Read Banggai 2 SAMUEL 18 Bible Online

2 SAMUEL 18 - Banggai bible

2 SAMUEL 18

¹Tomundo Daud pototongikene sasaibino konasuludadu, maka naebese teali pomeenggonan moluwedoi nasololoonan tukon moluwedoi nasakatan komian. Doibundu yana oduduke kosuludadu-suludadu kapalano sulano nakapalaiyo dopomeenggonan-pomeenggonanoo.

²Salataa lapa doiya yana sumboliiyomo motaus polobosi doi tolu kotambuno, suwe-suwele kokatuano doiyamo Yoab, Abisai, Yoab utuso pioto tukon Itai luwedoi Gat. Tomundo bantile doi nasuludadu, “Yaku koidan malaing pososinggat komuyu.”

³Bai domian-mianoo timbiliyo, “Inai Tuan. Sabab kalu kami pakisaayo modambas, kai doi kamidoo mosembeleng naikon komo mate, maka domusuhdoo akiyoon nabiai konoanoila sabab Tuankai konapoo inumbolii. Tuan pokakana koanggano tukon songulo koloon komian moluwedoi kami. Tukon konamonondokan koidan tadukai Tuan namakapatu bantuan tolong doi kami moluwedoi kota lalomo.”

⁴Maka dotomundodoo bantile, “Monondokokai ikoo.” Doibundu yana kokondong doi kota tataapono mobabasal bibilo sabeakai sasaibino kopasukan babaris doi tonggulung doi pomeenggonan-pomeenggonanoo lalomo moluwedoi nasoloonan tukon doi nasakatan komian.

⁵Maka dotomundodoo parentahyo doi Yoab, Abisai tukon Itai konabantilano, “Inaikai poloolaniyo Absalom dotabodoo sabab yaku mapatanggene.” Sasaibino dopasukanoo lengele doi Daud naparentahdoo.

⁶Maka lenggetokai doi Daudtoo napasukan molobosiyo ko Israel napasukan, tukon yanila polobosi doi Efraim babonono.

⁷Daud nasuludadu kalayomo ko Israel napasukan, donapoo linungguiyanoo babasal tuuno, 20.000 komian komo mate doi oloyodoo.

⁸Dopolobosianoo tosuungi posaapon dolipudoo tukon badaang tuuno komian momate kana doi soolan doi babonodoo tukon lobioniiyo konakadaang komo mate doi polobosian lalomo.

⁹Doi tempo Absalom nalokitiyano kona adalan, sosinggot yana pososuung Daud nasuludadu. Doadalanoo suukon doi kayung babasal tukon mopepende adeno, maka tongiison Absalom oluno doi meeng kopangano. Konadalan obulen banggadudul bai Absalom totinggalo tukon tongiisono idoo.

¹⁰Meeng komian moluwedoi Daud nasuludadu yana kitayo tukon popitoikene doi Yoab, “Tuan budodoiya yaku kitayo Absalom motongiison doi meeng kokayung batango mobabasal!”

¹¹Yoab timbiliyo, “Oila? Ikoo kitayo yana? Bulaando moaki mumosobit akateyo yana? Pastikai kubeenggon songulo kodoy suasa tukon meeng kopabaang.”

¹²Bai domianoo timbiliyo, “Maukai kubinee 1.000 kodoy suasa, bai aki kuiyase moosokitiyo tomundo namalane. Kami sasaibino ndongoliiyo oila tomundo napinalentahkon doi Tuan tukon doi Abisai tukon Itai, inai mopakolonio Absalom dotabodoo luwedoi tomundo naparentah.

¹³Tukon kalu andeno yaku akateyo Absalom budodoo, pasti tomundo toiyo, sabab tomundo tantu lengele tentang sasaibino kolobo — tukon Tuankai pasti aki naikon nabelaaku.”

¹⁴Yoab bantile, “Banggalokai! Kabus kotempo tolongo pogagaiyan tukon ikoo.” Maka Yoab mopulut tolu kopandong batango tukon yana tebeke Absalom daanoon motubo tukon tongiison doi kayung.

¹⁵Doibundu songulo Yoab nasuludadu kemele tukon akateyo yana.

¹⁶Yoab puuke konatorompet sulano konasuludadu natade molelenggene ko Israel napasukan.

¹⁷Doibundu Absalom bajano biningkat tukon sinakukon doi bubung lalomo moatean doi babono. Dobubungoo yanila tombuniyo tukon batu polong tatandak. Sasaibino ko Israel napasukan dambasene kobutongo suwe-suwele doi nabonua.

¹⁸Doi tempo Absalom natuboan lapamo kekendenge komeeng kotugu tuuk yana doi Tomundo napepelako, sabab yana akiyo konapau malaneno sulano nabanggadudukene konakaturunan. Dotugudoo yana sumbuikene mololoi sambuno susuungo, tukon polong naoloyo nia tugu nia tinoi salaku Absalom natugu.

¹⁹Doibundu Ahimaas Zadok napau bantile doi Yoab, “Pataikanaku moobulen pososuung kotomundo tuuk babayo kobilita monondok baikon ko TEMENENO lapamo salamatene Tuan luwedoi namusuh.”

²⁰Yoab bantile, “Inai, sio oloyo meeng tolong. Oloyo nia aki namoola ikoo mababa bilita, sabab tomundo namalane matemo.”

²¹Doibundu Yoab bantile doi naata Sudan miano, “Tausokai popitoikene doi tomundo oila komo lapamo ikoo kitayo.” Doatadoo totuku sosuba maka taus tukon obulen.

²²Bai Ahimaas desaake doi Yoab, “Mau indeemo komo teali, pataikenemo koidan kumababa bilita.” “Bulaando ikoo mobunodoiya komumatikasan moiyase taus koidan, dakupau?” Yoab masadai, “Ikoo aki naikon mumatalima tambo tuuk doiya.”

²³Ahimaas bantile koidan, “Aki nabulaa, yaku naikon taus.” Yoab bantile, “Kalu buno doiya, tauso.” Maka Ahimaas obulen mololoiyo kololoon moliisiyo ko Yordan Pepelako, tukon aki namalumbit doibundu yana berhasil matailukonio doata Sudan mianodoo.

²⁴Daud daanoon moosulang doi antara lua kotataapon babasal lalomo tukon tataapon babasal doi kotadoo tonggulungo. Komo badagai liba doi tembok bunggono tukon kokondong doi tataapon babasal atonodoo. Salataa yana mbalenggene kona pandangan, yana kitayo daano komeeng komian molubat moobulen.

²⁵Dopadagaidoo nggeleamon doi bilit popitoikene dolanggedoo doi tomundo, tukon tomundo bantile, “Kalu yana basusuunganggon, pastimo bilita monondok konabinaba.” Salataa domiano kabi napolong,

²⁶dopadagaidoo kitayo daano komeeng komian koidan molubat obulen kai. Jadi yana nggeleamon, “Kitayo! Daano komian bailon koidan moobulen doisumai susuungo.” Tomundo timbiliyo, “Tantu yana mababa bilita momondonok koidan.”

²⁷Dopototoolidoo bantile, “Domianoo tumbeno Ahimaas. Yaku toiyo luwedoi naobulenau nondoongo.” Tomundo bantile, “Yana mian monondok, tantu yana mababa bilita monondok.”

²⁸Tukon nggeleamon Ahimaas batabea doi tomundo, kobailon sosuba tukon bantil, “Tanggaalo ko TEMENENO Mian Bisa Tuan, molapamo salakanggene doi Tuan komian-mian momalawan doi ku Tuan?”

²⁹Tomundo masadai, “Bulaandomokai dotabodoo Absalom kai yana salamat?” Ahimaas timbiliyo, “Tuan, budodoo salataa Yoab utuse ata mokitayo konggabutan mobabasal, bai ata aki natoiyo oila komo teali.”

³⁰Tomundo bantile, “Kokondongokai taikon mbali sembeleng,” maka Ahimaas taus taalikon doi bibilo tukon kokondong idoo.

³¹Doibundu Yoab naatadoo polongo, tukon bantile doi tomundo, “Ata mababa bilita monondok tuuk doi Tuan! Naoloyo nia ko TEMENENO lapamo beekene kokamanangan doi Tuan doi sasaibino komian mobanggabut.”

³²Tomundo masadai doi yana, “Oilakai dotabodoo Absalom salamat?” Maka doatadoo timbiliyo, “Boliisi sasaibino Tuan namusuh, sasaibino komian mobanggabut doi Tuan natoupiyo kotuboan mopokakana buno dotabodoo.”

³³Tomundo susah tuuno salataa lengele doiya, maka liba doi tataapon babasal bunggono naruangan maka kokiil tukon mandaung, “Oo dakupau! Dakupau Absalom! Absalom, dakupau! Tadukai yaku komo mate soboliyo ikoo, dakupau! Absalom, dakupau!”