Read Banggai 2 SAMUEL 8 Bible Online

2 SAMUEL 8 - Banggai bible

2 SAMUEL 8

¹Bubula kotempo doibundu Tomundo Daud lobosiyo koidan ko Filistin miano. Yana lungguiyo yanila tukon lambase konapo buta.

²Daud koidan lungguiyo ko Moab miano. Yana sumboliiyo yanila moolo doi buta, maka akateyo lua komian doi sasamba kona toluan komian. Jadi, ko Moab miano takluko doi Daud tukon babeal lulu doi yana.

³Tukon koidan Daud lungguiyo ko Tomundo Hadadezer Rehob napau momemerintah doi Zeba, doiyamo meeng kobatomundoan mololani ko Damsyik. Doi tempodoo Hadadezer daano doi naambakonan lalomo sulano naatasiyo konakakuasaan doi nalipu lolani ko Efrat Paisunobatango oluno.

⁴Daud tawane ko 1.700 komian kosuludadu molakit adalan 20.000 komian kosuludadu moampakon ai-ai. Yana kubaiyo lemat sasaibino koadalan alaasene kosoobos motongo tuuk sakat koloda polobosian.

⁵Ko Siria miano moluwedoi Damsyik utuse konasuludadu sulano natulungiyo ko Tomundo Hadadezer. Bai Daud lungguiyo yanila tukon akateyo ko 22.000 komian luwedoi yanila.

⁶Doibundu Daud mokokondong suludadu nasandung-sandung doi napoo wilayah lalomo, tukon yanila takluk tukon babeal lulu doi yana. Ko TEMENENO beekene kokamanangan doi Daud yaandomo kona polobosian.

⁷Kololonggu-lolonggu mosoni Hadadezer nasuludadu mopakeyo Daud lambase tukon babayo doi Yerusalem.

⁸Sangalaasan doiya Daud koidan alayo konapoo tambaga badaang tuuno moluwedoi Betah tukon Berotai Hadadezer nakota-kota kinuasai looluk.

⁹Tomundo Tou moluwedoi Hamat ndongoliiyo baikon Daud lapamo lungguiyo sasaibino Hadadezer nasuludadu.

¹⁰Maka yana bintekene konamalane Yoram sulano napelenggene kosalam doi Tomundo Daud tukon mabantilan-bantilan salamat doi nakamananganoo, sabab Hadadezer biasamo mopolobosi tukon Tou. Yoram lubat doi Daud tukon makanggi badaang kohadia luwedoi mosoni, suasa tukon tambaga.

¹¹Tomundo Daud sosubakene sasaibino dohadiadoo doi TEMENENO sulano napinake bakolobokiyan doi kaledaan lalomo. Bunomodoiya koidan konalakukanano tukon lolonggu-lolonggu mosoni tukon suasa molapamo yana lambase luwedoi Hadadezer tukon bangsa-bangsa yana molungguiyomo; doiyamo bangsa Edom, Moab, Amon, Filistin tukon Amalek.

¹³ Daud sambuno tealimo tololongol tuuno koidan salataa yana abali doi nalapaan akateyo ko 18.000 ko Edom miano doi Asin Peako.

¹⁴Yana kekendenge kosuludadu nasandung-sandung doi posaapon ko Edom, tukon do Edomoo miano takluuko doi yana. Ko TEMENENO beena kamanangan doi Daud doiyayaando konapolobosian.

¹⁵Bunomokai doiya Daud namemerintaan posaapon ko Israel tukon dagaiyo sulano konamian nasidutu linakukanggon tukon adil tukon monondok.

¹⁶Naiyamo kosambu-sambu motatandak Daud mooduduke: Suludadu Talengano modaano konasinapan: Yoab Zeruya napau; Dulutulis doi kamali: Yosafat Ahilud napau; Imam-imam: Zadok Ahitub napau tukon Ahimelekh Abyatar napau; Dulutulis negera: Seraya

¹⁸Tomundo napadagai kapalano: Benaya Yoyada napau; Imam-imam doi kamali: Daud namala-malane.