Read Banggai 2 SAMUEL 21 Bible Online

2 SAMUEL 21 - Banggai bible

2 SAMUEL 21

¹Doi tempo Daud nabasambuan, tealimo komaalan mokulokis tolu kotaun konakalumbit. Maka Daud makabi otunggul doi TEMENENO do langgedoo kaliangano tukon TEMENENO bantile, “Domalaalano doiyamo Saul tukon nakaluargaa komo mangaanikene; sabab yanila akateyomo ko Gibeon miano.” (

² Gibeon miano bolikon Israel miano; yanila tongusokon doi kolompok mopoipoisik doi Amori miano. Ko Israel miano lapamo paladandi naikon molindungiyo yanila; bai Saul lapamo kakaate molopuwo yanila sabab yana pikikene ko Israel miano tukon Yehuda miano napinalaluu.) Maka Daud uange do Gibeon mianodoo,

³tukon masadai doi yanila, “Oilakai komo moola kukubaiyo tuuk ikoo? Yaku yase mobeale kokasalahan molapamo linakukanggon doikoo, sulano pobalakaatiyo ko TEMENENO namian.”

⁴Yanila timbiliyo, “Komai palakala tukon Saul tukon nakaluargaa aki namoola sinelesaikanggon tukon salaka kai mosoni; bai kami koidan aki mai yase mangakate meeng komiankai luwedoi bangsa Israel.” Maka Daud bantile, “Kalu buno doiya, oila kopoo iniyas kukubaiyo?”

⁵Yanila timbiliyo, “Saul TEMENENO lilike teali tomundo yase molopuwo kami sasaibino sampe kami akiyono luwedoi posaapon ko Israel.

⁶Tobikon doiya, salakanggenemo pitu komian luwedoi nakaturunan mo mala-malane, sulano mai tudeyo doi TEMENENO salaano doi Gibea, Tomundo Saul nakota susuungo.” Tomundo timbiliyo, “Monondoko, yanila naikon kusalakanggene.”

⁷ Bai sabab Daud tukon Yonatan lapamo batotopi suwe-suwele, Daud aki nasalakanggene Mefiboset Yonatan napau.

⁸ Daud nainala doiyamo Armoni tukon Mefiboset, doiyamo Daud namalane lua Rispa Aya napau komo suunge; koidan Merab Saul naboine lima konapau boineno, pau-paudoo tosuung luwedoi Merab tukon Adriel Barzilai napau nabasowaanan, tukon do Mehora doo miano.

⁹Yanila sinalakanggon doi Gibeon miano maka domianoo mopitu mate posinggat-singgat tinude doi bunggul bunggono doi TEMENENO salaano. Doukumanoo matean nalinakukonan doi lounu udan napupusan, salataa kolobo motubo tambuuno pinotoli.

¹⁰Maka Rispa Saul naboloki piala, mobukakene karung toiko tuuk doi butongo doi batu bunggono tampat do bajan-bajano nainokooloan. Rispa aki nataus luwe idoo tambuuno luwedoi lounu bapupuiyan tumbeno sampe lubat koudan doi lounu namontodongiiyan kokayung loono. Aki nasinodiikon kotomisi-tomisi nagangguwe dobajan-bajanoo doi nadaanoan kooloyo kai iyayon mobarani doi napopookan.

¹¹Salataa binontiikon doi Daud oila Rispa nakinubai,

¹² yana taus alayo Saul buku-bukuno tukon Yonatan luwedoi kota Yabes tumbuno doi Gilead. (Domiano-mianoo lapamo ndikuke dobuku-bukudoo luwedoi tana lapang kota doi Bet-san, Filistin miano natampat motudean bajan-bajanoo salataa lapa lungguiyo Saul doi Gibea bunggulo.)

¹³Saul buku-bukuno tukon doi Yonatanoo binaba luwe idoo, maka napototongikene koidan domo pitudoo komian motinude buku-bukuno.

¹⁴Doibundu Saul buku-bukuno tukon Yonatan maka domo pitudoo komian buku-bukuno kinibul doi Kish kibulo lalomo Saul tamano doi Zela doi Benyamin nalipu. Sambuno sasaibino lapa linaksanakanggon pokokonoi tomundo naparentah, ko Mian Bisa talimayo yanila tuuk doi tanodoo.

¹⁵Antara Filistin miano tukon Israel miano tealimo koidan kopolobosian. Daud tukon nasuludadu taus polobosi lawane ko Filistin miano. Doi polobosianoo lalomo Daud pakadako.

¹⁶Lubato komeeng kotalenga kosambuno Yisbi-Benob. Konapandong kinubai luwedoi tambaga konakabalat uga-ugaate tolusembeleng kokilogram. Yana koidan ingite kosabel moboolu, tukon yana anggayo moola naakateo Daud.

¹⁷Bai Abisai Zeruya napau lubat motomboniiyo Daud. Yana lobosiyo dotalengadoo tukon akateyo. Sambuno lapa doiya Daud nasuludadu kabiyo sulano Daud napaladandi moakimo naikon namalaing koidan doi polobosian lalomo. Yanila bantile, “Ko Israel naminoinikon tongo Tuan, inai nasampe lapus komai Tuan.”

¹⁸Tealimo koidan kopolobosian molawane ko Filistin miano doi Gat. Dopolobosianoo lalomo Sibkhai Husa miano akateyo komeeng kotalenga kosambuno Saf.

¹⁹Doi polobosian bailon lalomo tukon Filistin miano doi Gat, Elhanan Yair napau luwedoi Betlehem akateyo Goliat luwedoi Gat. Goliat napandong lulukanodoo konakabasal pokakana kokayung tonun pakakaso.

²⁰Tealimo koidan kopolobosian molawane ko Filistin miano doi Gat. Idoo daano komeeng kotalenga moiyase tuuno polobosi. Yana samba kolimano nom kolimano saono tukon samba koaino nom koaino saono.

²¹Yana sosiboliiyo ko Israel miano, tukon doiyamo kosababpo Yonatan Simei napau akateyo yana, Daud utuso langgongo.

²²Domosanggapoo komian Daud tukon napasukan nainakatedoo, doiyamo talenga doi Gat nakaturunan.