Read Banggai 2 SAMUEL 17 Bible Online

2 SAMUEL 17 - Banggai bible

2 SAMUEL 17

¹Salataa lapa doiya, aki namalumbit, Ahitofel bantile koidan doi Absalom, “Pataikenemokai kumolilik 12.000 komian. Sio napopook maka naikon kuluwe molelenggene Daud.

²Yaku naikon lobosiyo yana doi tempo napakadakan tukon akiyono konasamangat. Yaku naikon odinggalayo yana, tobikon sasaibino konasuludadu dampasene kobutongo. Tolongo Tomundo Daud tolong komo naikon kuakateyo.

³Bai sasaibino konasuludadu naikon kuabalinggene doi ku Tuan buno boine abali pokila doi nalakai. Bolikonkai daku Tuan tolongo yase meeng komian komo inakate? Kobailon aki nabinula-bulaandokon.”

⁴Dootinaudoo Absalom talimayo monondok tukon sasaibino ko Israel katuano.

⁵Maukai nabunodoiya Absalom bantile, “Pomajumokai diabudodoo Husai; maimo nda mondongolii bulaando konapandapat.”

⁶Salataa Husai lubat momangadap, Absalom popitoikene Ahitopel natetel, maka bantile, “Kitakai naikon tulutiyo dootungguloo? Kalu aki ndamebee usul mobailon.”

⁷Husai timbiliyo, “Ahitofel naotinau koidan nia aki namonondok.

⁸Daku Tuan tantu toiyo baikon Daud tukon donasuludadudoo daanoonkai talenga motambongan barani. Konapoo baranian pokakana koasulobo tinano molapus konapau. Tukon koidankai Daud daanookai meeng kosuludadu kapalano mopangalamano moaki nabiasa moolo posinggat-singgat tukon nasuludadu.

⁹Ugaatenekai doi temponia yana daanoon mosapit doi meeng ko leeng lalomo kai doitampat bailon. Jadi, kalu andeno Tuan nasuludadu Daud lobosiyo, tukon daano komo mate, maka indee komo lengele dolanggedoo naikon yana bantile Absalom nasuludadu linungguimo.

¹⁰Maka komian-mian mobarani tuuno tukon tambongan barani maukai singa naikon teali matakut. Sabab sasaibino ko Israel miano toiyo baikon Tuan tamanodoo daanokai meeng kotalenga tukon baikon konasuludadu daanokai pejuang-pejuang motambongan barani.

¹¹Tobikon doiya, dakuotinau bunonaiya. Kumbulekai sasaibino ko Israel miano luwedoi posaapon kotano sampe pokakana kobone konakadaang doi tobun bibilo. Maka Tuan susuungo komo katuaiyo yanila momaju molobosi.

¹²Kita naikon pososuunggene Daud doiyaandokai yana nadaanoan; tukon kita lobosiyo yana doi naakiyoonan natoiyo oila komo teali. Akiyono naikon komo moola luput, mau yana maukai nasuludadu.

¹³Kalu yana dampas doi meeng kokota lalomo, sasaibino kondarayat naikon mangala alos-alos tukon kinoot maka natinandan dokotadoo maka napoo otuwenge doi pepelakon lalomo moloolani. Akiyokai komeeng kobatu mototinggal doi bunggulo bunggono.”

¹⁴Salataa Absalom lengele doiya tukon sasaibino ko Israel miano bantile, “Husai naotinau lobian konamonondokan tukon Ahitofel naotinau.” Takainomo, ko TEMENENO lapamo tantukanggene sulano naakiyenggene Ahitofel naotinaudoo momonondok sulano Absalom nakanakon balaa.

¹⁵Sambuno lapa doiya Husai pelenggene doi Imam Zadok tukon Imam Abyatar tentang Ahitofel naotinau tukon naotinau susuungo doi Absalom tukon sasaibino ko Israel katuano.

¹⁶Husai bantile, “Mosobit! Popitoikenemo doi Daud sulano naaki nabamoolokon doi lipu pintosiiano kopaisu doi padang lalomo. Yana sio namosobit pintosiiyo ko Yordan Paisunobatango. Kalu aki, yana tukon sasaibino kona pasukan naikon minanaso.”

¹⁷Daanon mobunodoiya Yonatan Abyatar napau tukon Ahimaas Zadok napau daanon mototiili loolani doi En-Rogel paisuno matano doi kota Yerusalem bibilo. Yanila aki nabarani usok doi kota sabab matakut mian nakitayo. Buno kokabiasaan, meeng koata boineno pelenggene doi yanila kobilita mosio napinolonggon doi Tomundo Daud.

¹⁸Bai doiya kosinggato meeng kopau kopau mala-malaneno sosinggot kitayo yanila, tukon popitoikene doi Absalom. Jadi yanila moso-mosobit taus tukon sapit doi meeng komian nabonua modungol doi desa Bahurim. Doi naloolanian konabonua daano kobubung tukon yanila usok doi lalomo.

¹⁹Dobonuadoo tumbuno naboloki beleatene komeeng kotoik doi bubungoo buango bunggono tukon tiposiiyo gandum doi bunggono, tobikon doiya dobubungoo akimo natokita.

²⁰Absalom namian-mian sinumbolii lubat doi bonuadoo tukon sadaiyo boinedoo budoo, “Yaandomo Ahimaas tukon Yonatan?” Yana timbiliyo, “Yanila sosodowan konapoo pintosiiyano kopaisu batango.” Yanila umboliiyo dopamudadoo molua, bai aki napoo posuunggene, maka yanila mulemo doi Yerusalem.

²¹Ahimaas tukon Yonatan sumbut luwedoi bubungoo, maka moso-mosobit taus pososuung Tomundo Daud tukon pelenggene sasaibinodoo. Yanila bantile, “Ahitofel mebee otinau sulano nalobosiyo Tuan. Jadi lenggeto dia budodoo koidan pintosiiyo na paisu batango nia.”

²²Maka Daud tukon nasuludadu pintosiiyo ko Yordan Paisunobatango tukon polong taalikon doi sembeleng doi tempo dodoa soono.

²³Salataa Ahitofel mangalatikene baikon kona otinau aki nalinoingi, yana paase konakeledai pangalaso doi tonggulungo, maka mulemo doi nakota susuungo. Sambuno lapa sasaibino konaulusan yana keete kobulungo maka nabagantung mate, kinibul doi nakaluargaa kibulo lalomo.

²⁴Daud lapamo polong doi kota Mahanaim salataa Absalom pintosiiyo ko Yordan Paisunobatango, ko Israel miano polainggene yana. (

²⁵Absalom lapamo oduduke Amasa teali pasukan kapalano mosoboliyo Yoab. Amasa Yitra napau Ismael miano, kotinano sambuno Abigail Nahas napau, doiyamo Zeruya utuso moluko Yoab tinano.)

²⁶Absalom tukon nasuludadu mokubai sandung doi lipu Gilead.

²⁷Salataa Daud polong doi Mahanaim, Sobi Nahas napau lolobotiyo yana luwedoi kota Raba doi Amon, tukon Makhir moluwedoi Lodebar napau, tukon Barzilai luwedoi Rogelim doi Gilead.

²⁸Yanila mababa manggo, balanga tukon kasur tuuk Daud tukon nasuludadu, tukon koidan gandum, jelai, tarigu, gandum sininanga, kacang memela, kacang memela mobabasal, dokot, keju, susu bukolo tukon bubula kodomba. Yanila toiyo baikon Daud tukon nasuludadu daanon momalaal, molou tukon pakadak sabab ampakonan doi padang lalomo.