Read Banggai 2 SAMUEL 19 Bible Online

2 SAMUEL 19 - Banggai bible

2 SAMUEL 19

¹Doi Yoab binontiikon baikon Tomundo Daud kokiil tukon poloonggene Absalom.

²Maka komanaangan doi oloyodoo tobolii teali kasusahan doi sasaibino Daud nasuludadu sabab yanila lengele baikon tomundo kokiiliyo konamalane.

³Tukon aki nabiyok-biyok yanila abali doikota, buno suludadu morasayo mammaa sabab dampasene kobutongo luwedoi polobosian.

⁴Tomundo sunggupiyo koduduso maka mandaung tukon kakabukuan, “Oo dakupau! Dakupau Absalom! Absalom, dakupau!”

⁵Yoab taus mangadap doi tomundo tukon bantile, “Doi oloyo nia Tuan akamaayo Tuan nasuludadu, baanggokai yanila komo salamatene Tuan butongo, Tuan naboine - malane butongo, Tuan naboloki tukon namolue.

⁶Tuan seseange komian-mian momisiketene Tuan, bai Tuan misikitene komian-mian moseseange Tuan! Tukon tontong Tuan okitakene baikon kosuludadu kapalano tukon Tuan nasuludadu akiyono tuuno koalatino tuuk doi Tuan. Bainokai tokita Tuan naikon sanaang tuuno kalukai doi oloyo nia Absalom daano motubo tukon kami sasaibino mate!

⁷Tadukai Tuan nakokondong tukon taus sumbut sulano Tuan nakindendeke kona suludadu noano. Ata batotopi tongo TEMENENO, kalu Tuan aki nasumbut posuunggene yanila, maka napopookia koidan akiyo naikon komian modaano moiyase polainggene Tuan. Doiya naikon bunokai silakaan mobabasal tuuno Tuan naikon motoupiyo sampe pomatekon.”

⁸Doibundu kokondongo Tomundo tukon taus sumbut, tukon osulang loolani kotataapon babasal. Konasuludadu lengele baikon yana daano idoo, maka yanila sasaibino lubat mangadap. Daanoon mobuno doiya sasaibino ko Israel napasukan dambasenemo kobutongo, tukon mulemo doi nabonua suwe-suwele.

⁹Doi sasaibino ko Israel benseno lalomo tealimokai kopodangaanian. Yanila bantile, “Tomundo Daud salamatenemo kita luwedoi Filistin miano tukon sodiiyo kita luwedoi musuh-musuh bailon, bai diabudodoo yana dambasenemo kobutongo luwedoi Absalom tukon tinggalemo natano nia.

¹⁰Kita oduduke Absalom teali tomundo, bai diabudodoo matemo doi polobosian lalomo. Bulaando moakiyo komeeng komian mokakaate sulano naabalinggene Tomundo Daud?”

¹¹Dobantilan-bantilanoo polong koidan doi Tomundo Daud. Tobikon doiya yana sumboliiyo Imam Zadok tukon Imam Abyatar namasadaikene doi sasaibino ko Yehuda katuano buno naiya, “Bulaando komuyu momatalaibundukon mosambute tukon tomundo abali doi kamali?

¹²Bolikonkai komuyu komontolutusan tukon komondopulian? Bulaando konatealian komuyu matalaibundukon mokabiyo sulano kumule?”

¹³Daud koidan sumboliiyo yanila bantile buno naiya doi Amasa, “Bolikonkai ikoo kupuli? Tambuuno diabudodoo, yaku oduduke ikoo teali kusuludadu talengano mosoboliyo Yoab. Boliisi ko Mian Bisa naakateaku kalu dolanggedoo aki kulakukanggene.”

¹⁴Bunomokai doiya Daud namoolaan alayo sasaibino ko Yehuda miano noano tobikon yanila makapatu teteba doi tomundo sulano naabali doi kamali posinggat-singgat tukon sasaibino konapagawe.

¹⁵Maka lenggeto dotomundodoo tukon polong doi Yordan Paisunobatango, daanoon mobuno doiya ko Yehuda mian-miano polongo doi Gilgal tuuk mololobotiyo kotomundo tukon mokawale yana mopintosiiyo dopaisudoo batango.

¹⁶ Simei Gera napau, Benyamin mianodoo mababa soloon komian luwedoi Benyamin benseno tukon moso-mosobit posinggat ko Yehuda mianodoo sulano nalolobotiyo kotomundo. Bunomo doiya koidan Zeba Saul nakaluargaa naata, tukon songulo lima komian konapau momala-malaneno tukon luakolono komian kona ata; yanila pintosiiyomo ko Yordan Paisunobatango doi naakiyoonan nalubat tomundo.

¹⁷

¹⁸Yanila tulungiyo tomundo nakaluargaa mopintosiiyo tukon lakukene sasaibino kotomundo nasinumboliikon doi yanila. Doi tempo tomundo nakabian pintosiiyo kopaisu batango, Simei sosuba doi salaano tukon bantile,

¹⁹“Ata kabiyo, boliisi Tuan aki naanggene ata tataap salah. Tuan sanaang motoliminggene oila ata nalinakukon doi Tuan naoloyo tinggalano ko Yerusalem.

²⁰Ata sadariyomo, baikon ata mokubaimo lalim, tukon tobikon doiyadoo, doi antara bense-benseno modungol doi lipu taalikon lembet atamo kotumbe-tumbeno molubat lobosiyo Tuan doi oloyo nia.”

²¹Salataa lengele doiya Abisai Zeruya napau bantile, “Simei pantaso nainukum mate sabab yana kutukiyomo kotomundo TEMENENO molilike.”

²²Bai Daud bantile doi Abisai tukon Yoab utuso langgongo, “Inai mokokousok. Bulaando komuyu mokubaiyo yaku susah? Doi oloyo nia yaku tealli koidan tomundo doi Israel, tukon aki namoola daano ko Israel miano moinukum mate.”

²³Doibundu tomundo batotopimo doi Simei, “Yaku salamatonggon tukon aki naikon muinukum mate.”

²⁴ Koidan Mefiboset Saul natumbu, lubat sulano namalaing mololobotiyo kotomundo. Yana aki nakumesiyo koaino, aki naguntinge konasimbil, tukon aki nabusoiyo konapakean tambuuno doi Tomundo Daud natinggalano ke Yerusalem sampe yana abali tukon salamat.

²⁵Salataa Mefiboset lubat luwedoi Yerusalem sulano nalolobotiyo kotomundo, bantilokai kotomundo doi yana, “Mefiboset, bulaando ikoo aki mumalaing tukon yaku doi tempodoo?”

²⁶Yana timbiliyo, “Mo Inodotii, Tuan toiyo ata nia lemat. Ata sumboliiyo kopeleleani ata sulano nasiapkanggene kokeledai momoola ata lokitiyo sulano napolainggene Tuan. Bai ata do peleleanidoo sakisaayo.

²⁷Tukon koidan ata binaloobukon doi Tuan. Bai Tuan buno Mian Bisa namalaekat. Tobikon doiya lakukenemo oilamo Dakutuan natinoupi monondok.

²⁸Sasaibino ata tamano nakaluargaa pantas Tuan naukume mate, bai ata nia Tuan lapamo pataikene malaing kaan doi kamali. Diabudodoo ata akimo nabarani koidan makabi oi-oila luwedoi Tuan.”

²⁹Tomundo timbiliyo, “Akimo napalaluu ikoo mabantil koidan oi-oila. Yaku putusiyomo sulano nabeekene sasaibino Saul nabuat doikoo tukon doi Ziba.”

³⁰Maka Mefiboset timbiliyo, “Sodiikenemo Ziba naalayo sasaibino. Ata puaso sabab Tuan mulemo tukon salamat.”

³¹ Koidan Barzilai do Gileadtoo miano lubat luwedoi Rogelim sulano napolainggene tomundo mopintosiiyo ko Yordan Paisunobatango.

³²Barzilai motuamo tuuno, konaumur alu kolonomo kotaun. Yana kaasa tuuno tukon loolukoo tomundo dungol malumbit doi Mahanaim. Barzilaikai komo sadiayo tuuk tomundo nakinaan.

³³Tomundo bantile doi yana, “Laingakumo doi Yerusalem, maka yaku naikon sadiayo sasaibino komu pinalaluu indaa.”

³⁴Bai Barzilai timbiliyo, “Ata akimo naikon natubo malumbit koidan. Jadi oila kotakoso ata molainge Tuan doi Yerusalem?

³⁵Ata naumur alu kolonomo kotaun, tukon akimo koidan namoola beena sanaangan doi ata. Ata akimo koidan na motoupi oila ata nakinaan kai ata naininum, tukon akimo koidan namolongol komian momanani alalo. Ata naikon tolongo teali tanggungan motuuk doi Tuan.

³⁶Ata aki nateali matalima tambo mobuno doiya kona kadaang. Ata tolongo yase polainggene Tuan bubula kolaakonan tolong luwedoi Yordan Paisunobatango.

³⁷Lapadoiya, sodiikenemo ata namule doi bonua tukon mate loolani ata naorangtua kibulo, bai naiyamo ata napau Kimham. Pataikenemo yana napolainggene Tuan tukon lakukenemokai doi yana oilamo Tuan nakinita monondok.”

³⁸Tomundo timbiliyo, “Kimham naikon kubabayo tukon kubitekene buno naikon mumongiasan, tukon sasaibino komu kinabi doiyaku naikon kudaanokene.”

³⁹Doibundu Daud tukon nasuludadu pintosiiyo ko Yordan Paisunobatango. Maka Daud umayo Barzilai tukon palamisi doi yana. Lapadoiya Barzilai mulemo doi nabonua.

⁴⁰Sasaibino Yehuda napasukan tukon sembeleng luwedoi Israel napasukan polainggene kotomundo mopintosiiyo kopaisu batango. Lapa doiya tomundo banggadudul doi Gilgal, tukon Kimham polaing yana.

⁴¹Doibundu lubatokai sasaibino ko Israel miano momangadap doi tomundo tukon bantile doi yanila, “Tuan, bulaando koutusonggami Yehuda mian-mianodoo anggene baikon yanilamo komo daano konahaak sulano nalolobotiyo tukon mokawale Tuan polaing sasaibino kokalurga tukon Tuan nasuludadu mopintosiiyo ko Yordan Paisunobatango?”

⁴²Maka ko Yehuda miano timbiliyo, “Tantumokai, sabab tomundo daanon mai sobat. Bulaando komuyu moteali nggimal? Oilakai tomundo tanggunge komai pinalaluu, kai lapamo binee tambo doi kami?”

⁴³Ko Israel miano timbiliyo, “Komai haak doi tomundo songulo luunggon lobian kona babasalan luwedoi pohaak. Bulaando komuyu mopandangentenge kami? Inai motoliminggene baikon kamimo kotumbe-tumbemo tuuno sulano tomundo nabinaba abali!” Bai ko Yehuda miano palalentel tuuno luwedoi Israel miano tukon aki naiyase kalah.