Read Banggai 2 SAMUEL 20 Bible Online

2 SAMUEL 20 - Banggai bible

2 SAMUEL 20

¹ Doikota Gilgal daano komeeng komian mobanggabut kosambuno Seba. Yana Bikri napau, luwedoi Benyamin benseno. Doi tempo Daud narombongan-rombongan nalubatan, Seba puuke kona torompet tukon nggeleamon, “Kita akiyo konda potaamian tukon Daud. Tuuk oila kita momalaing tukon yana? He Israel miano, mai nda mule!”

²Maka ko Israel mian-miano tauso tinggalemo Daud tukon laingemo Seba. Bai ko Yehuda mian-miano tataap setia tukon lainge Daud luwedoi Yordan Paisunobatango polong doi Yerusalem.

³ Salataa Daud polong doi nakamali doi Yerusalem, songulo kona boloki piala kona tininggal sulano nadungoliyo kokamali, yana odungele doi bonua lalomo tukon pangawal komo dagaiyo. Konapoo pinalaluu sinadiamo sukup; bai Daud akimo napokooloikene koidan yanila. Jadi yaniladoo tininggal tukon yanila tubo buno bauntal pomatekon.

⁴Tomundo maparentahkene doi Amasa, “Pototongikenemo ko Yehuda miano tukon lubato doisumai polaing yanila doi tempo tolu kooloyo lalomo.”

⁵Maka tausokai Amasa sulano napototongikene yanila, bai yana aki naabali doi tempo tomundo natantukanano.

⁶Doibundu tomundo bantilekai doi Abisai, “Sebadoo naikon kakaatekene kita lobian doi Absalom. Tobikon doiya babayomo dakusuludadu tukon lelenggenemo yana, sulano naaki nasampe yana dudukiyo kokota-kota modaano konabenteng, tukon moola dampas luwedoi kita.”

⁷Maka doi Abisai nakatuaiyano, Yoab napasukan tukon tomundo susuungo napangawal napasukan tukon sasaibino kosuludadu bailon lengget luwedoi Yerusalem sulano nalelenggene Seba.

⁸Salataa yanila polong doi batu babasal doi Gibeon, Amasa lubat mopososuunggene yanila. Doi tempodoo Yoab bakalambi kalambi polobosian tukon nasabel doi salungo moboboikene doi oako. Salataa yana ampakon mosobit, sabel salungodoo tosodii tobikon konasabel tobiyol doi limano bobono.

⁹Yoab bantile doi Amasa, “Tulando, oila kobilita?” Daanoon motaaniyo Amasa nasimbil tukon limano bakalingano babunokon moumayo yana.

¹⁰Amasa aki nakitayo doi Yoab limano bobono daano konasabel. Tukon sosinggot Yoab tebekene dosabeloo doi Amasa tiano, maka takambelo kokombongo doi buta. Yana mate doi tempodoo koidan, maka Yoab akimo napalaluu natebeke koidan. Maka Yoab tukon utuso piyoto Abisai, banggadudul lelenggene Seba.

¹¹Meeng Yoab nasuludadu kokondong loolani Amasa bajano tukon nggeleamon, “Indee komo bantuwo doi Yoab tukon Daud laingemo Yoab!”

¹²Amasa bajano momasaukene kosau papandika doi loloon tanga-tangano. Yoab nasuludadu kitayo baikon sasaibino komian moalon tade idoo. Tobikon doiya yana tinggalemo dobajanoo doi asi maka tutupiyo tukon toik.

¹³Sambuno dobajanoo lapa biniyol luwedoi loloon, sasaibino komian banggadudukenemo kona ampakonan molainge Yoab sulano nalelenggene Seba.

¹⁴Seba pintosiiyomo sasaibino ko Israel miano nalipu maka polong doikota Abel-Bet-Maakha tukon sasaibino Bikri naanggota kalurga komo lainge.

¹⁵Yoab nasuludadu lengele baikon Seba daano idoo, maka nalobosiyo dokotadoo. Yanila tombuniyo buta potikunggon kotembok tonggulungo tukon tambuuno mokaliyo kobuta doi bilit dotembokoo sulano natolubang.

¹⁶Doikotadoo daano komeeng koboine mopandoi, tukon yana kokondong doi tembok bunggono maka nggeleamon, “Lengele! Lengele! Kabiyomo sulano Yoab nalubat doisumai; yaku yase mopobasalitai tukon yana.”

¹⁷Maka lubato Yoab tukon boinedoo masadai, “Kai Tuan Yoab?” Kona potimbili, “Oode.” Boinedoo bantile, “Tuan, ndongoliiyokai dakubantilan nia.” Yoab timbiliyo, “Monondoko, yaku ndongoliiyo.”

¹⁸Boinedoo bantile, “Looluk komian-mian biasa bantile buno naiya, ‘Kalu ikoo palalu otunggul tauso doi kota Abel’ — tukon doiyamo konapoo linakukon.

¹⁹Komai kota Abel nia babasal, meeng kokota moaman tuuno tukon setia doi tano Israel. Bulaando Tuan mokakaate momanase? Kai Tuan yasemo momanase ko TEMENENO koona nabuta?”

²⁰Yoab timbiliyo, “Tantu akikai! yaku akikai kumaksuutiyo momanase kai moakamanase kabus domubutadoo!

²¹Doiya bolikon maitetel. Bai meeng komian kosambuno Seba Bikri napau yana luwedoi Efraim nalipu bunggulo, komo lapamo nggabute Tomundo Daud. Salakanggenemo yana, maka yaku naikon taus luwedoi kota nia.” Boinedoo bantile, “Domianoo oluno kami naikon lombitikene doi Tuan luwedoi betoonia.”

²²Maka yana tauso tukon napandoiyan pelenggene konamaksud doi kotadoo tumbuno. Salataa lapa doiya pinatolo Seba oluno tukon linombitikono doi Yoab. Doibundu Yoab puuke kona torompet tukon konasuludadu tinggalemo dokotadoo maka mulemo doi bonua suwe-suwele. Yoabkai mule doi Yerusalem mangadap doi tomundo.

²³Naiyamo kosambu-sambu mobabasal Daud mooduduke: Sasaibino ko Israel nasuludadu talengano: Yoab Pasukan kapalano mokawale Daud: Benaya Yoyada napau.

²⁴Balimangan pakisaa kapalano: Adoram. Pangabos doy negara: Yosafat Ahilud napau.

²⁵Negara nadulutulis: Seya. Imam: Zadok tukon Abyatar.

²⁶Imam doi kamali: Ira luwedoi kota Yair.