Read Banggai 1 TOMUNDO-TOMUNDO 16 Bible Online

1 TOMUNDO-TOMUNDO 16 - Banggai bible

1 TOMUNDO-TOMUNDO 16

¹Maka basilinganokai ko TEMENENO doi Nabi Yehu napau, konabantilano, “Pelenggenemokai doi Baesa Daku teteba nia,

²‘Doilooluk ikoo akiyo komu kana-kanaan, bai diabudodoo Yaku oduduke ikoo moteali pokotulai doi Kumian Israel miano. Budodoiya ikoo baladosamo pokakana Yerobeam tukon ikoo mangaanikene Daku mian doi Israel mobaladosamo, sampe olubatenemo Dakunggimalan.

³Tobikon doiya Yaku naikon alapuse ikoo tukon komu kaluargaa bunopokakana komo lapamo Yaku lakukanggene doi Yerobeam.

⁴Komu kaluargaa anggotano momate doikota naikon asu kaane, tukon yanila mo mate doi kota tonggulungo naikon tomisi kaane.’ ”

⁵Ko TEMENENO Nateteba doi Baesa tukon dona kaluargaadoo Nabi Yehu komo pelenggene sabab Baesa lapamo lakukanggene kolangge-langge mo lokis doi TEMENENO napambaleng, tukon koidan luwedoi Baesadoo nakokubai olubatene ko TEMENENO Nanggimalan, tukon bolikon tongo sabab yana mo lapamo akateyo sasaibino Yerobeam nakaluargaa. Kosalitano bailonggon tentang Baesa, tongusokon konabatalengaan lapamo tinulis doi Tomundo-tomundo Israel Nabuku Tundun lalomo. Baesa mate maka yana tinadin doi Tirza, konapau malaneno, Ela, komo soboliyo yana moteali tomundo.

⁸Doi taun kolua kololono noom Tomundo Asa nabapamarentaan doi Yehuda Ela Baesa napau tealimo tomundo doi Israel. Yana maparenta doi Tirza lua kotaun kona kalumbit.

⁹Meeng komian kosambuno Zimri, yana meeng kosuludadu kapalano mo kapalaiyo kosembeleng kopasukan momapake adalan, yanila mokubai meeng kopomeenggonan molawane Ela. Daano kooloyo meeng doi Tirza, Ela monginum suka sampe yana mala-malangu doi Arza nabonua, yana teali pakapalai bonua tumbuno doi tomundo nakamali.

¹⁰Doibundu Zimri usok tukon akateyo Ela, sambuno buno doiya yana tealimo tomundo mosoboliyo Ela. Doiya konatealian doi taun kolua kolonono pitu doi tempo Tomundo Asa nabapamarentaan doi Yehuda.

¹¹Sambuno Zimri teali tomundo, yana akateyomo sasaibino Tomundo Baesa nakaluargaa. Tukon koidan sasaibino Baesa pulino mo mala-malane tukon tula-tulano nakaluargaa akiyo koidan komo totinggal.

¹²Doiya pokokonoi oila komo lapamo TEMENENO bantile motuuk doi Baesa lolo doi Nabi Yehu, baikon sasaibino Baesa nakaluargaa tangakate.

¹³Baesa tukon Ela, napau, yanila sosubaiyo kodewa-dewa tukon mangaanikene ko Israel miano mokubai lalim. Tobikon doiya, yanila olubatene ko TEMENENO nanggimalan, Mian Bisa mo sio Israel miano nasosubaiyo.

¹⁴Kosalitano bailonggon tentang Ela lapamo tinulis doi Tomundo-tomundo Israel Nabuku Tundun lalomo.

¹⁵Doi taun kolua kolonono pitu Tomundo Asa nabapamarentaan doi Yehuda, Zimri tealimo tomundo doi Israel tukon maparenta doi Tirza tongo pitu kooloyo kona kalumbit. Doiya kosinggato kosuludadu Israel daanoon molobosiyo kokota Gibeton, Filistin miano nakota.

¹⁶Salataa yanila ndongoliiyo baikon Zimri lapamo mokubai pomeenggonan molawane kotomundo tukon lapamo yanila akateyo, doi oloyodoo koidan doi napo basandunganoo, yanila sasaibino oduduke Omri teali napo talenga, salaku tomundo Israel.

¹⁷Doibundu Omri tukon napasukan otinggalemo ko Gibeton maka yanila ampakon molobosiyo ko Tirza.

¹⁸Salataa Zimri kitayo baikon dokotadoo molinambaso, yana usok doi kamali lalomo tukon yana suayomo dokamalidoo polaing-laing butongo, maka yana matemo.

¹⁹Doiya teali sabab yana lakukanggene kolangge-langge molokis doi TEMENENO napambaleng. Tomundo Yerobeam tukon Tomundo Zimri yanila pokakana, sabab yanila baladosa doi TEMENENO tobikon doiya yanila mangaanikene ko Israel miano baladosa koidan.

²⁰Kosalitano bailonggon tentang Zimri, pomeenggonan poloilokisan mo binatetelikon, lapamo tinulis doi Tomundo-tomundo Israel Nabuku Tundun lalomo.

²¹Doi Israel lalomo tealimo kopobandakonan sabab daano komo yase sulano Tibni Ginat napau nateali tomundo, bai daano koidan komo palaluuwo sio Omri komo teali tomundo.

²²Doibundu tokita doi yanila moala doi Omri komo manaang, Tibni mate tukon Omri teali tomundo.

²³Doiya konatealian doi taun kotolu kolonono meeng doi tempo Tomundo Asa nabapamarentaan doi Yehuda. Omri maparenta salaku tomundo doi Israel songulo lua kotaun konakalumbit. Yana namaparentaan tumbeno doi Tirza noom kotaun konakalumbit.

²⁴Bai doibundu yana mongoli meeng kobunggul koolino 6.000 kodoy suasa moluwedoi meeng komian kosambuno Semer. Maka yana banguneno komeeng kokota doi bunggulo tukon yana sombuikenemo Samaria, pokokonoi Semer sambuno, dobunggulo tumbuno looluk.

²⁵Omri lakukanggene kolalim-lalim mo lobian kona babasalan tukon lalim-lalim mo linakukanggon moluwedoi tomundo-tomundo mo maparenta tumbe-tumbeno.

²⁶Pokakana Yerobeam, Omri baladosa tukon mangaanikene ko Israel miano kai baladosa tukon sosubaiyo kopilogot. Tobikon doiya yanila olubatene ko TEMENENO Nanggimalan, Mian Bisa mo sio Israel miano nasosubaiyo.

²⁷Kosalitano bailonggon tentang Tomundo Omri, tukon sasaibino komo lapamo yana lakukanggene lapamo tinulis doi Tomundo-tomundo Israel Nabuku Tundun lalomo.

²⁸Salataa Omri matemo tukon tinadino doi Samaria, maka konapau Ahab tealimo tomundo mosoboliyo yana.

²⁹Doi taun kotolu kolonono alu Tomundo Asa nabapamarentaan doi Yehuda, konapau Omri tealimo tomundo doi Israel tukon maparentamo doi Samaria lua kolono lua kotaun konakalumbit.

³⁰Yana lakukanggene kolalim-lalim mo lobian kona babasalan doi TEMENENO napambaleng kalu pinokakanakon tukon tomundo-tomundo bailon mo balimang loolukon tukon yana.

³¹Akiyoon nasukup doiyana natubo baladosa pokakana Tomundo Yerobeam, bai yana koidan tongo kilayo Izebel Tomundo Etbaal napau moluwedoi Sidon, tukon yana bakaleda doi Baal.

³²Yana mongokkondong bonua kaledaan doi Samaria tuuk doi Baal, tukon doi bonua kaledaanoo yana mokubai meeng kobalabaan tuuk doi pilogotoo.

³³Yana kubaiyo koidan ko Dewi Asyera timbalango. Omri tukon sasaibino kotomundo doi Israel mo balimang loolukon tukon yana, yanamokai komo badaang tuuno kona lalim-lalim kinubai. Tobikon doiya yana olubatene ko TEMENENO Nanggimalan, Mian Bisa mosio Israel miano nasosubaiyo.

³⁴ Doi tempo Ahab nabapamarentaan, Hiel Betel miano kekendenge koidan kokota Yerikho. Bai pokakana komo lapamo TEMENENO bantile moakiyoon Hiel nakekendenge koidan kokota Yerikho lolo doi Yosua Nun napau, baikon Hiel naikon lapus konapau lua; Abiram kolanggongo mate salataa Hiel natambuunan mokekendenge dokotadoo, tukon Segub kopioto mate salataa Hiel konoikene dokotadoo tataapono mo babasal.