Read Banggai 1 TOMUNDO-TOMUNDO 14 Bible Online

1 TOMUNDO-TOMUNDO 14 - Banggai bible

1 TOMUNDO-TOMUNDO 14

¹Doiya kosinggato Yerobeam napau malaneno kosambuno Abia yana masakit.

²Bantilokai Yerobeam doi naboloki, “Bato-batotobokai sulano nda ampakon doi Silo doi Nabi Ahia nabonua doi loolukonoo mobantile baikon yaku naikon teali tomundo Israel. Bai ikoo sio mupandoi sulano komian aki natoiyo indee komiano ikoo.

³Makanggikenemokai tuuk doi yana songulo koroti, soisik kosinanga tukon dokot meeng kobotol Sadaiyomokai doiyana oilamokai komo teali tukon Abia, ndapau. Donabidoo naikon pailukenemo doikoo.”

⁴Sambuno buno doiya Yerobeam naboloki ampakono doi Nabi Ahia nabonua doi Silo. Tukon donabidoo akimo nakitayo kolipu sabab yana motuamo tuuno.

⁵Bai ko TEMENENO pailukene doiyana tukon bantile baikon Yerobeam naboloki naikon lubat sulano namasadaikene tentang konapau mo masakit. Tukon ko TEMENENO koidan pailukene doi Nabi Ahia oilamo naikon kona binatil. Salataa Yerobeam naboloki polong indaa, yana bakokubai kakaadukon mian bailon.

⁶Bai salataa Nabi Ahia lengele konalalaakonan alalo doi tataapon, yana bantile, “Mai usok, yaku toiyo ikoo Yerobeam naboloki. Maunaaki mukakaadukon. Daano kobilita lokis motuuk doikoo.

⁷Lebebae tadumokai mumule tukon pailukene doi Yerobeam baikon naiyamokai ko TEMENENO nabinantil, Israel miano na Mian Bisa, ‘Ikoo lapamo kulilike luwedoi antara rayat tukon ikoo Yaku tealikene ponguasa luwedoi Kumian doi Israel miano.

⁸Ikoo lapamo Yaku beekene kobatomundoan Yaku molapamo lambase luwedoi Daud nakatulunan. Bai ikoo aki mupokakana Daud Kupeleleani. Yana setia tuuno doi Yaku tukon taat doi Kuparenta. Konalinakukanggon tongo langge kusinatujui.

⁹Bai ikoo tongo lakukanggene kokulokisan mo lobian babasal luwe oioila konapo linakukanggon yanila momemerinta doi naakiyoonan mumaparenta. Ikoo otinggale Yaku tukon ikoo tobuatenggene Daku nggimalan sabab ikoo mokubai pilogot tukon timbalang-timbalang moluwedoi logam sulano nasinosubai.

¹⁰ Tobikon doiya Yaku naikon olubatene kosilakaan motuuk doi mukaluargaa. Sasaibino komu katulunan mala-malaneno, oilamokai konakadudukan, naikon inakate. Yaku naikon alapuse komu kaluargaa, bunopokakana komian mosasapue bilisii komo manggilit.

¹¹Muanggota kaluargaano momate doi kota naikon asu kaane, tukon komo mate doi kota tonggulungo naikon tomisi kaane. Neneeke, Yakumo kai ko TEMENENO mo basilingan!’ ”

¹²Koikoidan Nabi Ahia yana bantile doi Yerobeam naboloki, “Nah, mulemokai diabudodoo! Doi tempo muusokiyano kokota, domupaudoo naikon matemo.

¹³Sasaibino korayat Israel naikon mandaung tukon yanila tadinemo. Yanamokai komeeng komo tongusokon Yerobeam naanggota kaluargaa komo tinadin secara nataanggaan, sabab tongo yana komo pokokonoi doi TEMENENO noano, Israel na Mian Bisa.

¹⁴Ko Israel naikon TEMENENO beena meeng kotomundo naikon mo opupusiyo Yerobeam nakatulunan nakadudukan salaku tomundo. Laatemo kooloyono! Tambuun budodoiya

¹⁵ko TEMENENO naikon ukumemo ko Israel sampe yanila tounggot-unggot pokakana kogelagah doi paisu lalomo. Ko TEMENENO naikon bubute ko Israel miano luwedoi tano monondok nia mo lapamo bineekon doi napo katulunan. Yana pobabandakene yanila doi Efrat Paisunobatango sembeleng, sabab yanila lapamo olubatene kona nggimalan tukon tobikon yanila mo mangkabaimo lambe-lambea Dewi Asyera.

¹⁶Ko TEMENENO otinggale ko Israel sabab Yerobeam baladosamo tukon mangaanikenemo koidan ko Israel miano baladosa.”

¹⁷Sambuno lapa doiya luwemokai doi Yerobeam naboloki taus doi Tirza. Salataa yana usok doi nabonua, konapau banggadudul mate.

¹⁸Korayat Israel susa maka yanila tadinemo pokakana komo lapamo TEMENENO bantile lolo doi Napeleleani, Nabi Ahia.

¹⁹Kosalitano konamalumbitan Yerobeam nabapamarentaan tukon kona katuaiyano kopolobosian, lapamo tinulis doi Tomundo-tomundo Israel Nabuku Tundun lalomo.

²⁰Yerobeam namemerintaan lua kolono lua kotaun konakalumbit salaku tomundo, lapamo doiya yana matemo maka natinadin. Komo soboliyo yana salaku tomundo doiyamo napau kosambuno Nadab.

²¹Salataa Rehabeam, Salomo napau, tealimo tomundo doi Yehuda, konaumur sangkap kolonomo meeng kotaun. Songulo pitu kotaun konakalumbit konamemerintaan doi Yerusalem. Luwedoi sasaibino kokota doi Israel tongo kota Yerusalem ko TEMENENO nainalaas salaku tampat bakaledaan doi Yana. Rehabeam tinano doiyamo Naama moluwedoi bangsa Amon.

²²Kobangsa Yehuda lakukanggene kolobo molokis doi TEMENENO napambaleng. Konapo kokubai liisiyo konapotulunan nakokubai sampe lobian kona olubatanano ko TEMENENO nanggimalan.

²³ Doi bunggul bungkukono tukon doi kayung-kayung babasal uuno, yanila bangune kotampat-tampat mososubaiyan pilogot, tukon mokokondong lambe-lambea dewi Asyera sulano nasinosubai.

²⁴ Yanila kubaiyo kobasinduan doi tampat-tampatoo salaku basosubaan doi pilogot. Tukon koidan komala-malanekai binee haak sulano nabasindua. Ko Yehuda miano lakukanggene sasaibino kokokubai mo lokis molapamo kinubai luwedoi bangsa-bangsa molapamo TEMENENO siikayo doi tempo ko Israel miano nausokiyano dolipudoo.

²⁵ Doi taun kolimano Rehabeam nabapamarentaan, Sisak, tomundo Mesir nalobosiano ko Yerusalem.

²⁶ Yana lambase sasaibino kobarang modaano koolino motalaat doi TEMENENO Na Bonua tukon doi tomundo nakamali, tukon koidan tombide-tombide mosoni Salomo mokubaiyo.

²⁷Salaku koposobolino Tomundo Rehabeam mokubai tombide-tombide mo luwedoi tambaga, tukon yana palacayakanggene doi sasaibino kosuludadu kapalano mototooliyo kotomundo nakamali tataapono mobabasal.

²⁸Sasamba luunggon kotomundo naampakon doi TEMENENO Na Bonua, sasaibino dopadagaidoo babayo dotombide-tombidedoo, kalu lapamo doiya yanila abalinggenemo koidan doi kombiang badagaan.

²⁹Kosalitano namalumbitan tentang Tomundo Rehabeam lapamo tinulis doi Tomundo-tomundo Yehuda Nabuku Tundun lalomo.

³⁰Doi tempo Rehabeam namemerintaan, sidutu daano kopolobosian antara Rehabeam tukon Yerobeam.

³¹Doibundu Rehabeam mate tukon tinadin doi batadinan tomundo-tomundo doi Daud nakota. Abiam, napau malaneno, komo soboliyo yana salaku tomundo.