Read Banggai 2 SAMUEL 24 Bible Online

2 SAMUEL 24 - Banggai bible

2 SAMUEL 24

¹Ko TEMENENO nggimoliiyo koidan ko Israel, maka Daud inoluuli konamaksud linubaton kosusaan doi bangsadoo. TEMENENO bantile doi yana, “Kubaiyomo kotulisiyano komian doi Israel tukon Yehuda.”

²Maka bantilokai Daud doi Yoab nasuludadu talengano, “Tausokai polaing kosuludadu kapa-kapalano doi sasaibino ko Israel benseno posaapon kotano sulano nakubaiyo kobangaitan. Yaku yase toiyo yanila nakadaang.”

³Bai Yoab bantile doi tomundo, “Boliisi Tuan na TEMENENO Mian Bisa nakadaange ko Israel miano sampe sakat luungon paku luwedoi yanila nakadaang diabudodoo, tukon boliisi Tuan nadaano motubo sulano namoola kitayo. Bai oila konatotuuk tuan mokandatiyo nabangaitan nia?”

⁴Bai tomundo tataap taaniyo dona pinarentakondoo. Jadi Yoab tukon sasaibino konasuludadu kapalano taus sulano naaite kobangsa Israel.

⁵Sambuno lapa pintosiiyo ko Yordan Paisunobatango, Yoab tukon nasuludadu mokubai sandung taalikon lalom ko Arorer, meeng kokota doi Gad nalipu pepelakono tanga-tangano. Luwe idoo yanila taus taalikon doi lembet, doi Yaezer,

⁶maka banggadudul doi Gilead tukon doi Kades doi Het miano nalipu. Lapa doiya yanila badombalaakon doi Dan, maka luwedoi Dan lias taalikon doi talise, badombalaakon doi Sidon.

⁷Luwe idoo yanila taus taalikon lalom badombalaakon doi Tirus kota modaano kobentengo. Yanila taus koidan doi sasaibino ko Hewi miano nakota tukon Kanaan miano, tukon doibundu badombalaakon doi Bersyeba, taalikon lalom ko Yehuda.

⁸Yanila ombokoniiyo posaapon kotano siyo kobituwon lalomo tukon lua kolono kooloyo. Sambuno lapa doiya yanila abalimo doi Yerusalem

⁹tukon pelenggene doi tomundo dobangaitanoo hasilo. Komala-malane nakadaang manurut syarat sulano nateali suludadu daanoon 800.000 komian doi Israel tukon 500.000 komian doi Yehuda.

¹⁰Bai sambuno lapa Daud aite dobangsadoo, yana toupiyomo mosalah, maka nabantil doi TEMENENO, “Oh TEMENENO, yaku baladosamo tuuno! Ompuniyomo yaku, sabab dakukokubaidoo longas tuuno.”

¹¹TEMENENO bantile doi Nabi Gad mo potaamikene Daud tukon TEMENENO, “Tauso tukon bantile doi Daud baikon yaku beekene doi yana tolu konalinilik oilamo tolong konalinilik naikon kulakukene.” Modoakon kooloyono, sambuno lapa Daud bangun doi namooloan,

¹³Gad lubat momangadap tukon popitoikene doi yana ko TEMENENO naparentah, konabantilano, “Yaando Tuan nalinilik. Tanonia linupa silakaan malaalan tolu kotaun konakalumbit, kai Tuan dampas linololonggon musuh tolu kobituwon konakalumbit, kai natano nia kanakon tia mallas tolu kooloyo konakalumbit? Putusiyomokai diabudodoo oila komo sio kupelenggene doi TEMENENO.”

¹⁴Daud timbiliyo, “Aduh! Yaku silakamo! Bai kalubaino banggapi komo hukumaku, tadukai TEMENENO komo hukume kita sasaibino, sabab babasal konamaasi tukon Naseang.”

¹⁵Maka ko TEMENENO lubatene kopanakit tia mallas doi Israel miano tambuun luwedoi dodowasoonodoo polong doi tempo molapamo yana tataapkanggene. Doi posaapon ko Israel 70.000 komian momate.

¹⁶Ko TEMENENO namalaekat mobabayo komateanoo polongo doi Arauna natampat batudongiiyan gandum, Yebus miano. Salataa TEMENENO kitayo baikon domalaekatoo sadiamo tuuk momanase ko Yerusalem, ko TEMENENO boliiyo konakaputusan, tukon yana tade moukume dobangsadoo. Yana bantile doi malaekatoo, “Sabemo! Tade!”

¹⁷Daud kitayo domalaekatoo modaanoon moakateyo dorayatoo, maka yana bantile doi TEMENENO, “Yakumo komo baladosa sabab yaku komo kubaiyo dokulokisanoo. Bai oila konasalah dobangsadoo mosoe? Ukumemo yaku tukon dakukaluargaa!”

¹⁸Doi oloyodoo koidan Gad lubat mangadap doi Daud tukon bantile doi yana, “Siokai Tuan naliba doi Arauna natampat batudongiiyan gandum, tukon kekendenge kobalabaan tuuk doi TEMENENO.”

¹⁹Maka lenggeto Daud pokokonoi tukon TEMENENO naparentah mopinolonggon doi yana mololo doi Gad.

²⁰Pododuang Arauna daanoon mombaleng doi bilit, tukon nakitayo kotomundo tukon sasaibino komo lolainge lubat doi yana. Arauna somba doi Daud salaano,

²¹tukon masadai, “Oila konamaksud Tuan molubat?” Daud timbiliyo, “Tuuk mooliyo natampatia batudongiyan gandum, yaku naikon mokokondong dimbaa balabaan motuuk doi TEMENENO, sulano napanakit tia mallas nia natade.”

²²Arauna bantile, “Alayomokai Tuan, tukon sosubakene doi TEMENENO oila komo Tuan morasayo monondok. Naiya saapi-saapi nia tuuk sosubakon mosinua tukon tuuk kayung posuano Tuan namoola pakeyo kobajak tanggeno tukon batudongiiyan gandum dopi-dopino.”

²³Sasaibino doiya Arauna beekene doi tomundo, tukon bantile, “Boliisi Tuan na TEMENENO Mian Bisa natalimayo Tuan nasosubakon.”

²⁴Bai tomundo timbiliyo, “Inai! Yaku yase mooliyo. Yaku aki kuiyase mososubakon doi TEMENENO ku Mian Bisa lobo kulinaat moaki kupakadakene.” Maka Daud mongoli tampat batudongiiyan gandum tukon do saapi-saapidoo tukon koanggano lima kolono kodoy perak.

²⁵Maka Daud kekendenge ko balabaan idoo tuuk TEMENENO tukon mososubakon sosubakon mosinua tukon sosubakon paladamean. Ko TEMENENO talimayo Daud nasambeang, maka akiyono dopanakit tia mallasoo doi Israel.