Read Banggai 2 SAMUEL 16 Bible Online

2 SAMUEL 16 - Banggai bible

2 SAMUEL 16

¹ Salataa Daud sodo naliisiyo kobunggul bunggono, sosinggot lubato Ziba, Mefiboset naata, molaate yana tukon mababa meeng kopaar kokeledai momuate lua kosakato koroti, sakat kopuuto koanggur momotuul, sakat kopagoto kolobo saono momonondok kinaan tukon meeng kotaku koanggur paisuno.

²Tomundo Daud sadaiyo doi yana, “Tuuk oila sasaibino nia?” Ziba timbiliyo, “Nakeledai-keledai nia teali iyayon lakitan motuuk doi Tomundo nakaluargaa, roti tukon nalangge-langge nia saono tuuk Tomundo napeleleani-peleleani, tukon naangguria paisuno tuuk yanila mopakadak doi padang lalomo mokindolon.”

³Maka dotomundodoo sadaiyo doi yana, “Inaando Mefiboset mutuan Saul natumbu?” Ziba timbiliyo, “Yana daano motataap doi Yerusalem, sabab yana anggayo baikon diabudodoo ko Israel miano naikon abalinggene konatauwa Saul nabatomundoan doi yana.”

⁴Maka Tomundo bantile doi Ziba, “Tambuun diabudodoo sasaibino Mefiboset namalane tealimo ikoo kotumbuno.” Ziba timbiliyo, “Talima kase Tomundo, boliisi Tuan nasidutu sanaanggene ata!”

⁵Salataa Daud polong doi Bahurim, lubato kai komeeng komian moluwedoi tampatoo, tukon koolaniyo tomundo narombongan, maka nakutuke Daud. Domianoo kosambuno Simei Gera napau, luwedoi Saul namondopulian.

⁶Simei sokuliyo batu Daud tukon napagawe-pagawe, maukai konasuludadu tukon nasuludadu kapalano natikume Daud.

⁷Simei kutukiyo yana tukon bantilan-bantilan, “Tauso! Tauso! Pangakate! Poloi-lokis!

⁸Ikoo lambasemo Saul nabatomundoan! Diabudodoo TEMENENO ukume ikoo sabab badaango tuuno Saul namotolutusan komu inakate. Ko TEMENENO beekenemo komubatomundoan doi mupau Absalom. Diabudodoo ikoo matemo, he pangakate!”

⁹Abisai Yoab utuso pioto Seruya napau, bantil doi tomundo, “Bulaando Tuan mopataikene dopanggabutoo nakutukiyo Tuan? Pataikenemokai ata natembele kobulungo!”

¹⁰Bai tomundo bantile doi Abisai tukon Yoab utuso langgongo, “Inai moanggayo, batadikenemokai nakutukaku. Sabab TEMENENO komo sumboliiyo yana, indeekai komo moola masadaikene bulaando yana mobunodoiya kona kokubai?”

¹¹Maka Daud bantile koidan doi Abisai tukon doi sasaibino konaata, “Dakupau sinuung susuunggu kakaate sulano naakateaku; bulaando komuyu momasainding mokitayo naiya Benyamin nia miano nakalakuan? TEMENENO mokomo sumboliiyo yana mokutukaku; tobikon doiya inai pobula-bulaandeo yana tukon pobatadikenemo nakutukaku.

¹²Uga-ugaate ko TEMENENO naikon palaatikanggene nasakisaawan nia tukon balakaatiyo yaku salaku posoboli dokutukoo.”

¹³Maka Daud tukon sasaibino konapololaing banggadudukene konapoo ampakonan, bai Simei ambakon mosobit motuunduwo yanila doi bunggul motombing maka kutukiyo tukon nasakule batu tukon buta.

¹⁴Tomundo tukon sasaibino konasuludadu pakadak tuuno salataa polong doi Yordan Paisunobatango, maka yanila tade idoo.

¹⁵Daano mobuno doiya Absalom tukon sasaibino ko Israel miano mololainge yana usokiyomo kokota Yerusalem, tukon Ahitopel koidan malaing.

¹⁶Salataa Husai Daud tulano mosetiadoo pososuung tukon Absalom, Husai nggeleamon, “Naiyamo kotomundo! Naiyamo kotomundo!”

¹⁷Bai Absalom masadai doi yana, “Inaando komusetiaan doi musobat Daud? Bulaando moaki mulainge yana?”

¹⁸Husai timbiliyo, “Aki nateali! Yaku ala doi TEMENENO namian linilik, luwedoi mian-mian nia, tukon sasaibino ko Israel miano. Doiyamo komiano naikon komo malaing.

¹⁹Tukon koidan indee koidan naikon daku lineleani? Bolikonkai dakutuan namalane? Pokakana kuleleaniano Tuan tamano, bunomokai doiya koidan naikon dakuleleaniano Tuan diabudodoo.”

²⁰Doibundu Absalom bantile doi Ahitofel, “Bantilemokai oilamo konda linakukanggon.”

²¹Ahitofel timbiliyo, “Ampakonokai doi ku Tuan tamano nabolo-boloki piala moinotinggal modagaiyo kokamali, tukon pokooloimo yanila. Sasaibino ko Israel miano naikon toiyo baikon tukon daku Tuanoo nakokubai, daku Tuan tamano anggenemo musuh daku Tuan. Maka sasaibino komo lolainge daku Tuan naikon tosuungimo barani.”

²² Jadi tuuk Absalom minokubaikon sandung doi kamalidoo atono bunggono mopatal. Maka sasaibino komian kitayo baikon Absalom usoko doi sandungoo lalomo tukon pokooloimo kotamano nabolo-boloki paiala.

²³Doi lounudoo sasamba Ahitofel naotunggul yanila talimayo buno pokakana Mian Bisa susuungo nabantilan; mau Daud maukai Absalom tulutiyo kona otu-otunggul.