Read Banggai 2 SAMUEL 23 Bible Online

2 SAMUEL 23 - Banggai bible

2 SAMUEL 23

¹Daud Isai napau linilik teali tomundo tukon Yakub na Mian Bisa kubaiyo teali mian babasal. Yanamo koidan komo karange konyanyian-nyanyian tuuk doi Israel. Naiyamo Daud nabantilan doibundu:

²Ko TEMENENO na Roh molapamo bantile mololoi doiyaku; konateteba tukon Naamanat daano doi suunggu bibilo.

³Yakub na Mian Bisa lapamo basilingan; komo lindungiyo ko Israel bantil doiyaku; “Tomundo momemerintah rayat tukon kaadilan mokatuaiyo tukon nataatan doi TEMENENO.

⁴Yana buno oloyo panano momadialan doi dodowa soono tempo timbu namadialanan. Yana buno oloyo panano doi nalapaan koudan kubaiyo kobulung momanampal monondok montontilang.”

⁵Bunomokai doiya ko Mian Bisa nabalakaatiyano dakukaturunan, konaperjanjian doiyaku aki nabolii, Konaperjanjianoo posidutukon tukon talakana, tangatur doi sasaibino kolangge. Ko Mian Bisa beenggu kamanaangan tukon daanokene sasaibino dakumongiasan.

⁶Bai komian moaki nataatiyo ko TEMENENO bunokai sonit mosinakukon. Komian limano aki namoola na taaniyo;

⁷mau meeng komian akiyo komo singgile kalu aki napake pakakas moluwedoi kayung kai besi. Domian-mianoo kabus aung nasuayo.

⁸Naiyamo Daud nasuludadu kapalano sambuno mominotonanggon: Kotumbeno doiyamo Ishbaal, Hakmoni miano, mokatuaiyo “Kolompok Kotoluno” (Triwira). Biasamo doi meeng kopolobosian lalomo yana lawane koalu kosakato komian tukon akateyo yanila sasaibino tukon napandong.

⁹Mian koluano doi Triwiradoo doiyamo Eleazar Dodo napau luwedoi Ahohi pulino. Yana lolainge Daud salataa yanila sasalaane ko Filistin miano mopototongimo sulano napolobosi. Maka doi tempo ko Israel napasukan nabangabalinggonan,

¹⁰Eleazar banggadudul kakaate moakabuse ko Filistin miano sampe yana pakadako tuuno. Tidolo kolimano tobikon yana aki namoola sodiiyo konasabel. Doioloyodoo ko TEMENENO beena kamanaangan mobabasal doi Israel. Ko Israel napasukan mobudodoo mobangabalinggono abali doi Eleazar natampat polobosian, maka bukayo dobajan-bajanoo napakean polobosian idoo.

¹¹Komian kotoluno doi Triwiradoo lalomo doiyamo Sama Age napau luwedoi Harari. Biasa doi tempodoo ko Filistin miano pototongi doi Lehi, doi meeng koasi momoono kacang memela, ko Israel napasukan dampas luwedoi Filistin miano.

¹²Bai Sama tataap polobosi, mangakate tukon lungguiyomo ko Filistin miano, sampe moola napalataanggene doasidoo. Bunomo doiya ko TEMENENO nabeekanano komanaangan mobabasal.

¹³Doi oloyo bailon naloolanian kolounu bapupuiyan tolu komian luwedoi tolu kolono Daud nasuludadu kapalano momatailukon tokolu doi Leeng Adulam. Tempodoo Daud daano doi bentengoo lalomo doi leengoo. Ko Filistin miano basandung doi Refaim Pepelakono, tukon luwedoi yanila napasukan dudukiyomo ko Betlehem.

¹⁵Daud neneekemo kona kampung susuungo tukon bantil, “Ah, kalukai yaku binee monginum paisu luwedoi bubung moloolani kotataapon babasal doi Betlehem!”

¹⁶Lengele doiya dosuludadudoo motoluila usokiyomo ko Filistin miano nabasandungan maka matauk paisu luwedoi bubungoo, doibundu binabakono Daud. Bai Daud aki naiyase momonginum, baimo yana kundange salaku sosubakon doi TEMENENO.

¹⁷Yana bantile, “Oh TEMENENO, yaku aki kumoola monginum napaisu nia! Kalu yaku monginum, bunomokai yaku moinume komian-mian bataanggene kobutongo!” Jadi Daud bisakai moaki naiyase monginum dopaisudoo. Doiyamo domianoo motolu najasa-jasa mobarani berjuang.

¹⁸Tolukolono kosuludadu kapalano mominotonanggonoo sinombuikon koidan, “Tridasawira”. Komo katuaiyo yanila Abisai Yoab utuso pioto, Zeruya napau. Yana biasa mangakate tolu kosakato komian tukon napandong. Tobikon doiya yana teali minotonanggon. Bai yana aki nahebat buno “Triwira”.

²⁰Meeng kosuludadu kapalano bailon mominotoonanggon doiyamo Benaya Yoyada napau Kabzeel miano. Yana barani tuuno. Lua kotalenga mobabasal mo luwedoi Moab yana akateyomo. Biasamo doi meeng kooloyo mokoukoputon, yana usok doi meeng kobuang lalomo maka naakateyo komeeng kosinga idoo.

²¹Yana biasakai koidan akateyo komeeng ko Mesir miano, motambongan tukon konasenjata pandong. Benaya sasalaane yana tongo tukon natongkat. Pandong modaano doi Mesir mianodoo yana lambase maka yana pakeyo teali pangakate domianoo.

²²Doiyamo Benaya najasa-jasa, meeng komian moluwedoi “Tridasawira.”

²³Doi mianoo tambunoila doiyamo Benaya komo taangga, bai yana aki napokakana “Triwira”. Daud oduduke yana teali pololaing kapalano tuuk susuungo.

²⁴“Tridasawira” naangota-anggota doiyamo: Asael Yoab utuso pioto Elhanan Dodo napau Betlehem miano Sama tukon Elika Harod miano Heles Palti miano Ira Ikes napau Tekoa miano Abiezer Ananot miano Mebunai Husa miano Zalmon Ahohi miano Maharai Netofa miano Heleb Baana napau Netofa miano Itai Ribai napau Gibea miano doi Benyamin benseno nalipu Benaya Piraton miano Hidai Gaas Pepelakono miano Abialbon Araba miano Azmawet Bahurim miano Elyahba Saalbon miano Yasyen napau-pau Yonatan Sama Harari miano Ahiam Sarar napau Harari miano Elifelet Ahasbai napau Maakha miano Eliam Ahitofel napau Gilo miano Hezrai Karmel miano Paerai Arbi miano Yigal Natan napau Zoba miano Bani Gad miano Zelek Amon miano Naharai Beerot napau, Yoab napakanggi sinapan Ira tukon Gareb Yetri miano Uria Het miano Sasaibino tolu kolono p(...)