Read Banggai 1 TOMUNDO-TOMUNDO 15 Bible Online

1 TOMUNDO-TOMUNDO 15 - Banggai bible

1 TOMUNDO-TOMUNDO 15

¹Doi taun kosongulono alu Tomundo Yerobeam nabapamarentaan doi Israel, Abiam tealimo tomundo doi Yehuda

²tukon yana maparenta tolu kotaun konakalumbit doi Yerusalem. Kotinano doiyamo Maakha, Abisalom napau.

³Abiam lakukanggene kolalim-lalim pokakana kotamano. Yana aki natootubo konoano mosetia doi TEMENENO na Mian Bisa, posasala tukon Daud, natauwa tamano.

⁴ Bai tukon tomundo Daud sambuno, maka ko TEMENENO, Mian Bisa Daud mososubaiyo, lapamo beekene doi Abiam komeeng kopau sulano nasoboliyo yana momaparenta doi Yerusalem sulano yana napalataanggene dokotadoo.

⁵ Ko TEMENENO lakukanggene dolanggedoo sabab Daud lapamo sanaanggene konoano. Daud aki nabiasa moaki napalatikanggene ko TEMENENO Naparenta-parenta, alaasene konapalakala tukon Uria do Hetoo miano.

⁶ Polobosian antara Rehabeam tukon Yerobeam mo tinambuun doi tempo Rehabeam nabapamarentaan daanoon momeenggon mobanggadudul popolonggon doi Abiam nabapamarentaan.

⁷Kosalitano bailonggon tentang Abiam lapamo tinulis doi Tomundo-tomundo Yehuda Nabuku Tundun lalomo.

⁸Abiam mate tukon tinadin doi Daud Nakota. Konapau Asa teali tomundo mosoboliyo yana.

⁹Doi taun kolua kolonono Tomundo Yerobeam nabapamarentaan doi Israel, Asa tealimo doi Yehuda.

¹⁰Yana maparenta doi Yerusalem sangkap kolono meeng kotaun konakalumbit. Konambumbu kosambuno Maakha, Abisalom napau.

¹¹Pokakana Daud, kona mbumbu tamano, Asa sanaanggene ko TEMENENO noano.

¹²Sasaibino komian mo balolowa mo balimang doi tampat-tampat mososubaiyan pilogot yana siikayo, tukon sasaibino kobalambeaan tomundo-tomundo mo ekekendenge mobapamarenta loolukon moakiyoon yana nabapamarenta yana akiyenggene doi posaapon kolipu.

¹³Konambuumbu Maakha, yana belentiyo doi nakadudukan salaku Tina suri, sabab yana lapamo kubaiyo kolambea bapilogotan mo lokis tuuk Asyera, dewi malumbangan. Asa lomboyo dobalabaanoo tukon yana suayo doi Kidron Pepelako.

¹⁴Maukai naaki nasasaibino kotampat mososubaiyan pilogot Asa naakamanase, bai yana tataap setia doi TEMENENO doi tempo natuboan.

¹⁵Sasaibino komosoni tukon suasa molapamo tamano sosubakene doi TEMENENO, yana babayo doi TEMENENO Na Bonua, bunomo lakon koidan komosoni tukon suasa, nasosubakon susuungo.

¹⁶Doi tempo Tomundo Asa namaparentaan doi Yehuda tukon Tomundo Baesa moluwedoi Israel sidutu yanila polobosi.

¹⁷Baesa lobosiyo ko Yehuda tukon kubaiyo palataanan kokota Rama sulano nadupele kololoon tobuatan usok doi Yehuda.

¹⁸Tobikon doiya Tomundo Asa alayo sasaibino komosoni tukon suasa mo daanoon doi TEMENENO Na Bonua tukon doi tomundo nakamali maka nakapatuwo doi Damsyik doi Benhadad tomundo Siriya, Tabrimon napau Hezion natumbu. Dobarang-barangoo yana kapatuwo doi moimoiya kosambu doi kamali, linolaing tukon teteba bunonaiya,

¹⁹“Maimokai nda mokubai paladandian posobatan pokakana komo lapamo nda ola tua kubaiyo. Pososinggat naiya yaku makapatu mosoni tukon suasa salaku palaseen, tukon yaku kabiyo tuan muebetele komuposobatan tukon Baesa tomundo doi Israel, sulano yana namulekene abali konapasukan moluwedoi kuwilayah.”

²⁰Benhadad satujuiyo tukon donabantilanodoo maka yana sumboliiyomo kona suludadu kapa-kapalano polaing konapo pasukan maka napolobosiyo kokota-kota doi israel. Yanila lungguiyo ko Iyon, Dan, Abel-Bet-Maakha tukon Kinerot doi napoloolanikonan ko Danau Galilea tukon posaapon Naftali nawilayah.

²¹Salataa Baesa ndongoliiyo dolanggedoo, yana tademo mokubaiyo palataanan kokota Rama. Yana taus doi Tirza tukon doi tempodoo mosoisik aki namokubai polobosian.

²²Sambuno lapa doiya, sasaibino komian doi posaapon ko Yehuda akiyo komo aki sasaibino yanila Tomundo Asa parentayo sulano yanila nabingkate kobatu tukon kayung Baesa mopakeyo doi Rama mokubaiyo palataanan dokotadoo. Dobatudoo tukon kayung-kayungdoo Asa pakeyo sulano naekeenggele kokota Mizpa tukon Geba, meeng kokota doi Benyamin nawilayah.

²³Kosalitano bailonggon mengenai Tomundo Asa, doiyamo konabatalengaan tukon kokota-kota nakinubai palataanan, lapamo tinulis doi Tomundo-tomundo Yehuda Nabuku Tundun lalomo. Doi tempo namatean Asa malaat sesel doi looluakon koaino.

²⁴Yana mate tukon tinadin doi tomundo-tomundo natinadinan doi Daud nakota. Konamalane Yosafat, teali tomundo mosoboliyo yana.

²⁵Doi taun koluano Tomundo Asa maparenta doi Yehuda, tukon Nadab Yerobeam napau teali tomundo doi Israel tukon maparenta lua kotaun konakalumbit.

²⁶Pokakana kotamano nabapamarentaan moakiyoon yana namaparenta, dotamanodoo lakukanggene kolangge molokis doi TEMENENO napambaleng sampe mangaanikene ko Israel miano mokubai lalim.

²⁷Baesa, Ahia napau, moluwedoi Isakahar nabenseno yanila mokubai meeng kopomeenggonan molawane Nadab, maka yanila akateyo yana. Doiya tempodoo Nadab tukon napasukan daanoon yanila molobosiyo kokota Gibeton doi lipu Filistin.

²⁸Doiya teali doi taun kotoluno luwedoi Tomundo Asa nabapamarentaan doi Yehuda. Bunokai doiya Baesa natealian tomundo doi Israel nasoboliano Nadab.

²⁹ Salataa Baesa teali tomundo, yana akateyo sasaibino Yerobeam nakaluargaa. Pokokonoi tukon oila komo lapamo TEMENENO bantile lolo doi naata, doiyamo Nabi Ahia moluwe doi Silo, maka sasaibino Yerobeam nakaluargaa inakate kabus, akiyokai komeeng komian komo totinggal.

³⁰Yerobeam mokubai lalim tukon mangaaniikene ko Israel miano talalaing mobaladosa. Sabab Yerobeam nakokubai mangaanikene lubat ko TEMENENO nanggimalan, Israel miano na Mian Bisa sinosubai.

³¹Kosalitano bailonggon mengenai Nadab lapamo tinulis doi Tomundo-tomundo Israel Nabuku Tundun lalomo.

³²Doi tempo Tomundo Baesa nabapamarentaan doi Israel, sidutu teali kopolobosian antara Baesa tukon Tomundo Asa doi Yehuda.

³³Doi taun kotoluno Tomundo Asa nabapamarentaan doi Yehuda, Baesa Ahia napau tealimo tomundo doi posaapon ko Israel. Yana maparenta doi Tirza lua kolono sangkap kotaun konakalumbit,

³⁴Baesa pokakana tukon Tomundo Yerobeam doi nabapamarentaan mokubaiyo kolalim doi TEMENENO tukon mangaanikene ko Israel miano mokubai lalim.