Read Banggai 1 TOMUNDO-TOMUNDO 11 Bible Online

1 TOMUNDO-TOMUNDO 11 - Banggai bible

1 TOMUNDO-TOMUNDO 11

¹ Tomundo Salomo todudul badaang koboiboine molulubaton konakinilakon. Sangalaasan konaboloki tomundo Mesir naboine, Salomo osowaan koidan tukon boiboine moluwedoi Het, Moab, Amon, Edom tukon Sidon.

² Ko TEMENENO lapamo maparentakene baikon ko Israel miano aki namoola osowaan posombuli tukon dobangsa-bangsadoo, sabab yanila tongo naikon mangaanikene ko Israel miano mososubaiyo ko temeneno-temeneno bailon. Maukai nabunodoiya, ko temeneno nabantilano, bai Salomo tataap koidan moosowaan tukon boiboine molulubaton.

³Daano ko 700 kotuan-tuan naboiboine Salomo mokilayo, tukon daano koidan ko 300 konaboloki piala. Naiayamokai konabolo-bolokidoo komo mangaanikene Salomo otinggale ko Mian Bisa,

⁴sampe doi tempo namotuaan donabolo-bolokidoo moolamo mobidukiyo sulano yana nasosubaiyo ko temeneno-temeneno bailon. Daud, Salomo tamano, setia doi TEMENENO, na Mian Bisa, bai Salomo aki napokakana kotamano.

⁵Salomo sosubaiyo ko Asytoret, bangsa Sidon napilogot boine, tukon koidan Molokh pilogot malane mominosikiton bangsa Amon napilogot malane.

⁶Bunomokai doiya kosalitano baikon Salomo baladosamo doi TEMENENO. Daud, Salomo tamano loolainge ko TEMENENO tukon tootubo konoano, bai Salomo aki napokakana doiya.

⁷Doi bunggul bunggono taalikon doi tolopot ko Yerusalem, yana mongokkondong tampat basosubaan motuuk doi Kamos, Moab miano napilogot malane, tukon tuuk doi Molokh, Amon miano napilogot malane — looluakon pilogot mominosikiton.

⁸Salomo mongokkondong tampat-tampat bailon sulano konabolo-boloki moposasala konabangsa moola namosua kamangian, tukon yanila moola namososubakon sosubakon motuuk doi napilogot-pilogot malane susuungo.

⁹Lapamo lua luunggon ko TEMENENO, Israel miano na Mian Bisa, naokitanggene kobutongo doi Salomo tukon ingotiikene yana baikon yana aki namoola sosubaiyo kotemeneno-temeneno bailon, bai Salomo aki nataatiyo ko TEMENENO. Bai yana tongo otinggale ko TEMENENO sidutu, sampe ko TEMENENO nggimoliiyo doiyana.

¹⁰

¹¹Doibundu ko TEMENENO bantile doiyana, “Tobikon tukon sadar ikoo lupaiyomo komupaladandian tukon Yaku tukon aki mutaatiyo Dakuparenta-parenta, tobikon doiya Yaku naikon aloyomo dobatomundoanoo luwedoikoo, tukon Yaku beekenemo doi meeng komupagawe.

¹²Maukai nabuno doiya, sabab kotamamu Daud, Yaku aki Kulakukanggene dolanggedoo kalu ikoo daano motubo. Yaku naikon lakukanggene dolanggedoo doi tempo komumalane nabapamarentaan.

¹³Bai aki naposaapon dobatomundoanoo naikon Yaku moalayo luwedoi yana. Sabab Daud kupeleleani, tukon sabab Yerusalem mo lapamo Yaku tealikene Kukotadoo, Yaku naikon mangalaasene meeng kobenseno motuuk doi mumalane.”

¹⁴Maka ko TEMENENO tealikene Hadad, moluwedoi meeng komian tomundo Edom nakatulunan, yanamo naikon komo musuiyo Tomundo Salomo.

¹⁵Daanoon malumbit doiya, sambuno lapa tomundo Daud nataklukangganano ko Edom, Yoab, Tomundo Daud nasuludadu talengano, yanila ampakono doi Edom sulano yanila natadine konapo mian-mian mo mate doi polobosian. Noom kobituwon konakalumbit yana tukon konasuludadu nadungolan doi Edom. Tukon doi tempodoo lalomo yanila akateyo sasaibino komala-malane indaa.

¹⁶

¹⁷Bai, doiya kosinggato Hadad daanoon motabo-tabokon, lapamo bulen doi Mesir polaing komoi-moiya ko Edom miano, tukon tamano napeleleani-peleleani.

¹⁸Yanilalengget luwedoi Midian, boobus koidan yanila ampakono doi Paran. Indaa daano komoi-moiya komian bailonggon yanila pomeenggono tukon doi yaniladoo, maka yanila ampakono mopolaing-laing doi Mesir sulano yanila napososuung tukon kotomundo Mesir. Dotomundo Mesiroo beena bonua doi Hadad tukon buta napo tampat dungolan tukon komo palaluu motuuk doi napo tuboan.

¹⁹Salataa bunodoiya maka Hadad tealimo tomundo tulano monondok, sampe dotomundodoo beekenemo konasoloiba susuungo, doiyamo tomundo naboloki utuso piyoto kosambuno Tahpenes, bineekono doi Hadad sulano nateali naboloki.

²⁰Doibundu doi Hadad nabolokidoo mosuungo meeng kopau malaneno mo sinombuikon Genubat. Napau nia komo pialayo polong pobabasakon doiyamo Tomundo Mesir naboloki susuungo tukon doi kamali posinggat-singgat tomundo namala-malane.

²¹Salataa doi Hadad matalima bilita baikon Tomundo Daud mo matemo, tukon Yoab, ko Israel nasuludadu talengano matemo koidan, maka bantilokai Hadad doi tomundo Mesir nabantilano, “Pataikanakumo kuabali doi kutano sinuungan.”

²²Tomundo sadaiyo, “Bulaando? Oilakai ikoo kakulangano naimbaa, sampe ikoo yasemo moabali doi tano sinuungan?” “Yaku akiyo daku kakulangan oioila,” Hadad napotimbili, “bai sodiiyomokai kuampakon.” Doibundu dotomundodoo pataikenemo yana moabali doi natano sinuungan.

²³Ko Mian Bisa koidan tealikene Rezon, Elyada napau, sulano namusuiyo Salomo. Rezon daanokai meeng koata modampasene kobutongo luwedoi natuan doiyamo Tomundo Hadadezer moluwedoi Zoba.

²⁴Tomundo Daud biasamo molungguiyo Hadadezer nia tukon yana akateyo Hadadezer tula-tulano mo luwedoi Siria. Doiya kosinggato Rezon obulenggene kobuntongo luwedoi Tomundo Hadadezer yana mokombul mian-mian maka napo mokubai meeng kokomplotan tukon yanamokai komo teali gorombolan kapalano. Yana tukon napololaing-pololaing ampakon doi Damsyik maka yanila dungol doi kotadoo. Indaa kona pololaing-pololaing oduduke yana teali tomundo doi Siria.

²⁵Pokakana Hadad, Tomundo Rezonkai musuiyo ko Israel doi tempo Salomo daanoon motubo, tukon yana nggalanggabute dotanodoo.

²⁶Komian momusuiyo tukon molawane Salomo doiyamokai meeng kona pagawe kosambuno Yerobeam. Yana Nebat napau moluwedoi Zereda doi Efraim. Kotinano balumo, tukon kosambuno Zerua.

²⁷Doibundu nia binasalitakon kokaliangano Yerobeam nabanggimalan. Doi tempo kobuta taalikon lalom ko TEMENENO Na Bonua daanoon motinombuni, tukon kokota pagaro mobinetoon daanoon mokinindodok,

²⁸Yerobeam koidan balimang idoo. Salataa Salomo kitayo baikon Yerobeam pandoi tukon molole, yana beekene doiyana kotanggung jawab sulano naawasiyo kolimang mopinakisaa doi Manasye tukon Efraim nawilayah.

²⁹Daano kooloyo meeng Yerobeam tobuat luwedoi Yerusalem. Doi loloon tanga doi padang lalomo Nabi Ahia moluwedoi Silo lubotiiyo yana tukon doiya kosinggato Ahia mapake jubah mo boolu.

³⁰Doibundu Ahia liatemo konajubah, tukon yana bending-bendingemo teali songulo lua kopatolo.

³¹Sambuno lapa doiya yana bantilemokai doi Yerobeam, “Alayomokai kosongulo kopatolo tuuk doi butomu, sabab ko TEMENENO, Israel miano na Mian Bisa, konabantilano bunonaiya doikoo, ‘Yaku naikon alayo nabatomundoan nia luwedoi Salomo, tukon beekenemo kosongulo kobenseno doikoo.

³²Komeeng kobenseno naikon tataap doi Salomo, sabab daku peleleani Daud, tukon sabab Yerusalem, molapamo kupiliyo luwedoi posaapon kolipu Israel teali kukota.

³³Yaku naikon lakukanggene doiya langgedoo sabab Salomo lapamo otinggale Yaku tukon sosubaiyomo ko temeneno-temeneno bailon, doiyamo: doiyamo Asytoret, Sidon miano napilogot boine; Kamos, Moab miano napilogot malane; tukon Milkom, Amon miano napilogot malane. Tukon koidan Salomo akimo natulutiyo daku mongiasan. Yana aki napokakana kotamano Daud mo taat doi Yaku tukon laksanakanggene Daku parenta-parenta.

³⁴Maukai nabuno doiya bai Yaku aki naikon kualayo sasaibino dobatomundoanoo moluwedoi yana. Yaku sodiiyo yana nabalakuasa kalu daanoon motubo. Doiya langgedoo Yaku lakukanggene sabab Daud Kupeleleani, mo lapamo Kulilike tukon mo taatiyo Daku aturan-aturan tukon Daku parenta-parenta.

³⁵Nabatomundoan nia Yaku naikon alayomo luwedoi Salomo tukon songulo kobenseno Yaku naikon beekenemo doikoo.

³⁶Maunatongo meeng kobenseno naikon Yaku batadikenemo doiyana, sulano maubaino meeng komian moluwedoi Kuata Daud nakatulunan daano komo maparenta motuuk Yaku doi Yerusalem, kota mo lapamo Yaku lilike salaku tampat bakaledaan doi Yaku.

³⁷Tukon ikoo, Yerobeam, naikon Yaku tealikenemo ikoo tomundo doi Israel tukon Yaku pataikenemo ikoo moparentayo sasaibino kodaerah ikoo moiyase.

³⁸Kalu ikoo, pokakana Daud kupeleleani, motaat tutuuno doi Yaku tukon loingiyo Daku aturan-aturan, tukon sanaanggene konoanggu tukon ikoo lakukanggene sasaibino Daku pinalentahkon doikoo, maka Yaku naikon lolainge ikoo sidutu. Yaku naikon tealikenemo ikoo tomundo doi Israel. Yaku naikon loolainge baikon siomukatulunan naikon komo teali tomundo Israel mosoboliyo ikoo, bunopokakana komo lapamo Yaku kubaiyo doi Daud.

³⁹Tobikon Salomo baladosamo, Yaku ukumemo Daud nakatulunan, bai aki napolong sidutu-posidutukon.’ ”

⁴⁰Salataa dobilitadoo polongo doi Salomo, yana kakaate moumboliiyo naakateyo Yerobeam. Bai Yerobeam ampakon bulen doi Tomundo Sisak doi Mesir, tukon yana dungolo idoo sampe Salomo matemo.

⁴¹Kosalitano bailonggon tentang Salomo, tentang sasaibino komo lapamo yana limange tukon motuuk doi napandoiya, lapamo tinulis doibuku lalomo Salomo na Tuboan Salitano.

⁴²Sangkap kolono kotaun konakalumbit Salomo namemerintaan doi Yerusalem luwedoi posaapon ko Israel.

⁴³Doibundu yana matemo tukon tinadin doi Daud nakota. Doibundu konamalane Rehabeam teali tomundo mosoboliyo yana.