Read Banggai 1 TOMUNDO-TOMUNDO 12 Bible Online

1 TOMUNDO-TOMUNDO 12 - Banggai bible

1 TOMUNDO-TOMUNDO 12

¹Rehabeam ampakono doi Sikhem, sabab sasaibino korayat Israel taalikon lembet lapamo pototongi indaa sulano napo oduduke yana nateali tomundo.

²Doiya kosinggato Yerobeam Nebat napau yana daanoon doi Mesir sabab yana obulenggene kobutongo luwedoi Tomundo Salomo. Salataa yana lengele Rehabeam kaliangano, yana abalimo doi Israel.

³Korayat taalikon doi lembet koloyo Yerobeam, maka yanila polaingo yana moampakon mangadap doi Rehabeam. Yanila bantile,

⁴“Salomo Tuan tamano lapamo beena tanggung jawab mo babalat doi kami. Budodoiya kalu Tuan eleape komai tanggungan tukon kulangiyo komai sakisaawan, kami naikon tuluto doi Tuan.”

⁵Rehabeam timbiliyo, “Yaku sio kubapikil looluk. Tukon tolu kooloyo dai salaando nia komuyu sio polubat koidan.” Sambuno buno doiya domian-mianoo mulemo.

⁶Salataa domian-mianoo mulemo Rehabeam mangkabimo otunggul doi paulanggai mo biasa teali Salomo napongotunggul, Rehabeam tamano. Doibundu yana bantile, “Bulaando naikon daku potimbili domian-mianoo?” tukon, “Oila kootunggulo kopo bineekon doiyaku?”

⁷Yanila timbiliyo, “Kalu Tuan bisa-bisa yase balimang posinggat-singgat tukon rayat, beekenemo konapo kakabi, tukon pasti yanila naikon tulutiyo Tuan sidutu-posidutukon.”

⁸Bai Rehabeam aki napopusinggon dopau-paulanggaidoo naotunggul. Konatangabalian, yana tongo ampakon doi tabo-tabo mopokakana kona umur tukon yana tukon motomboniiyo yana polong doiya budodo nia.

⁹Yana mansadai doi yaniladoo, “Oila kopo otunggul doiyaku sulano kutimbiliyo korayat momangkabi sulano kueleape konapo tanggungan?”

¹⁰Yanila timbiliyo, “Bunokai naiya konatutuuwan Tuan nabantilano doiyanila, ‘Mau nabulaandokai dakumuyukan, bai daku bukuanan lobiyoniiyo kotamanggu nabukuanan!’

¹¹Kotamanggu beena tanggungan mo motoong doi komuyu, bai yaku naikon beena komuyu tanggunan mo lobian babalat koidan. Yana tongo odinggalayo komuyu tukon otunggul, bai yaku naikon nanale komuyu tukon otunggul besi mo palatadian!”

¹²Tolu kooloyo doibundu Yerobeam tukon sasaibino domianoo yanila abali mangadap doi Tomundo Yerobeam, pokakana komo lapamo pinalentakon doiyana.

¹³Pototonggulung tukon dopau-pau langgaidoo naotunggul, korayat molubat doiyanadoo yana tongo nggalaiyo tukon bantilan mo kasar.

¹⁴Pokokonoi tukon dotabo-tabodoo naotunggul, yana bantile, “Kotamanggu beena tanggungan mo babalat doi komuyu, bai yaku naikon kubaiyo dotanggunganoo lobian babalat koidan. Yana odinggalayo komuyu tongo otunggul, bai yana naikon nanale komuyu tukon otunggul besi mo palatadian!”

¹⁵Korayat nakakabi yana aki napopusinggon. Bai doiya takainomo TEMENENO namongiasano. Oila ko TEMENENO nabinantil mololo doi Nabi Ahia moluwedoi Silo tentang Yerobeam Nebat napau sio nateali.

¹⁶ Salataa korayat kitayo baikon dotomundodoo aki naiyase mondongoliiyo yanila, yanila nggeleamon, “Inai nda mapaduli Daud tukon kona katulunan! Yanila aki nabiasa mokubai oioila motuuk doi kita. Eh korayat Israel, maimo nda mule! Batadikenemokai doi Rehabeamoo nauluse kobutongo susuungo!” Maka mulemokai korayat Israel,

¹⁷tukon Rehabeam teali tomundo tongo luwedoi Yehuda nawilayah.

¹⁸Maukai nabuno doiya Tomundo Rehabeam daano koidan mosumboliiyo Adonilam, meeng komian mokapalaiyo kolimang mo akiyo kotambono, kai malakoan rayat. Bai yanila sakule yana tukon batu polong pomatekon. Salataa Rehabeam kitayo doiya langgedoo yana kokosobitono molakit doi nekereta, maka yana obulenggenemo kobutongo doi Yerusalem.

¹⁹Tambuuno doi lounudoo korayat doitambikon kolembet ko batomundoan Israel sidutu nggimoliiyo kotomundo-tomundo moluwedoi Daud nakatulunan.

²⁰Doi tempo sasaibino korayat Israel salataa yanila lengele baikon Yerobeam moobuleno luwedoi Mesir, yanila koloyomo yana doi meeng kopososuungan maka yanila odudukemo yana moteali tomundo doi Israel. Tongo rayat Yehuda nabenseno tolong komo tataap setia doi Daud nakatulunan.

²¹Salataa Tomundo Rehabeam polong doi Yerusalem, yana mopototongikon 180.000 kona suludadu mo monondok tuuno moluwedoi Yehuda tukon Benyamin nabenseno sulano napolobosiyo ko Israel miano tukon koidan yana abalinggene kona kakuasaan moluwedoi bense-benseno motaalikon lembet doi Israel.

²²Bai ko Mian Bisa sumboliiyo Nabi Semaya

²³mopelenggene nabilita nia doi Rehabeam, tukon doi sasaibino Yehuda tukon Benyamin nabenseno,

²⁴tukon konabantilano, “Inaikai molobosiyo koutus-utusomu Israel miano. Pomulemokai! Oila komo lapamo teali doiya daanokai kumongiasano.” Salataa bunodoiya maka yanila sasaibino tulutiyomo ko TEMENENO naparenta, tukon yanila suwe-suwele mulemo doi nabonua.

²⁵Salataa yana tealimo tomundo Israel, Yerobeam ekeenggelemo kota Sikhem doi Efraim lipuno bunggulo, maka yana dungolo indaa soisik kotempo. Doibundu yana ampakono koidan luwedoi idoo tukon koidan yana ekeenggelemo kokota Pnuel.

²⁶Yana bapikil doi noano lalomo buno naiya, “Kalunaikon korayat tataap ampakon doi Yerusalem sulano napo mososubakon sosubakon doi TEMENENO na Bonua pokakana konapo linakukanggon nia budodoo nia, inai-inaikene yanila napo abali motomboniiyo Rehabeam, tomundo Yehuda, maka napo akateaku.”

²⁸ Sambuno lapa yana mopotimbongiikene dolanggedoo, yana mokubaimo lua kosapi mosoni timbalango maka nabantile doi rayat, “Eh, komuyu ko Israel miano! Komuyu sukupo kona malumbitan kopo ampakonan doi Yerusalem sulano pobakaleda. Budodoiya, naiyamokai komu temeneno-temeneno molapamo babayo komuyu tobuat luwedoi Mesir!”

²⁹Maka Yerobeam abasemo komeeng dosapidoo mosoni doi Betel tukon komeeng koidan doi Dan.

³⁰Sambuno buno doiya sasaibino korayat mokubaimo lalim, sabab yanila ampakono doi Betel tukon doi Dan sulano napo bakaleda.

³¹Yerobeam koidan mongokkondong tampat kaledaan bailon doi bunggul-bunggul bunggono, tukon yana mongoduduk imam-imam moluwedoi napuli-puli mobolikon Lewi nabenseno.

³² Doibundu Yerobeam abesemo doimam-imamoo doi Betel nabalimang indaa tukon yana susuungo koidan mososubakon sosubakon doi sapi-sapi mosonidoo timbalango yana mokubaiyodoo. Maka yana tantukanggenemo doi tanggal songulo lima bituwon koaluno salaku oloyo babasal doi Israel miano, buno pokakana kooloyo babasal doi Yehuda. Doi oloyodoo Yerobeam ampakon doi Betel tukon yana mososubakon sosubakon sulano napo lamekene kooloyo babasal molapamo yana tantukanggenedoo.