Read Banggai 1 TOMUNDO-TOMUNDO 13 Bible Online

1 TOMUNDO-TOMUNDO 13 - Banggai bible

1 TOMUNDO-TOMUNDO 13

¹Doiya kosinggato daano komeeng konabi doi Yehuda. TEMENENO sumboliiyo yana sulano naampakon doi Betel. Donabidoo polong indaa danoan Yerobeam mokokondong doi balabaano salaano tuuk mososubakon sosubakon.

² Luwe TEMENENO naparenta bantilokai donabidoo doi balabaanoo, “Eh balabaan, eh balabaan! Bunokai naiya ko TEMENENO nabantilano, ‘Meengkopau mosinombuikon Yosia naikon sosuung doi Daud nakaluargaa lalomo. Doi bunggutomu, eh balabaan yana naikon akateyo koimam-imam mo balimang doi tampat-tampat bakaledaan doi pilogot, tukon komo lapamo koidan mososubakon sosubakon doi bunggutomu. Tukon doi bunggutomu koidan yana suayo kobangkapi buku-bukuno.’ ”

³Donabidoo nabantilan koikoidan, “Nabalabaan nia naikon tuwong, tukon koabu doi bunggono naikon tokundang. Doiyamokai kona bukutii baikon ko TEMENENO sumboliiyo yaku.”

⁴Salataa Yerobeam lengele dobantilan-bantilanoo, yana tudoyo donabidoo maka nggeleamon, “Lakoyo domianoo!” Maka banggadudul Yerobeam limano lolosuano teali lemat sampe yana akimo namoola nabubute koidan.

⁵Dobalabaanoo sosinggot tuwong tukon koabu doi bungguto tokundang doi buta, pokakana komo lapamo donabidoo nabinantil luwe TEMENENO naparenta doiyana.

⁶Maka Tomundo Yerobeam bantile doi nabidoo, “Tulungiyakumokai tukon sambeang doi TEMENENO mu Mian Bisa motuuk doi yaku. Kabiyomokai kona peseang sulano natangalinggene kolimanggu lolosuano!” Maka sambeangokai donabidoo doi TEMENENO, tukon salataa yana lapamo sambeang maka tangalinokai dotomundodoo limano lolosuano.

⁷Doibundu dotomundodoo bantile doi nabidoo, “Mai ndakaan doi bonua. Yaku yase mobeenggon palaseen.”

⁸Donabidoo timbiliyo, “Maukai Tuan mubeenggu sembeleng mukaasaan, yaku aki naikon kumalaing mopokaanggon kai mopoinunggon tukon Tuan.

⁹Yaku malaat parenta moluwedoi TEMENENO sulano naaki kukaan kai monginum, tukon kalu yaku mule aki namoola yaku loloiyo kololoon yaku mololoiyo salataa kulubatanoo.”

¹⁰Bunomokaidoiya donabidoo mo ampakon loloiyo kololoon bailon.

¹¹Doiyakosinggato daano komeeng konabi motua mo dungol doi Betel. Konapau-pau popitoikene doiyana kokaliangano donabidoo moluwedoi Yehudadoo. Yanila salitaikene tentang oila konalinakukanggon doi Betel doi oloyodoo, tukon oilamo kona binantil doi Tomundo Yerobeam.

¹²Maka masadaimokai donabidoo motua, ‘Nabi moluwedoi Yehudadoo inaando kona loloon linoloi doi tempo namulean?’ Maka doibundu yanila otudoikenemo dololoonoo doiyana.

¹³Maka sumboliiyomo donapau-paudoo mokonoikene kona keledai saalo. Sambuno lapa doiya yana lakito doi nakeledaidoo tukon yana ampakono

¹⁴molelenggene donabidoo moluwedoi Yehuda. Yana pososuunggene donabidoo daanoon moosulang doi meeng kokayung babasal suukano maka yana sadaiyo, “Oilakai ikoo nia nabi moluwedoi Yehudadoo?” maka yana timbiliyomo, “Tutuu.”

¹⁵“Maimo ndakaan doi kubonua,” donabidoo motua nabantilano.

¹⁶Bai donabidoo moluwedoi Yehuda yana timbiliyo, “Maaf! Yaku aki kumantalima Tama naundangan sulano ndataus doi Tama nabonua. Tukon koidan yaku aki naikon kukaan kai inum naimbaa tukon Tama.

¹⁷Ko TEMENENO lapamo parentaaku sulano naaki kukaan kai inum tukon kalu kumule aki namoola yaku loloiyo koidan dololoonoo kulubatan.”

¹⁸Maka donabidoo motua moluwedoi Betel yana bakakalamo doiyana, tukon nabantile, “Yaku koidan nabi mopokakana ikoo. Luwe TEMENENO naparenta daano komeeng komalaekat lapamo sumboliiyaku sulano yaku kulubotiiyo tukon okoniiyo ikoo doi kubonua.”

¹⁹Maka donabidoo moluwedoi Yehuda yana laingemo donabi motuadoo doi nabonua tukon pokaanggono yana.

²⁰Daanoon yanila moosulang kaan, ko TEMENENO basilingano doi nabi motuadoo,

²¹sampe yana anuukene donabidoo moluwedoi Yehuda, konabantilano, “Ko TEMENENO bantile baikon ikoo aki mutaat doiyana. Ikoo aki mulakukanggene oila komo pinalentakon doikoo.

²²Ikoo lapamo abali tukon kaan inum, padahal ikoo lapamo pinantan molakukanggene dolanggedoo. Tobikon doiya ikoo naikon inakatemo, tukon komubajan aki naikon natinadin doi mukaluargaa natinadinan.”

²³Salataa yanila lapa kaan, donabidoo motua konoikenemo donabidoo moluwe doi Yehuda nakeledai saalo,

²⁴maka luwemokai donabidoo. Doiloloon tanga meeng kosinga lobosiyo yana, maka yana mate mosinoku. Doibundu kobajano topopong doi loloon, tukon konakeledai kokondong loolaniyo yana. Tukon koidan dosingadookai daano mokokondong idoo.

²⁵Komian-mian moalon idoo, yanila kitayo dobajanoo tukon dosingadoo modaano idoo. Doibundu yanila ampakono doi Betel tukon yanila popitoikenemo oilamo konapo kinita.

²⁶Salataa donabi motuadoo lengele dolanggedoo kaliangano, yana bantile, “Pasti doiya nabi moaki nataatiyo ko TEMENENO naparenta! Doiyamo kosababpo ko TEMENENO kapatuwo dosingadoo sulano nasokuwo tukon naakateyo yana pokakana ko TEMENENO nabinantil moakiyoon doiya langgedoo.”

²⁷Maka bantilokai donabidoo motua doi napau-pau, “Konoikenemo daku keledai pombosiino.” Salataa yana lakit doi nakeledai bungguto yanakai luwemo.

²⁸Yana pososuunggene donabidoo bajano moluwedoi Yehuda daanoon motangabos doi loloon tukon kona keledai tukon dosingadoo doi naloolanian. Dosingadoo aki nasokuwo dokeledaidoo, tukon aki koidan nakaane dobajanoo.

²⁹Doibundu yana binggate dobajanoo tukon yana abesemo doi nakeledai bungguto, maka yana babayomo mule doi Betel sulano nakinokiili tukon natinadin.

³⁰Danabi motuadoo susuungo komotadine dobajanoo doi nakaluargaa nabakibulan, maka yana tukon konapau-pau komo kokiiliyo dobajanoo. Yanila bantile, “Kasiang ikoo, utusonggu, kasiang!”

³¹Doibundu donabidoo motua bantile doi napau-pau, “kalu naikon yaku mate, potadinakumo doi bakibulan nia doi nabi bibilodoo.

³²Oila komo lapamo yana bantile luwedoi TEMENENO naparenta motuuk dobalabaanoo doi Betel tukon komo tuuk doi sasaibino kotampat kaledaan doi kota-kota Samaria pasti doiya naikon teali.”

³³Tomundo Yerobeam tataap aki nayase mootinggale konakokubai molokis. Komian mouluse kotampat-tampat kaledaan molapamo yana ekendengedoo, yana tongo banggadudul momolilik imam-imam moluwedoi kaluarga-kaluargaa biasa. Indeemo tolong komo yase, yana odudukemo moteali imam.

³⁴Donakokubai molokisoo mangaanikene konakatulunan nasilaka tukon manas banggadudul.