Read Banggai 1 TOMUNDO-TOMUNDO 10 Bible Online

1 TOMUNDO-TOMUNDO 10 - Banggai bible

1 TOMUNDO-TOMUNDO 10

¹ Ko Tomundo boine tano Syeba salataa yana lengele tentang Salomo natololongolan, maka yana lubat doi Yerusalem sulano naujiyo Salomo tukon pasadai-pasadai mo maaling.

²Yana lubat tukon linoolaing mian mo badaang koaito tukon unta mo minuotii moono tukon muatan lamba-lamba, batu permata, tukon badaang tuuno komosoni. Doi tempo napososuungan tukon Salomo, dotomundo boinedoo yana loolukenggene sasaibino kokaliangano kopasadai momoola yana pikikene.

³Sasaibino dotomundo boinedoo napasadai Salomo moola natimbiliyo, akiyokai komeeng mo namoola Salomo timbiliyo.

⁴Dotomundo boinedoo yana saksikanggene susuungo bulaando Salomo napandoiya. Yana kitayo kokamali Salomo mobangune,

⁵kopagawe-pagawe nacara balimangan doi nakamali, tukon konapo pakean mopokakana tukon konapo bonua. Yana kitayo kokinaan tukon moininum mosinidak, sasaibino kopeleleani nacara meleleanian doi lamean, tukon sosubakon-sosubakon Salomo mo sosubakene doi TEMENENO Na Bonua. Sasaibino doiya tealikene dotomundo boinedoo moluwedoi tano Syeba yana masainding tukon mamasa.

⁶Maka yana bantilokai doi Tomundo Salomo, “Sasaibino daku linongol doi kutano susuunggu tentang Tuan tukon Tuan napandoiyan, takainomo bisa!

⁷Loolukonoo yaku aki kumaangga, bai salataa yaku lubat tukon sakisiiyomo sasaibino tukon matanggu susuunggu, maka nasodo kuanggayo. Konabisa-bisaan sasaibino linongoloo akiyoon nasembeleng daku kinitadoo. Konatotoiyan Tuan napandoiyan tukon nakaasaan lobian odoon kona kadaang komo pinolonggon doiyaku.

⁸Bukan maen kona untungan Tuan nabolo-boloki! Tukon bukan maen konamujuran Tuan napagawe-pagawe sampe yanila moola molongol luwedoi Tuan susuungo sasaibino kootunggul motealikene pandoi komian!

⁹Ngginaalokai ko TEMENENO, Tuan na Mian Bisa! Tukon naodudukano Tuan moteali tomundo Israel, ko TEMENENO otudoikene bulaando konasanaangan motuuk doi Tuan. Aki nakabus-kabus yana naseangano kobangsa Israel; doiyamo kosababpo yana oduduke Tuan moteali napo tomundo, sulano Tuan namoola ekeenggele koaturan tukon koadilan.”

¹⁰Doibundu tomundo boine moluwedoi tano Syebadoo masalakanggon palasen-palasen doi Salomo yana mobabayo, doiyamo lobian doi 4.000 kokilogram komosoni tukon meeng koaito mobadaang kobatu permata tukon lamba-lamba. Budodoiya Salomo akimo nabiasa koidan momantalima lamba-lamba mo bunodoiya konakadaang pokakana komo bineekon doiyana doi tomundo boine mo luwedoi tano Syebadoo. (

¹¹Hiram nakapal-kapal mo mababa mosoni mo luwedoi Ofir tuuk doi Salomo, koidan mababa meeng koaito mobadaang kobatu permata tukon kayung anala.

¹²Kayungdoo Salomo sulano nakubaiyo ko TEMENENO Na Bonua talali-talalino tukon doi tomundo nakamaling; koidan tuuk kinubai kasapi tukon gambus doi sasaibino kopenyanyi. Kayung-kayungdoo doiyamo kayung anala mo monondok tuuno mo biasa linubaton doi Israel; akimo nabiasa koidan komian momokita kayung mo pokakana doiya kona monondokan.)

¹³Sangalaasan kopalaseen-palaseen mo biasa bineekon doi Salomo, yana koidan beena doi tomundo boine mo luwedoi tano Syebadoo sasaibino kona kinabi. Doibundu dotomundo boinedoo yana mulemo doi nalipu polaing sasaibino komolainge yana.

¹⁴Sasamba kotaun Tomundo Salomo mantalima adukon 23.000 kokilogram komosoni,

¹⁵akiyoon natangait kokauntungan-kauntungan moluwedoi badagangan, tukon lulu-lulu moluwedoi sasaibino kopadagang, moluwedoi tomundo-tomundo Arab tukon moluwedoi Israel nagubernur-gubernur.

¹⁶Salomo mosumbolii mian momokubai 200 kotombinde mobabasal moluwedoi mosoni motinutuk. Sasamba dotombindedoo komosoni mo pinake uga-ugaate daano kopitu kokilogram.

¹⁷Yana koidan mosumbolii mian momokubai koidan 300 kotombinde mosoni mopoipoisik. Komosoni mo pinake tuuk doi sasamba kotombinde poipoisikoo daano uga-ugaatene lua kokilogram, sasaibino doiya mosoni motinutuk. Sasaibino dotombindedoo yana abese doi bonua pososuungan mosinombuikon Mosolot Libanon Bonuano.

¹⁸Yana koidan mosumbolii mian momokubai meeng kokulusii batomundoan mo babasal mo linapis tukon gading tukon binubungai mosoni tulen.

¹⁹Kursi doo hobataniano, tukon doi sembeleng suwe-suweleno daano kosinga timbalango. Doi kursi doo tonggulungo daano saapi oluno timbalango. Kursi doo daano konom kotukalo pauno.

²⁰Doi bunduno babo tukon bunduno bakalinga sasamba dotukaloo tepeko daano kosinga timbalango — sasaibino songulo lua konakadaang. Akiyo kokulusii batomundoan mopokakana doiya doi batomundoan-batomundoan mo bailon.

²¹Sasaibino Salomo nagalaas monginuman paisu kinubai luwedoi mosoni, tukon sasaibino kopakakas doi Mosolot Libanon Bonuano mau doiyakai kinubai luwedoi mosoni tulen. Akiyo komo kinubai moluwedoi suasa, sabab doiya kosinggato Salomo natealian tomundo komian anggene kosuasa akiyo koanggano.

²²Salomo daano badaang konakapal mobabasal motalabut polaing-laing tukon Tomundo Hiram nakapal-kapal. Tolu kotaun idan kapal-kapaldoo naabali momababa mosoni, suasa, gading, bande tukon tomosi merak.

²³Tomundo nakaasaan tukon napandoiyan akiyo komeeng kotomundo nai dunia nia mo liisiyo.

²⁴Sasaibino komian doi posaapon kodunia kakaate mopososuunggene Salomo sulano yanila namolongol otunggul pandoiyan Mian Bisa mo beekene doiyana.

²⁵Yanila suwe-suwele molubat mababakene palaseen doiyana. Konapoo bineekonoo doiyamo: suasa, mosoni, pakean, sinapan, lamba-lamba, adalan tukon bagal. Bunomokaidoiya sasamba kotaun.

²⁶ Salomo mongoduduk suludadu polobosi doiyamo moluwedoi 1.400 kokereta polobosian tukon 12.000 kosuludadu momapake adalan. Kosoobos inabos doi Yerusalem tukon kolabino inabos doi moimoiya kokota bailon.

²⁷ Doi tempo Salomo nabapamarentaan doi Yerusalem kosuasa akiyo koanggano tongo pokakana kobatu, tukon kayung kauwalu Libanon motodudul badaang buno koidan kayung ara biasa.

²⁸ Lolo luwedoi tomundo napadagang-padagang, linubaton koadalan luwedoi Mesir tukon Kilikia,

²⁹tukon kokereta-kereta polobosian linubaton luwedoi Mesir. Meeng koadalan koolino 150 kodoy suasa, tukon meeng kokereta polobosian koolino 600 kodoy suasa. Doibundu koidan lolo luwedoi padagang-padagangoo koadalan-adalan tukon kokereta-kereta polobosianoo binalukon koidan tomundo-tomundo Het tukon tomundo-tomundo Siria.