Read Banggai 2 SAMUEL 4 Bible Online

2 SAMUEL 4 - Banggai bible

2 SAMUEL 4

¹ Saul nakatulunan bailon doiyamo Mefiboset, Yonatan namalane. Konalematan salataa sodo lima kotaun konaumur, doiyamo salataa Saul tukon Yonatan mate. Sabab doi tempo ko bilita konapo matean kaliangano lubat luwedoi kota Yizreel, kotinano tubo mopialayo Mefiboset lapine yana maka dampas; bai sabab boinedoo todudul bangosinggaang maka dopaudoo tuwong tobikon nateali lemat. Salataa Isyboset Saul namalane lengele baikon Abner inakatemo doi Hebron, akiyono konasamangat, tukon sasaibino ko Israel miano teali matakut. Isyboset daano kolua konasuludadu kapalano mokapalaiyo kopasukan polobosian; komeeng kosambuno Baana, komeeng komian koidan kosambuno Rekhab. Yanila Rimon napau, luwedoi Beerot moluwedoi Benyamin nabenseno. (Beerot tongusokon Benyamin nalipu. Kotumbuno tuuno dambasenemo kobutongo doi Getaim dungol indaa mulaimo doiya kotempono.)

⁵Lua dosuludadudoo kapalano, doiyamo Rekhab tukon Baana taus doi Isyboset nabonua tukon polong idoo suuno kooloyo, doi tempo Isyboset daanoon mobalasanaang oloyo.

⁶Koboine padagai bonua yana pipiito doi nadaanoan mobabilisii gandum, maka moolomo. Tobikon doiya Rekhab tukon Baana usok.

⁷Yanila banggadudul usok doi Isyboset nadaanoan momoolo tomboosokon, maka napoo tebeke yana pomatekon. Yanila patele kooluno tukon babayomo taus. Meeng kopopook yanila ampakon loloiyo ko Yordan peako.

⁸Doibundu yanila salakanggene doi Isyboset olunodoo doi Daud doi Hebron tukon bantile, “Naiyamo Isyboset oluno Saul namalane, Tuan namusuh mokakaate mosio naakateyo Tomundo. Oloyo nia ko TEMENENO balesemo Saul nakokubai tukon nakatulunan tuuk doi Tuan.”

⁹Bai Daud timbiliyo, “Ko TEMENENO motubo, molapamo salamatene yaku luwedoi sasaibino kosilakaan, toiyo baikon daku binantil nia naikon bisa.

¹⁰ Salataa doi Ziklag daano komian mobontiikene doi yaku Saul namatean kaliangano, inaanggon baikon yana mababa bilita momonondok. Bai yaku lapamo lakeyo yana tukon akateyo. Doiyamo kotambono yaku mobeekene doi yana salaku posoboli dobilitadoo yana mobabayo.

¹¹Lobian kona babalatan koidan koukuman yaku mobeekene doi mian molokis molapamo akateyo komian moakiyo konasalah tukon daano moolo doi nabonu susuungo! Diabudodoo yaku tuntute koposobolino doikoo domu mangakateanoo tukon akabuse komuyu luwe naibuta nia bunggono!”

¹²Sambuno lapa doiya Daud maparentahkene doi nasuludadu sulano naakateyo Rekhab tukon Baana. Sambuno lapa inakate, kolimanoila tukon aino pinotoli maka iniison doi naloolanian kodolaak. Bai doi Isybosetoo oluno inala tukon tinadin doi kotadoo koidan doi abner kibulo lalomo.