Read Banggai 2 SAMUEL 7 Bible Online

2 SAMUEL 7 - Banggai bible

2 SAMUEL 7

¹Ko TEMENENO lindungiyo Tomundo Daud luwedoi sasaibino komusuh nabanggabutan, tobikon yana moola tataap doi nakamali lalomo.

²Maka bantilo ko Tomundo doi Nabi Natan, “Kitayo, yaku nia dungol doi kamali mokinubai luwedoi kayung kauwalu Libanon, baanggokai ko Mian Bisa na Peti Perjanjian tolongo inabos doi sandung lalomo!”

³Natan timbiliyo, “Lakukenemo sasaibino Tomundo naniat, sabab ko TEMENENO tulungiyo Tomundo.”

⁴Bai doi popokoo ko TEMENENO bantile doi Natan,

⁵“Tausokai tukon pelenggenekai doi Daud do-Ku peleleanidoo Kuteteba nia, ‘Bulaandokon ikoo momokubaiyanggu bonua.

⁶Salataa ko Israel miano Kukaluarano luwedoi Mesir polong diabudodoo, akiyoon Kumodungoli meeng kobonua, bai sidutu lausala tukon dungol doi meeng kosandung.

⁷Doi namalumbitan Daku lausalaan polaing ko Israel miano akiyoon nabiasa Yaku masadai doi katua-katua molapamo Kulilike, oila kosababpo moaki napomokokondong bonua moluwedoi kayung kauwalu Libanon tuuk Yaku.’

⁸Tobikon doiya, Natan, popitoikene doi Daud, do-Ku peleleani, baikon Yaku, TEMENENO Mo Balakuasa, bantile doi Yana, ‘Ikoo lapamo Yaku alayo luwedoi mubalimangan mototolian domba doi padang tukon Kuoduduke teali tomundo doi Israel.

⁹Yaku lolaingemo ikoo doi yaando tolong komu tausan, tukon sasaibino komumusuh lapamo Yaku akabuse doi tempo mumolobosian. Yaku naikon tealikene ikoo bunokai katua-katua mobabasal tuuno doi dunia.

¹⁰Koidan kai, tuuk kumian Israel lapamo Kusadiayo konatampat tukon Kusumboliyo yanila natataap idoo sulano yanila namalaat tuboan motanaang, aki nangginabut koidan. Salataa napoo lubatan looluk naibuta nia, tukon Yaku mongoduduk katua-katua tuuk yanila, komian badaang moyase kokulokisan lobosiyomo yanila, bai dolanggedoo aki naikon nateali koidan. Yaku paladandi baikon ikoo naikon aman luwedoi sasaibino komusuh, tukon Yaku naikon beena katurunan doi komuyu.

¹²Naikon, kalukai laatemo komumatean, tukon ikoo kinibul doi tumbumu nakinibulan, meeng komian luwedoi mumalane naikon kuoduduke teali tomundo. Yanamo naikon komo kekendenge Dakubonua. Yaku naikon keenggele konabatomundoan tukon tuuk sidutu posidutukon meeng komian konakaturunan naikon mamarentah salaku tomundo.

¹⁴ Yaku naikon teali tamano tukon yana naikon teali Kumalane. Kalukai yana mokubai salah, yana naikon Kuukume buno meeng kotama moukume konapau.

¹⁵Bai Yaku naikon tataap mokubai monondok doi yana pololoi tukon Kuperjanjian. Dakuperjanjian doi yana naikon tataap Kutaniano, aki nabuno Daku linakukanggon doi Saul molapamo Kukaluare luwedoi nabasambuan sulano mumoola teali tomundo.

¹⁶Ikoo naikon sidutu daano komu katurunan, tukon Yaku naikon kubaiyo komubatomundoan natataap sidutu-posidutukon. Tuuk sidutu-posidutukon daano komeeng komian moluwedoi mukaturunan naikon memerintah salaku tomundo.’ ”

¹⁷Maka Natan popitoikene doi Daud sasaibino komolapamo Mian Bisa okitakene doi yana.

¹⁸Maka Tomundo Daud usoko doi TEMENENO Na Sandung lalomo. Yana osulang tukon sambeang, “Oh TEMENENO Modoi Nakinatandakan, yaku tukon kukaluargaa aki nateali talimayo sasaibino komondokan Ikoo motudoikene doiyaku namalumbitan nia.

¹⁹Tukonkai Ikoo mokubai lobian doiya, oh TEMENENO Modoi Nakinatandakan; Ikoo lapamo mokubai perjanjian kaliangano doi kukaturunan tuuk tempo naikon molubat. Tukon ikoo okitakene dolanggedoo doiyaku, maukai yaku tolongo bangkapi, oh TEMENENO Modoi Nakinatandakan!

²⁰Oilanokai komo moola kubantile doi Komuyu? Ikoo toiyo sasaibino Komu peleleani nia kaliangano.

²¹Tolongo Muperjanjian tukon Mumongiasan susuumu Ikoo lakukene kokokubai-kokubai mobabasaloo tuuk otunggule Namu peleleani nia.

²²Ikoo babasal tuuno, oh TEMENENO Mian Bisa! Tolongo Ikoo ko Mian Bisa, akiyo komo pokakana tukon Ikoo. Kami toiyo dolanggedoo sabab lapamo pinopitoikon doi lolukoo.

²³Doi posaapon kodunia akiyo kobangsa mobuno Israel. Ko Israel doiyamo meeng kobangsa molapamo Ikoo olupute luwedoi nainataiyan tuuk teali Mumian susuu-Mu. Sasaibino kokokubai mobabasal tukon mominasaindinggon Ikoo molakukene doi yanila, kubaiyo kosambumu tololongol doi posaapon kodunia. Komian-mian bailon tukon napoo ilah-ilah lapamo Yaku siikayo doi tempo komu mian napolobosian.

²⁴Ko Israel miano lapamo Ikoo tealikene Mumian susuu-Mu tuuk sidutu-posidutukon, tukon Ikoo oh TEMENENO, teali yanila na Mian Bisa.

²⁵Tukon diabudoo, oh TEMENENO Mian Bisa, moolakenekai mukeenggele tuuk sidutu-posidutukon koperjanjian Ikoo mobantile doiyaku tukon kukaturunan. Moolakenekai mulaksanakanggene oila do-Mu pinaladandikonoo.

²⁶Doiyayaa komian naikon sidutu kabasale kosambu-Mu tukon bantile, ‘Ko TEMENENO Mo Babasal konakuasa doiyamo Mian Bisa doi Israel.’ Maka tuuk sidutu posidutukon daano komeeng komian moluwedoi kukaturunan naikon momaparentah salaku tomundo doi bangsa nia.

²⁷Ko TEMENENO Mo Babasal konakuasa! Yaku baranikene kobutonggu mopelenggene Daku sambeang nia doi-Koo, sabab Ikoo susuu-Mu lapamo popitoikene doiyaku baikon dakupau tumbu potutuundu konaturunan Ikoo tealikene tomundo doi bangsa nia.

²⁸Oh TEMENENO Modoi Nakinatandakan, Ikoomo ko Mian Bisa: Ikoo tapaatiyo sasaibino Komuperjanjian, tukon langge momonondokoo lapamo Ikoo dondiikene doiyaku.

²⁹Tobikon doiya yaku kabiyo, yasemo mubalakaatiyo daku katurunan sulano yanila sidutu-posidutukon natataap toupiyo ko Museang. Oh TEMENENO Modoi Nakinatandakan, sasaibino doiya lapamo Ikoo dondiikene, maka daku katurunan naikon tataap Ikoo balakaatiyo tuuk sidutu-posidutukon.”