu pataikene kumule doi Yerusalem.”

⁹Tomundo timbiliyo, “Tausokai tukon salamat.” Sambuno buno doiya maka Absalom lenggeto motaus doi Hebron.

¹⁰Bai akiyoon nalengget yana makapatumo doi sasaibino ko Israel benseno tukon mababa teteba, “Kalu komuyu lengele kopopuukon alalo, wookonggene, ‘Absalom tealimo tomundo doi Hebron!’ ”

¹¹Luwedoi Yerusalem daano kolua kosakato komian moloolainge Absalom motaus doi Hebron. Yanila aki napoomongotoi oi-oila dopomeenggonanoo kaliangano molokis maka yanila sasaibino tauso tukon aki nabalasaak.

¹²Doi nadaanoan Absalom mososubakene konasosubakon, yana koidan makapatu bito-bito doi kota Gilo sulano nauange Ahitopel, doiyamo komeeng komian napongotinau Tomundo Daud. Bunomokai doiya dopomeenggonanoo molokis pololokon bukuan molawane dotomundodoo tukon polokon badaang komo lolainge-lolainge Absalom.

¹³Doibundu daano komeeng komian mobaba bilita tukon pelenggene doi Daud, “Ko Israel miano alamo doi Absalom.”

¹⁴Maka Daud bantile doi sasaibino konapagawe modaano doi Yerusalem, “Maimo nda babiyol. Tongo naiyamo kololoono momoola ndaluput luwedoi Absalom. Akimo namalumbit koidan yana naikon lubato. Mosobitkai sulano naaki ndamoola linolonggon tukon napoo moola lungguiyo kita, maka napoo akateyo sasaibino kokota tumbuno!”

¹⁵Konapoo potimbili doi tomundodoo, “Monondoko.” “Ikami yase molakukene oilamo Tomundo namongiasan.”

¹⁶Maka lenggeto dotomundodoo tukon sasaibino konakaluargaa tukon napagawe loolaingemo yana, tukon komo tininggal baino naboloki piala moteali padagai kamali.

¹⁷Doi tempo tomundo tukon sasaibino konapololaing ampakon tinggale kokota, yanila tade lolani kobonua doi bunduno.

¹⁸Sasaibino tomundo napagawe kokondong doi tomundo lisuko salataa kopasukan padagai tomundo baris liisiyo. Tukon koidan konoom kosakato kosuludadu molapamo lainge yana luwedoi Gat, yanila baris doi salaano.

¹⁹Salataa dotomundodoo kitayo doiya yanila bantile doi Itai domo katuaiyodoo dosuludadudoo monoom kosakato, “Bulaando ikoo momalaing koidan tukon kami? Konamonondokan tadukai muabali tukon mupodungoli kotomundo moboolu. Bolikonkai ikoo mian molulubaton, motaus biyol odoon luwedoi mutano susuumu?

²⁰Akiyoon namalumbit komudungolan dimbaa, bulaando kona tealian yaku mosumboliikon malaing molausala tukon yaku? Yaku susuunggu aki kutoiyo yaando naikon daku tausan. Abalimo tukon babayomo koidan kotula-tulamu solipuan, boliisi ko TEMENENO naseseange ikoo tukon satia doikoo.”

²¹Bai Itai timbiliyo, “Komo Taangga, tongo TEMENENO sambuno motubo tukon doi kutuan naansaang, inaandomo daku Tuan natausan, ata naikon malaing koidan, maukai doi sasalaanano komatean.”

²²Daud timbiliyo, “Monondokokai! Majumokai banggadudul!” Maka ampakonokai Itai polaing-laing tukon sasaibino konapasukan tukon konapoo kaluargaa.

²³Sasaibino korayat kokiil tukon babasal koalaloila salataa Daud napasukan-pasukan otinggale kokota. Doibundu tomundo pintosiiyo ko Kidron Paisunobatango pauno tukon sasaibino konapasukan loolainge yana, maka yanila ampakono pakituuwo kopadang lalomo.

²⁴Imam Zadok tukon Imam Abyatar daano idoo polaing-laing sasaibino ko Lewi miano mobabayo ko TEMENENO na Peti Perjanjian. Do Petidoo Perjanjian inabos tukon aki namoola biningkat kalu sasaibino korayat akiyoon naotinggale dokotadoo.

²⁵Maka tomundo bantile doi Zadok, “Abalinggenekai do Patidoo Perjanjian doi kota. Kalu TEMENENO yase yaku, tantukai yaku pinataikono moabali tukon kitayo do Petidoo Perjanjian koidan tukon kona tangabosan.

²⁶Bai kalu ko TEMENENO aki naiyase, batadikenemokai tolong konamongiasan doi butonggu.”

²⁷Salataa lapa doiya tomundo bantile koidan doi Zadok, “Tobiyo komupau Ahimas tukon Yonatan Abyatar napau; poabalimo doi kota tukon tanaang.

²⁸Yaku naikon totiiliyo yanila doi naloolanian kopintosiiyano kopaisu batango doi padang lalomo mokindolon sampe yaku malaat bilita doi komuyu.”

²⁹Maka Zadok tukon Abyatar babayo do Peti Perjanjianoo abalinggene doi Yerusalem tukon yanila dungolo idoo.

³⁰Sambuno lapa doiya Daud bukayo konasapatu. Yana polaing sasaibino konapololaing loolaniyo ko Zaitun Bunggulo maka kokiil tukon tombukiyo kooluno salaku paloosan susaan matean.

³¹Salataa pinopitoikon doi Daud baikon Ahitopel momalaing polaing Absalom napomeenggonan molokis maka Daud sambeang bunonaiya, “Oh, TEMENENO, boliisi muakiyenggene Ahitopel naotunggul!”

³²Doi tempo Daud napolongan doi bunggul bunggono doi mian nabiasaan bakaleda doi TEMENENO, kotulano mosetia ndobotiyo doi yana, doiyamo Husai Arki miano. Husai napakean tebending tukon tiniposii abu kooluno.

³³Daud bantile doi yana, “Kalu ikoo malaing polaing yaku, ikoo tealikene susah yaku.

³⁴Bai ikoo moola mutulungaku, kalu ikoo abali doi kota tukon bantile doi Absalom, baikon diabudodoo ikoo sio muleleaniyo yana tukon setia, pokakana komu leleaniyano kotamano looluk. Tukon dokokubaidoo mobunodoiya ikoo moola muakiyenggene sasaibino Ahitopel naotunggul.

³⁵Imam Zadok tukon Abyatar daano koidan indaa. Popitoikenemokai doiyanila sasaibino kolobo ikoo molengele doi kamali.

³⁶Ahimas Zadok napau tukon Yonatan Abyatar napau koidan lolainge kotamanoila, jadi yanila daano idoo koidan. Dopau-paudoo doiyamokai komu sinumbolii nalubat doiyaku sulano napelenggene sasaibino kobilita muilongol.”

³⁷Maka Husai doi Daudtoo tulano abalimo doi Yerusalem, popaason ko tempono Absalom nalubatan idoo.