Read Banggai 1 TOMUNDO-TOMUNDO 1 Bible Online

1 TOMUNDO-TOMUNDO 1 - Banggai bible

1 TOMUNDO-TOMUNDO 1

¹Diabudodoo Tomundo Daud motuamo tuuno. Maukai nalinunguti tukon toik mobondolong, bai yana tataap mokumelon.

²Tobikon doiya sasaibino konapagawe bantile, “Komo Mulia, konamonondokan tadukai mai moumboliikene Tomundo komeeng kopau boine sulano nadungoliyo tukon nakalensange Tomundo. Boinedoo naikon pokooloi tukon Tuan sulano Tuan nalasayo momatalanas.”

³Maka yanila moumboliikene meeng kopau boineno mo tambongan doi posaapon ko Israel. Daidanggon doi Sunem maka napososuunggene komeeng koboine motambongan tuuno kosambuno Abisag. Yana binabakono doi tomundo Daud, maka yana dungoliyomo doi tomundo Daud tukon kalensangemo. Bai doi tomundo Daud aki nakooloiyo dopauboinedoo.

⁴

⁵ Sabab Absalom matemo, maka Adonia, Daud namalane koluano tealimo langgongo. Kotinano kosambuno Hagit. Adonia meeng komalane motambongan. Kalu yana daano konasalah kotamano aki nanggimoliiyo. Tukon yana yase tuuno moteali tomundo, tobikon doiya yana masadia moi-moiya koloda polobosian tukon suludadu momapake adalan tukon lima kolono konapadagai.

⁶

⁷Maka yana ampakono mopopikili tukon Yoab maka Imam Abyatar. Yoab tinano kosambuno Zeruya. Yoab tukon Imam Abyatar yanila pomeenggon modukunge Adonia nausaha. Yoab tukon Imam Abyatar satujuiyo Adonia nausaha.

⁸Bai Imam Zadok, Benya Yohada napau, Nabi Natan, Simei, Rei tukon tomundo Daud napadagai aki naala doi Adonia.

⁹Daano kooloyo meeng doi meeng kotampat mosinombuikon Batu Binda mo pkolanikon ko En-Rogel, idoomokai Adonia namososubakonan sosubakon tukon dona sinosubakonoo doiyamo domba, sapi langgilo tukon sapi napau momala-malanak. Tukon doiya kosinggato yana koloyo Tomundo Daud namala-malane bailon tukon pagawe-pagawe kamali moluwedoi Yehuda nabenseno sulano napolubat doi lameanoo basosubakonan.

¹⁰Bai koutuso piyoto Salomo, tukon Nabi Natan maka Benaya tukon Tomundo Daud napadagai aki nakoloyo.

¹¹ Sambuno lapa doiya Nabi Natan ampakono mopososuunggene Betsyeba, Salomo tinano, maka nabantile, “Oilamokai Tomundo naboloki akiyoon mulengele baikon Adonia, Hagit namalane molapamo oduduke kobutongo moteali tomundo, sabeakai Tomundo Daud aki namotoi oioila tentang doiya langgedoo?

¹²Kalu Tomundo naboloki yase sulano Salomo tukon Tomundo naboloki susuungo nasalamat, yaku otunggukene bunonaiya: Mosoisobiton mutaus tukon mumangadap doi Tomundo Daud,

¹³tukon pailukene doiyana bunonaiya: ‘Bolikonkai Tuan susuungo komo lapamo batotopi doiyaku baikon daku malane Salomo naikon komo teali Tomundo mosoboliyo Tuan? Budodoiya, bulaando Adonia komo teali tomundo?’ ”

¹⁴Natan nabantilano koidan, “Kalu andeno, daanoon Tomundo naboloki mopobasalitai tukon tomundo, maka nasodo naikon kuusok sulano kukokobukuanggene oilamo tomundo naboloki nabinantil.”

¹⁵Maka ampakonokai Betsyeba momangadap doi tomundo nakombiang lalomo. Doiya kosinggato Tomundo Daud motuamo tuuno, tukon Abisag, boinedoo moluwedoi Sunem, daanoon moleleaniyo yana,

¹⁶Betsyeba tootuku tukon sosuba doi tomundo salaano, maka tomundo Daud sadaiyo yana, “Oilamokai komu iniyas?”

¹⁷Maka Betsyeba natimbiliyo, “Tuan Mo Mulia, Tuan lapamo mobatotopi doiyaku tukon TEMENENO sambuno, Tuan na Mian Bisa, baikon daku malane Salomo naikon komo teali tomundo mosoboliyo Tuan.

¹⁸Bai budodoiya Tomundo aki natoiyo, baikon Adonia lapamo teali tomundo.

¹⁹Yana lapamo mososubakon badaang kodomba, sapi langgilo tukon sapi napau momala-malanak. Tukon doi nalameanoo lalomo yana koloyomo koidan Tomundo namala-malane tukon Imam Abyatar maka Yoab, Tomundo natalenga. Bai, yana aki nakoloyo Salomo.

²⁰Tomundo Mo Mulia, sasaibino korayat Israel daano mototi-totiiliyo Tuan nakaputusan indee naikon komo soboliyo Tuan tukon moteali tomundo.

²¹Kalu Tuan aki mubeekene dokaputusanoo, pasti kalu naikon Tuan matemo, yaku tukon dakumalane naikon kinubaimo salaku mian molokis.”

²²Daanoon Betsyeba mopobasalitai tukon tomundo Daud, sosinggoton Nabi Natan molubat doi kamali.

²³Maka nabinontiikon doi tomundo Daud tentang Nabi Natan molubat. Maka Betsyeba tobuato, tukon Natan usoko, maka natootuku tukon nasosuba doi tomundo Daud salaano.

²⁴Doibundu Natan bantile, “Tuan Mo Mulia, oilakai Tuan lapamo moumumkanggene baikon Adonia komo soboliyo Tuan tukon yana tealimo tomundo?

²⁵Doi oloyo nia koidan lapamo yana mososubakon domba mobadaang, sapi langgilo tukon sapi napau momala-malanak. Sasaibino Tuan namalane yana lapamo koloyo. Tukon koidan sasaibino Tuan nasuludadu talengano, tukon Imam Abyatar. Budodoiya yanila daano mobalame-lame tukon yana tukon yanila koku-kokuweis tukon konapoo bantilano, ‘Tubo Tomundo Adonia!’

²⁶Bai, yana aki nakoloyo yaku. Tukon Imam Zadok maka Benya polong Salomo bai aki nakoloyo.

²⁷Oilakai naiya Tuan komo sumboliiyo yana molakukanggene, tukon aki mupopitoikene doi sasaibino Tuan napagawe indee komo soboliyo Tuan?”

²⁸Doibundu Tomundo Daud bantile, “Uange Betsyeba.” Lapa doiya Nabi Natan tobuato tukon Betsyeba abalimo mousok koidan momangadap doi tomundo Daud.

²⁹Maka Tomundo Daud bantilemo doiyana, “Takainomo yaku lapamo moberjanji doikoo, tukon TEMENENO sambuno, Israel na Mian Bisa, baikon komu malane Salomo naikon komo soboliyaku moteali tomundo. Tobikon doiya, budodoiya nia yaku paladandikene doikoo tukon TEMENENO motubo, molapamo osodiiyo yaku doi sasaibino kosakisaawan, tobikon doiya doi oloyo nia koidan yaku pailukene doikoo baikon dakupaladandianoo yaku tapaatiyomo.”

³⁰

³¹Sambuno lapa Tomundo Daud mobantile bunodoiya maka Betsyeba tootukumo tukon sosuba maka nabantile, “Tubomokai Tuan Tomundo polong sidutu posidutukon!”

³²Maka Tomundo Daud monggiuanggene Zadok, Natan tukon Benya.

³³Salataa yanila lubat, tomundo Daud bantile doi yanila, “Pouangemo sasaibino daku suludadu sulano napoolubat polaing-laing daku malane Salomo. Alakitemo yana doi kukeledai, tukon babayomo yana doi Gihon paisuno matano.

³⁴Indaamo Zadok tukon Natan nakolobokiyano moteali tomundo doi Israel. Salataa nalapa doiya sio popuuke kotrompet tukon pokokuweis maka pobantile, ‘Tubo Tomundo Salomo!’

³⁵Doibundu pololaingemo yana moabali naimbaa sulano nakoisulongiiyo daku batomundoan, sabab yana lapamo kulilike teali tomundo mosoboliyo yaku sulano naparentahyo ko Israel tukon Yehuda.”

³⁶“Monondok, Tomundo Mo Mulia,” Benaya nabantilano, “boliisi ko TEMENENO, Tuan na Mian Bisa, naekeenggele doi Tomundo naparentahdoo.

³⁷Bulaando ko TEMENENO naloolaingano Tomundo, boliisi koidan yana naloolaingano Salomo. Boliisi ko TEMENENO nakubaiyo Salomo nabapamarentaan lobian kona monondokan tukon koona nabaparentaan.”

³⁸Sambuno lapa doiya Zadok, Natan, Benaya tukon Tomundo Daud napadagai sumboliiyomo Salomo molakit doi tomundo nakeledai, maka yanila lolaingemo yana moampakon doi Gihon paisuno matano.

³⁹Salataa yanila polong indaa maka Zadok mangalamo zaitun lisisono molapamo yanila babayo luwedoi TEMENENO Na Sandung, maka nakolobokiyo Salomo tukon pakeyo dolisisonoo. Yanila puukemokai kotorompet tukon sasaibino komian modaano idoo yanila kokuweis tukon napobantile, “Tubo Tomundo Salomo!”

⁴⁰Doibundu yanila sasaibino lolaingemo yana moabali tukon yanila koku-kokuweis tukon yanila puuke kosuling, tobikon doiya buno pokakana motabata kobuta sabab natodudulan lame.

⁴¹Sodo tolong nalapa Adonia tukon sasaibino kona mian kinolo mobalame-lame, yanila lengelemo domianoo mokoku-kokuweis. Salataa Yoab lengele kotorompet alalo, yana masadaimo, “Oilamo komo teali doi kota sampe lame tuuno?”

⁴²Akiyoon nalapa Yoab mobasalita, sosinggot lubat Yonatan, Imam Abyatar napau. Adonia bantile, “Mai usok.” “Ikoo mian momonondok, tantu komu binaba, bilita momonondok koidan.”

⁴³Yonatan timbiliyo, “Maaf, bolikon bilita momonondok,” maka nabantile koidan, “Tomundo Daud lapamo oduduke Salomo moteali tomundo!

⁴⁴Zadok, Natan, Benaya tukon tomundo napadagai yanila sinumboliimo moloolainge Salomo. Yanila alakitemo doi tomundo nakeledai,

⁴⁵tukon Zadok maka Natan lapamo kolobokiyo yana doi Gihon paisuno matano. Budodoiya yanila abalimo doi kota tukon koku-kokuweis molame, tukon posaapon kokota tumbuno teali pusing. Doiyamo doalaloo molame yanila molengele budodoo.

⁴⁶Budodoiya Salomo tealimo tomundo.

⁴⁷Tomundo Daud tukon koikoidan sasaibino kona suludadu kapalano ampakono momebee bantilan salamat doi Tomundo Daud. Boobus koidan yanila bantile, ‘Boliisi Tuan na Mian Bisa natealikene Salomo nalobian kona tololongolan tukon tomundo; boliisi Salomo nabasambuan nalobian kona monondokan tukon tomundo nabasambuan.’ Doibundu doi natampat mooloan Tomundo Daud tootuku sosuba tukon sosubaiyo ko Mian Bisa,

⁴⁸maka nasambeang konabantilano, ‘Tanggaalo Ikoo, oh TEMENENO, Mian Bisa ko Israel miano nasinosubai. Doi oloyo nia meeng komian moluwedoi kukaturunan lapamo Ikoo oduduke moteali tomundo mosoboliyaku. Tukon Ikoo lapamo mopataikanaku motubo sulano nadaanoon yaku momasakisii.’ ”

⁴⁹Sasaibino Adonia namian kinolo yanila matakuto, tukon yanila banggadudul mokokondong maka napoo ampakon, suwe-suwele mangala loloon susuungo.

⁵⁰Tobikon doiya Adonia matakutene tuuno doi Salomo, maka yana obulen doi TEMENENO Na Sandung tukon yana taaniyo dobalabaanoo bundu-bunduno idoo.

⁵¹Doiya halloo komian pailukenemo doi Tomundo Salomo. Yanila bantile baikon Adonia matakutene tuuno Salomo, tobikon doiya yana ampakon doi balabaan tukon nataaniyo dobalabaanoo bundu-bunduno maka nabantile, “Yaku aki naikon kutaus luwe naimbaa kalu Salomo akiyoon nabatotopi doiyaku baikon yana aki naikon nakateyo yaku.”

⁵²Sambuno lapa doiya Salomo timbiliyomo, “Kalu konakokubai monondok, akiyo kohukuman doiyana maukai natongo soisik; bai kalu yana mokubai lokis, yana sio namate.”

⁵³Doibundu Tomundo Salomo mosumboliimo mian moampakon mondokiyo Adonia doi balabaanoo. Salataa Adonia lubat yana mangadap doi tomundo, tukon tootuku sosuba doi tomundo salaano. Maka Tomundo Salomo bantile, “Ikoo moola mumule!”