Read Banggai 2 SAMUEL 22 Bible Online

2 SAMUEL 22 - Banggai bible

2 SAMUEL 22

¹Salataa lapa ko TEMENENO salamatene Daud luwedoi Saul tukon luwedoi sasaibino konamusuh bailon, Daud mananikenemo konanian nia tuuk doi TEMENENO: [

²Kikilakene doikoo, oh TEMENENO, Ikoomo dakubukuanan.]

³Ko TEMENENO buno benteng momoonggol tampat kusoopan. Daku Mian Bisa buno bunggo batu, tampat kusoopan. Buno tombinde yana sunggupiyo yaku, tukon dagaiyo yaku sulano nasidutu aman.

⁴Yaku nggeleamon doi TEMENENO mopantas nangginaal, Yana osobiiyaku luwedoi kumusuh-musuh.

⁵Kosobaan matean tikumemo yaku tukon tepako koeaba silakaan.

⁶Kosobaan matean tikumemo yaku, Komatean tempono daano doi salaanggu.

⁷Yaku nggeleamon doi TEMENENO doi tempo kususaan, yaku wookon doi ku Mian Bisa makabi tulung. Luwedoi Na Bonua Yana lengele koalalonggu tukon palatikanggene dakubantilan.

⁸Maka unggoto kobuta tukon lolondongo, unggoto tukon lolondongo kobunggul nadasar-dasar sabab Mian Bisa nanggimalan!

⁹Tibolung kukus luwedoi Soongano buango, koaung tukon bara tobuat luwedoi Babano.

¹⁰Yana batayo kotimbu, maka obuluso, tukon daano kobunom-bunom mokalipookan taalikon doi aino.

¹¹Yana benga tukon kerub konalinokiti, Yana leal doi mbobuul kapilo bunggono.

¹²Yana sunggupiyo Kobutongo tukon kalipookan; bunom moatonggon bondolong komo boilingiyo Yana.

¹³Luwedoi didip modoi Salaano, sumboto kobunom, udan es tukon aung.

¹⁴Maka luwedoi dapang longolo ko TEMENENO duluko. Mo Tatandak tuuno longolikene konalalo.

¹⁵Yana tembakene Konapanah-panah, tukon poalaasene komusuh. Yana seseket mongkilap konadidip tukon kubaiyo yanila dampas.

¹⁶Kotobun talikon doi bilit tokita tukon tobuka kodunia taalikon doi bilit doi tempo ko TEMENENO naodinggalaano Konamusuh tukon nanggimalan.

¹⁷Luwedoi babo ko TEMENENO ulule kolimano, Yana taaniyo yaku tukon Yana kibute luwedoi paisu moatean.

¹⁸Yana salamatene yaku luwedoi musuh mobukuan tukon luwedoi mian-mian momisikitene yaku sabab yanila bukuan tuuno luwedoi yaku.

¹⁹Yanila lobosiyo yaku doi tempo kutinepakan susah bai TEMENENO komo teali kupotombonii.

²⁰Yana osodiiyo yaku luwedoi silakaan tukon salamatene yaku sabab Yana pokonoi tukon yaku.

²¹Ko TEMENENO balase daku kokubai mokana; Yana balakaatiyo yaku sabab aki kusalah.

²²Yaku loingiyo ko TEMENENO naparentah, tukon aki kubadodoonggon luwedoi ku Mian Bisa.

²³Yaku palatikanggene sasaibino Konaukum, Kona parentah-parentah aki kutabaakene.

²⁴Yana toiyo baikon yaku akiyo kososiboliino tukon dedeenggene kobutonggu luwedoi kasalahan.

²⁵Maka ko TEMENENO balase daku kokubai mokana sabab Yana toiyo akiyo dakusalah.

²⁶TEMENENO, Ikoo totobos doi mian mototobos tukon monondok doi mian momonondok.

²⁷Doi mian momoliyous Ikoo okitakane kobuto-Mu moliyous, bai Ikoo musuwo komian molokis.

²⁸Ikoo salamatene komian mopependeyo konoano; bai Ikoo kuasaiyo komian mosombong.

²⁹Ikoo suwayo dakuposi; TEMENENO ku Mian Bisa talaangiyo daku kalipookanan.

³⁰Ikoo kabukuanggene yaku sulano kuakabuse komusuh; tukon ko Mian nabantuan yaku manase konapoo bataanggonan.

³¹Ko Mian Bisa nakokubai talakana, ko TEMENENO naperjanjian moola nainangga! Yana buno tombide tuuk sasaibino komosoop doi Yana.

³²Sabab tolongo TEMENENO kai ko Mian Bisa Mian Bisa tolong komo belayo kita.

³³Yanamokai ko Mian mokabukuanggene yaku tukon kubaiyo aman daku loloon.

³⁴ Yana keenggele koainggu buno donga aino, tukon dagaiyo daku kasalamatan doi lipu mobunggukon.

³⁵Yana latiaku sulano kupolobosi, sampe yaku moola mabanaton panah batango momoongol tuuno.

³⁶TEMENENO, Ikoo lindungiyo tukon salamatene yaku, tukon tomboniyo yaku tukon Mukuasa yaku teali pandoi sabab Mutindakano.

³⁷Ikoo dagaiyaku sulano naaki kutinawan tukon yaku aki kubiasa otuwong.

³⁸Kulelenggene daku musuh tukon kulungguiyo yanila, tukon aki kubangabalinggon sampe yanila silaka.

³⁹Kutikakene yanila sampe akimo nabangun koidan, yanila tolubang akiyono konadaya doi ainggu salaano.

⁴⁰Ikoo beenggu bukuanan tuuk polobosian tukon manaangan luwedoi kumusuh-musuh.

⁴¹Ikoo kubaiyo daku musuh-musuh dampas luwedoi yaku, yaku akabuse komian-mian momosikitene yaku.

⁴²Yanila nggeleamon, bai akiyo komo tulungiyo, yanila masadai doi TEMENENO, bai yana aki natimbiliyo.

⁴³Yaku manase yanila buno ambata momalapaas, tukon yaku sasapuwo buno lapetak doi loloon.

⁴⁴Ikoo osodiiyo yaku luwedoi mondopulian molokis, tukon tealikene yaku mobalakuasa doi bangsa-bangsa; bangsa-bangsa moaki kutingoniiyo teali kuata.

⁴⁵Komian-mian mosangalaasan tunduk doi yaku, tukon taat kalu longoliyo daku parentah.

⁴⁶Konapoo baranian lapuso; yanila mbombokon tukon sumbut luwedoi nabenteng.

⁴⁷Tubo ko TEMENENO! Nggaalekai komo belayo yaku! Kabasalekai ko Mian Bisa nababasalan, mosalamatene yaku!

⁴⁸Yana beenggu kamanaangan luwedoi kumusuh, Yana lungguiyo kobangsa-bangsa doi salaanggu.

⁴⁹Yana salamatene yaku luwedoi kolawan-lawan. TEMENENO, ikoo beenggu manaangan luwedoi kumusuh, Ikoo dagaiyo yaku luwedoi mian-mian molokis.

⁵⁰ Maka kukabasale Ikoo doi antara bangsa-bangsa, tukon kumananikene kongganggaalano Ikoo.

⁵¹Ko Mian Bisa beena kamanaangan mobabasal doi natomundo, Yana sidutu mamaasikene konamian linilik, doiyamo Daud tukon nakaturunan tuuk sidutu-posidutukon.