Read Banggai 1 TOMUNDO-TOMUNDO 17 Bible Online

1 TOMUNDO-TOMUNDO 17 - Banggai bible

1 TOMUNDO-TOMUNDO 17

¹ Daanokai komeeng konabi kosambuno Elia. Yana kona luwean doi Tisbe, meeng kokota doi Gilead lipuno. Daano kooloyo meeng yana lubat doi Tomundo Ahab tukon bantile, “Tukon TEMENENO sambuno mo tubo, Israel miano na Mian Bisa sinosubai tukon Yaku moleleaniyo, yaku pailukene doi Tuan baikon lua kai tolu kotaun doi salaando nia akiyono naikon kolinggous kai udan soisik, alaasene kalu yaku komo uange koudan.”

²Sambuno bunodoiya ko TEMENENO bantilemo doi Elia,

³“Otinggalemokai natampat nia, tukon ampakonokai doi tolopot doi Yordan Paisunobatango tukon sapitokai indaa loolani ko doi Kerit Paisunobatango pauno.

⁴Ikoo moola monginum paisu moluwedoi paisubatango paunodoo, tukon Yaku naikon sumboliiyo kotomisi gagak mobabakene kokinaan doikoo.”

⁵Elia loingiyo do TEMENENO doo naparenta, maka yana ampakono doi Kerit Paisunobatango pauno maka yana dungolo idoo.

⁶Yana monginum paisu luwedoi paisubatango paunodoo, tukon yana makaan roti tukon sail dotomisidoo gagak mobabayo doi sasamba kododowa tukon kinobian.

⁷Salataa moimoiya kotempo konamalumbitan, mootimo dopaisubatangodoo pauno, sabab akiyono koudan.

⁸Doibundu ko TEMENENO bantile doi Elia,

⁹ “Budodoiya ikoo sio muampakon doi kota Sarfat, loolani ko Sidon tukon dungolo indaa. Yaku lapamo sumboliiyo komeeng kobalu indaa sulano nabeena kaan ikoo.”

¹⁰Sambuno buno doiya ampakonokai Elia doi Sarfat. Salataa polong doi kotadoo tataapono, yana kitayomo komeeng kobalu mo daanoon momokombul kayung mosinua. Maka Elia bantile doi baludoo, “Tina, tulungi yaku mangalaanggu soisik kopaisu ininum.”

¹¹Sambuno dobaludoo ambakon momangala dopaisudoo, Elia uange dobaludoo koidan tukon bantile, “Tina mababaanggu koidan roti soisik.”

¹²Dobaludoo timbiliyo, “Tukon TEMENENO sambuno motubo, Mian Bisa Tama mo sosubaiyo, yaku batotopi baikon yaku akiyo daku roti. Tongo soongguman daku tarigu doi mangku lalomo, tukon soisik kozaitun lisisono doi botol lalomo. Yaku nia daanoon momokombul kayung mosinua sulano kusaange dobahanoo mosoisik, sulano yaku tukon kupau moola kaan. Doiyamokai komai kinaan labino: kalu kabuso doiya kami baino mototiili matean tolong.”

¹³“Inai mosasaaki, Tina!” Elia nabantilano doiyana, “Tadumokai Tina mumokubai kinaan tuuk Tina tukon Tina napau. Bai akiyoon mukubaiyo doiya kubaiyomokai looluk komeeng koroti mopoipoisik moluwedoi tarigu tukon dolisisonoo, maka mubabayo doisumai.

¹⁴Sabab ko TEMENENO, Israel miano na Mian Bisa sinosubai, yana bantile baikon domanggodoo sidutu naikon daano kotariguno, tukon dobotoloo sidutu naikon daano kolisisono polong doi tempo ko TEMENENO nakapatuwano koudan doi dunia.”

¹⁵Doibundu ampakonokai dobaludoo molakukanggene oilamo Elia nabinantil. Salataa lapa yana molakukanggene sasaibino tokita baikon yanila toluila daano konapo palasadiaan kinaan mo sukup sasamba kooloyo.

¹⁶Tukon pokakana ko TEMENENO nabinantil lolo doi Elia, domanggodoo sidutu daano kotariguno, tukon dobotolookai sidutu daano kolisisono.

¹⁷Bubula kotempo doibundu dobaludoo napau otuwong doi sakit lalomo. Pololokon malumbit pololokon payah konasesel sampe yana mate.

¹⁸Maka dobaludoo bantile doi Elia, “Mian Bisa napeleleani, bulaando Tama molakukanggene nalangge nia doiyaku? Oilakai Tama tongo lubat sulano namangaanikene ko Mian Bisa naneneeke naikon daku lalim-lalim, sampe dakupau sio namate?”

¹⁹Elia timbiliyo doiyana, “Babayo dopaudoo doisumai.” Doibundu Elia alayo dopaudoo malaneno luwedoi tinano, tukon yana babayomo doi gandaria babo, doi kombiang Elia nadungolan. Maka Elia ekeeleyomo dopaudoo doi natampat mooloan bunggono,

²⁰maka yana sambeang tukon alalo mobabasal konabantilano, “Oh TEMENENO, ku Mian Bisa, bulaando Ikoo moolubatene nasilakaan nia doi balu nia? Yana lapamo beena tampat dungolan doiyaku tukon budodoiya Ikoo akateyomo konapau!”

²¹ Sambuno lapa doiya tolu luunggon Elia napisaikene kobutongo doi paudoo bunggono, maka nasambeang tukon bantile, “Oh TEMENENO, ku Mian Bisa, otuboiyomokai napau nia!”

²²Ko TEMENENO lengelemo Elia nasambeang; tukon tokita dopaudoo tambuuno moansaang tukon tubo koidan.

²³Sambuno tubo dopaudoo Elia obulus luwedoi nakombiang maka nababayo dopaudoo doi tinano tukon bantile, “Tina, naiya Tina napau! Yana tubomo koidan!”

²⁴Dobaludoo timbiliyo, “Budodoiya yaku toiyo Tama daanokai Mian Bisa napeleleani tukon Tama nabantilan takainomo bisa luwedoi TEMENENO!”