Read Banggai 2 SAMUEL 2 Bible Online

2 SAMUEL 2 - Banggai bible

2 SAMUEL 2

¹Sambuno lapa doiya Daud masadai doi TEMENENO, “Oilakai ko TEMENENO yase sulano kutaus kuasaiyo komeeng kokota doi Yehuda?” Ko TEMENENO timbiliyo, “Oode.” Daud sadaiyo, “Indee kokotano?” TEMENENO timbiliyo, “Hebron.”

² Maka tauso Daud doi Hebron polaing tukon lua konaboloki: Ahinoam Yizreel boineno, tukon Abigail Nabal baluno doiyamo Karmel boineno.

³Bunomo doiya koidan konasuludadu tukon konapoo kaluargaa suwe-suwele lainge Daud maka yaniladoo tataapo dungol doi Hebron tukon doi napoloolanikonan.

⁴ Doibundu ko Yehuda miano lubat doi Hebron, tukon kolobokiyo Dadu natealian tomundo doi Yehuda. Salataa Daud lengele baikon ko Yabesh miano doi Gilead lapamo tadine Saul bajano,

⁵yana mosumbolii bito-bito indaa tukon pelenggene koteteba, “Boliisi TEMENENO nabalakaatiyo komuyu, sabab komuyu lapamo tudoikene kopoo taatan doi potomundo tukon kopoo tadinano kobajano.

⁶Tobikon doiya, boliisi ko TEMENENO natudoikene kona seang tukon nasetiaan doi komuyu. Yakukai naikon lakukene komuyu tukon monondok sabab dopokokubaidoo.

⁷Ekeenggele konoamuyu tukon kopoo kokubai buno talenga! Saul, domutomundo bisa momatemo, bai ko Yehuda miano lapamo kolobokiyaku teali napoo tomundo.”

⁸Saul nasuludadu talengano, doiyamo Abner Ner napau, dampasenemo kobutongo polaing-laing Isyboset Saul napau, doi Mahanaim doi Yordan Paisunobatango sembeleng.

⁹Indaa Abner oduduke Isyboset teali tomundo doi Gilead, Asyuri, Yizreel, Efraim tukon Benyamin lipu-lipuno, tukonkai doi posaapon ko Israel.

¹⁰Isyboset natinealikonan tomundo doi Israel konaumur sangkapolonomo kotaun, tukon yana maparentah lua kotaun konakalumbit. Bai Yehuda benseno tataap setia doi Daud,

¹¹tukon Daud maparentah doi Hebron tuuk Yehuda pitusembeleng kotaun konakalumbit.

¹²Daano kooloyo meeng Abner luwedoi Mahanaim taus doi kota Gibeon, linoolaing Isyboset nasuludadu.

¹³Koidan Yoab (kotinano sambuno Zeluya), polaing Daud nasuludadu pakatuuwo dokotadoo. Lua kotambuno domianoo mopomusuh posasalaan doi Gibeon dolaako; Abner tukon tulano osulang doi dolaako sembeleng, Yoab tukon talaus doi dolakoo koidan sembeleng.

¹⁴Maka Abner bantile doi Yoab, “Ayo, kita sumbo liiyomo konda suludadu napotanding!” Yoab timbiliyo, “Monondokokai.”

¹⁵Maka majumo kosongulolua komian mo luwedoi Benyamin nabenseno mowakiliyo Isyboset, tukon songulolua komian mo luwedoi Daud nasuludadu.

¹⁶Yanila suwe-suwele bataani doi buuk tukon tebeke kona lawan tiano, tobikon doiya yanila mate posinggat-singgat. Tobikon doiya doi tampatoo doi Gibeon sinombuikon “Sabel Asino.”

¹⁷Sambuno lapa doiya tealimo kopoolobosian mohebat, Abner tukon Israel nasuludadu Daud nasuludadu lungguiyomo.

¹⁸Zeruya napau motolu daano idoo, doiyamo Yoab, Abisai tukon Asael. Asael nabulen mosobit buno donga nabulenan,

¹⁹maka nabanggadudul lelenggene Abner.

²⁰Abner mbalenge kotonggulungo tukon masadai, “Kai ikoomodoo doi Asael?” Konapotimbili, “Oode.”

²¹Abner bantile, “Inai mololongganaku. Soba lakoyo komeeng komian moluwedoi sasaibino kosuludadudoo tukon alayomo konasinapan!” Bai Asael banggadudul momeenggon molelenggene yana.

²²Abner bantile koidan doi yana, “Inai mololonggana ku! Naapadoiya tapakisaa yaku akatekon. Jadi bulaandomo daku moolaan kitayo Yoab duduso do utusomu doo langgongo?”

²³Bai sabab Asael tataap aki naiyase tade maka Abner sakule doi tonggulungo, tukon kanakon Asael tiano polong dopandongoo tadul doi bungguto. Asael tolubang tukon mate doi tampatoo koidan. Sasaibino komian molubat doi tampatoo yana busak, tade idoo.

²⁴Bai Yoab tukon Abisai banggadudukene konapoo lolongganano Abner. Salataa sopoko kooloyo matano, yanila polongo doi Ama Bunggulo, modano tambikon tolopot ko Giah, sasalaane kopadang mokindolon doi Gibeon.

²⁵Komian indaa moluwe doi Benyamin benseno pototongi koidan tukon Abner; maka napoo ature konapoo barisan doi meeng kobunggul bunggono.

²⁶Luwe indaa Abner uange kakabukuan doi Yoab, “Kai sio ndapolobosi posidutukon? Kai aki mutoiyo baikon napoolobosian nia tongo babayo kokulokisan? Kaminia utusomuyu meeng kobangsa. Bulaando konakalumbit koidan komuyu yasano sulano mupalentayo komu suludadu natade mololongganggami?”

²⁷Yoab timbiliyo, “Tolongo Mian Bisa motubo, kalu andeno aki mutambuun basilingan, tantu daku suludadu naikon banggadudul lelenggene komuyu polong modoa dodowa.”

²⁸Maka Yoab puuke konapopuukon salaku paloosan doi na suludadu sulano natade molelenggene ko Israel miano, kalu bunomo doiya maka tademo dopolobosianoo.

²⁹Abner tukon nasuludadu baris banggamodoa loloiyo ko Yordan Peako, maka pintosiiyo ko Yordan Paisunobatango, tukon sambuno lapa ambakon banggadudul posopokon kooloyo koidan, yanila polongo doi Mahanaim.

³⁰Sambuno lapa Yoab tade molelenggene Abner yana pototongikene sasaibino konasuludadu. Sangalaasan Asael tontong songulo sio komian komo lapus.

³¹Daud nasuludadu lapamo mangakate 360 komian Abner napasukan luwedoi Benyamin benseno.

³²Sambuno lapa doiya Yoab tukon nasuludadu bingkate Asael bajano tukon yanila tadine doi pulino nakinibulan doi Betlehem. Maka yanila ambakon meeng kopopook tukon polong doi Hebron dodowa soono.