Read Banggai 2 SAMUEL 6 Bible Online

2 SAMUEL 6 - Banggai bible

2 SAMUEL 6

¹Doibundu Daud monguang koidan kosuludadu-kosuludadu momonondok doi Israel sulano napototongi, konakadaang 30.000 komian.

² Yanila kinatuai mopakatuuwo ko Baare-Yehuda, sulano napoo alayo luwe indaa ko Peti Perjanjian mosinombuikon tukon TEMENENO sambuno Mo Balakuasa moosulang doi kerub-kerub bunggono.

³ Do Peti Perjanjianoo inala luwedoi Abinadab nabonua doi bunggul bunggono tukon linibakon doi lodadoo moboolu lalomo. Maka Uza tukon Ahio, Abinadab napau-pau polainggene dolodadoo; Uza ampakon doi bibilo,

⁴tukon Ahio ampakon doi salaano.

⁵Daud tukon sasaibino ko Israel miano ampakon doi Petidoo salaano tukon osu-osuleng kokobukuan tukon mana-manani tuuk odotiiyo ko TEMENENO. Yanila maenggene kokasapi, gambus, rebana, kelentingan, tukon simbal.

⁶Salataa yanila polong doi batudongiiyan gandum Nakhon koona, kosaapi-saapi motandane dolodadoo tolodumbak, maka Uza ulule kolimano tukon taaniyo do Petidoo Perjanjian sulano naaki naotuwong.

⁷Doi tempodoo koidan ko TEMENENO Mian Bisa nggimoliiyo Uza, sabab dona kokubaidoo mobuno pokakana mototulaiyo ko TEMENENO. Uza inakate doi tampatoo, loolani doi Peti Perjanjian.

⁸Maka tambuun doi tempodoo dotampatoo sinombuikon Peres-Uza. Daud nggimal sabab TEMENENO akabusemo Uza.

⁹Bai Daud matakut koidan doi TEMENENO tukon bantile, “Diabudodoo bulaandomo do Peti Perjanjianoo namoola kukanggiyo?”

¹⁰Tobikon doiya yana aki nayase koidan babayo ko Peti Perjanjianoo doi Yerusalem, bai tolongo yana abese doi Obed-Edom Gat miano nabonua.

¹¹ Do Peti Perjanjianoo inotinggal idoo tolu kobituwon konakalumbit, tukon TEMENENO balakaatiyo Obed-Edom tukon nakaluargaa.

¹²Tomundo Daud lengele baikon ko TEMENENO balakaatiyo Obed-Edom nakaluargaa tukon sasaibino konalobo sabab Peti Perjanjianoo. Maka yana taus doi Obed-Edom nabonua, yana alayo do Petidoo tukon biyele doi Yerusalem tukon balamean babasal.

¹³Salataa komian mobingkate do Peti Perjanjianoo noomo luunggon nalaakon, Daud sumboliiyo yanila natade. Maka yana sosubakene kona sosubakon doi TEMENENO, doiyamo saapi langgilo tukon saapi napau momalanak.

¹⁴Doibundu Daud osu-osuleng tukon laba tuuno tuuk odotiiyo ko TEMENENO. Doi tempodoo yana tolongo mapake toik lenan mopalus mobinoboikon doi oako.

¹⁵Bunomodoiya Daud tukon sasaibino ko Israel miano napobiyolano do Peti Perjanjianoo doi Yerusalem, linoolaing kokuweisan tukon torompet mobulungan.

¹⁶Salataa Petidoo daano binaba usok doi kota lalomo, Mikhal Saul naboine mbalenge luwedoi lolombong maka kitayo Tomundo Daud moosu-osuut tukon osu-osuleng tuuk odotiiyo ko TEMENENO, tukon Mikhal lasayo adukon toluwe kitayo Daud.

¹⁷Do Peti Perjanjianoo inabos doi natampat doi sandung lalomo molapamo Daud pasange tuuk do Petidoo. Doibundu Daud sosubakene kososubakon mosinua tukon sosubakon podamean doi TEMENENO.

¹⁸Maka yana balakaatiyo ko Israel miano tukon TEMENENO Mo Balakuasa sambuno.

¹⁹ Doibundu obo-obosikene kokinaan doi yanila sasaibino. Sasamba komian modaano idoo mau mala-malane maukai boine yana beena meeng kopatolo kosail motinapa, roti tukon Kismis kukiso. Sambuno lapa doiya yanila sasaibino mulemo doi nabonua suwe-suwele.

²⁰Doi tempo Daud mule doi nakamali tuuk mobee salam doi nakaluargaa, Mikhal tobuat mondobotiyo Daud tukon bantile, “Oloyo nia Tomundo Israel tutuu kubaiyo kobutongo tongodotii! yana balalaumo buno mian longas moaki natoiyo komaa doi sasaibino kopagawe kamali nalabuk-labuk molukono salaano!”

²¹Daud timbiliyo, “Yaku osuleng tuuk odotiiyo ko TEMENENO, molapamo tolayo kotamamu tukon nakaluargaa, maka lilike yaku teali katuaiyo ko Israel, miannoo. Tobikon doiya yaku naikon banggadudul moosuleng tuuk odotiiyo ko TEMENENO.

²²Tukon yaku balasadia tinotulai lobian luwedoi mobudodoo. Moolakai naaki muodotiiyaku, bai kolabuk-labuk ikoo mobantile budodoo, naikon odotiiyaku!”

²³Mikhal, Saul naboinedoo akimo namosuung pau polong pomatekon.