Read Banggai 1 TOMUNDO-TOMUNDO 18 Bible Online

1 TOMUNDO-TOMUNDO 18 - Banggai bible

1 TOMUNDO-TOMUNDO 18

¹Salataa bula-bulaa kotempo konakalumbit, doi taun kotoluno doi tempo namootian dopaisudoo, ko TEMENENO bantile doi Elia, “Ampakonokai mumangadap doi Tomundo Ahab tukon ikoo sio mubantile bunonaiya, akimo namalumbit koidan Yaku naikon obulusenemo koudan.”

²Doibundu Elia luwemo. Doiya kosinggato lounu malaalan tuuno doi Samaria.

³Tobikon doiya Ahab uwange Obaja sulano nalubat momangadap. (Obaja yanamo komo kapalaiyo kolumatangga doi kamali. Yana meeng komian mo tutuu anggayo ko TEMENENO.

⁴Doi tempo Izebel naakateano ko TEMENENO nanabi-nabi, Obaja nia tulungiyo ko 100 konabi tukon yana seekene yanila doi leeng lalomo — 50 komian doi meeng koleeng lalomo — tukon yana beena kaan tukon monginum doi yanila.)

⁵Ahab bantile doi Obaja, “Mai nda dadange posaapon natano nia tukon nda moumbolii paisumatano kai paisubatango. Uga-ugaate kita mopososuunggon bulung sulano koadalan tukon konda bagal namoola kaan tukon salamat, sulano akimo napalaluu nda mangakate mau nabaino meeng konda iyayon piniala.”

⁶Salataa yanila ebesemo dolipudoo yanila modadangemo, doibundu yanila lenggeto. Ahab doi meeng kololoon tukon Obaja doi loloon bailon.

⁷Doi loloon tanga Obaja pososuung tukon Elia. Salataa yana tingoniiyo Elia maka yana sadaiyo, “Kaibisa ikoo nia Tama Elia?”

⁸Elia timbiliyo, “Bisa, yaku nia Elia. Budodoiya ampakono pailukene komu tomundo baikon yaku daanoon naimbaa.”

⁹Obaja timbiliyo, “Oila daku salah sampe Tama yase mosalakanggene yaku doi Ahab sulano kuinakate?

¹⁰Tukon TEMENENO sambuno motubo, Mian Bisa Tama nasinosubai, yaku bantile baikon tomundo lapamo sumboliiyaku moumbale Tama doiya-yaa. Kalukai doi meeng kotano Tama mokuasaiyo yanila bantile baikon Tama akiyono indaa, Ahab tuntute sulano domo kuasaiyo dotanodoo nabatotopi baikon Tama takainomo bisa-bisa aki napinososuunggon idoo.

¹¹Tukon budodoiya Tama yase sulano kuampakon doiyana tukon yaku bantile baikon Tama daano naimbaa?

¹²Kalukai yaku taus naimbaa, uga-ugaate ko TEMENENO Na Roh naikon babayo Tama doi tampat mo aki toiyo! Tukon kalu yaku pailukene doi Ahab baikon Tama daano naimbaa, doibundu yana aki napososuunggene Tama, tantu yana naikon akateyaku. Tama, mutoiyo, yaku nia bisa-bisa momaangga doi TEMENENO salataa yaku daano mopoipoisik!

¹³Oilakai Tama akiyoon mulengele baikon doi tempo Izebel naakateano ko TEMENENO nanabi-nabi, yaku seekeneko 100 doi yanila doi leeng lalomo — 50 komian doi meeng koleeng lalomo — tukon yaku beena yanila kaan tukon monginum?

¹⁴Budodoiya, bulaando Tama mosumboliiyaku kutaus mopailukene doi tomundo baikon Tama daano naimbaa? Yana tantu naikon akateyo yaku!”

¹⁵Elia timbiliyo, “Tukon TEMENENO sambuno Mobabasal Konakuasa yaku moleleaniyo, yaku paladandi naikon molubat susuunggu sulano kumanghadap tomundo doi oloyo nia.”

¹⁶Doibundu Obaja ampakono mopopitoikene doi tomundo, tukon Ahab kai lenggeto sulano napososuung Elia.

¹⁷Salataa Ahab kitayo Elia, Ahab bantile, “Naiyamo yana komo nggabute ko Israel!”

¹⁸Doibundu Elia timbiliyo, “Yaku bolikon panggabut, bai Tuan susuungo komo teali panggabut. Tuan tukon Tuan nakaluargaa komo teali panggabut. Sabab sosubaiyo kopilogot-pilogot, doiya koalatino Tuan lumbaiyo ko TEMENENO naparenta-parenta.

¹⁹Budodoiya, parentakenemokai sasaibino korayat Israel sulano napososuung tukon yaku doi Karmel Bunggulo. Babayomo koidan dotalapudoo mosangkap kosakato lima kolonodoo komian tukon domo sangkap kosakato kanabi Dewi Asyeradoo Izebel naboloki motamboyodoo!”

²⁰Sambuno buno doiya Ahab sumboliiyomo sasaibino korayat tukon do Talapudoo moampakon doi Karmel Bunggulo.

²¹Salataa yanila polong tukon pototongi Elia loolaniyo dorayatoo tukon yana bantile, “Polong oila kotempono kopo tataapan tongobos lua konoamuyu? Kalu do TEMENENO doo Mian Bisa, sosubaiyomokai ko TEMENENO! Kalu do Talapudoo Mian Bisa, sosubaiyomokai do Talapudoo!” Dorayatoo mo pototongi idoo yanila aki natimbiliyo.

²²Doibundu Elia bantile koidan, “Sasaibino ko TEMENENO nanabi-nabi baimokai yaku komo totinggal, baanggokai naimbaa daano ko 450 ko Talapu.

²³Budodoiya babayomokai doisumai kolua kosapi langgilo. Posumboliiyomo do Talapu-talapudoo namangala meeng maka napo tembele, sambuno lapa yanila tembele, doibundu yanila poto-potoliyo maka napo abese doi kayung mosinua bunggono. Bai yanila aki namoola suayo kayungdoo. Dosapi mo meengoo koidan yaku sadaiyo bunodoiya koidan. Yaku naikon tembele tukon yaku abese doi kayung mosinua. Bai mau yakukai aki kusuayo kayungdoo.

²⁴Doibundu posumboliiyomokai do Talapu-talapudoo nasambeang doi napo pilogot-pilogot, tukon mau yakukai sambeang doi TEMENENO. Komo timbiliyo tukon makapatu aung, yanamokai ko Mian Bisa.” Sasaibino dorayatoo timban alaloila mobabasal, yanila bantile, “Setuju!”

²⁵Maka Elia bantile doi Talapu-talapudoo, “Sabab komuyu badaang, yaku sumbolii komuyu pomolilik looluk kosapinotukon posadiakenemo, bai inai posuayo kayungdoo. Salataa lapa doiya posambeango doipo pilogot.”

²⁶Doibundu yanila molilik meeng kosapi tukon yanila sadaiayomo. Salataa lapa doiya yanila sambeango doi pilogot luwedoi dowa-dowa polong suun kooloyo tukon yanila nggele-nggeleamon tukon bantile, “Timbiliyomokai kami, oh Pilogot!” Yanila lakukene doiya banggadudul osu-osulen tukon yanila boilingiyo konapo balabaan. Bai akiyo komo timbiliyo.

²⁷Doi nasuunan kooloyo tambuuno Elia mototulalaiyo yanila, “Posambeangokai nalobian babasal koalalomuyu! Yana temeneno, bolikon? Uga-ugaate yana daanoon mobapi-bapikil, kai taus doi nakombiang poipoisik. Moola teali koidan yana daanoon motaus! Kai uga-ugaate yana daanoon momoolo, tukon komuyu sio pobangune yana!”

²⁸Donabi-nabidoo yanila sambeango pololokon tosuungi babasal koalaloila. Tukon pokakana komo biasa yanila lakukanggene, yanila doli-dolitiyo kopai butongo tukon bakoko tukon kalait polong seselet kosau.

²⁹Bunomokai doiya yanila bangga-banggadudul polong kinobian kooloyo yanila pokakana komian mo inusoki setan, Bai akiyo komo timbiliyo, akiyo komo palaatikanggene.

³⁰Sambuno lapa doiya Elia bantile doi sasaibino dorayatoo, “Mai poloolanikon!” Maka yanila sasaibino pototongi tikume yana, doibundu yana tambuuno mokindendeke ko TEMENENO nabalabaan molapamo molombo.

³¹ Yana mangala songulo lua kobatu, sasamba dobatudoo wakiliyo doi antara meeng mo luwedoi songulo lua kobenseno Yakub nakatulunan, doiyamo mian mo lapamo TEMENENO beena sambu Israel.

³²Elia bangune koidan kobalabaan tampat bakaledaan doi TEMENENO tukon dobatu-batudoo. Doi potikunggon dobalabaanoo yana makali bubung babasal sampe moola momuat uga-ugaate songulo lima koliter kopaisu.

³³Yana susune kayungdoo mosinua doi balabaanoo bunggono, maka dosapi meengoo yana tembele tukon poto-potoliyo maka yana abese doi kayungo baunggono. Doibundu yana bantile, “Poontokiyomokai sangkap kogumbang tukon paisu polong moono, maka pokundange dopaisudoo doi sosubakon mosinosubakon bunggono tukon kayungdoo.” Salataa yanila lakukanggene dolanggedoo,

³⁴yana bantile, “Pokundongiiyo koidan,” maka yanila lakukanggenemo. “Idan luunggon koidan,” Elia bantile, tukon yanila lakukanggenemo koidan.

³⁵Maka lombamokai kopaisu doi potikunggon dobalabaanoo sampe sampe konabubung moono tukon paisu.

³⁶Salataa laatemo kotempono komososubakonan sosubakon kinobian, Nabi Elia loolaniyomo dobalabaanoo maka nasambeang tukon bantile, “Oh TEMENENO, Mian Bisa Abraham nasinosubai, Ishak tukon Yakub, nyatakanggenemo budodoiya nia baikon Ikoomokai ko Mian Bisa doi Israel, tukon yaku nia Mupeleleani. Nyatakanggenemokai koidan baikon sasaibino daku linakukanggon nia daanokai luwedoi Muparenta.

³⁷Timbiliyomokai, TEMENENO! Timbiliyakumokai sulano narayat nia toiyo baikon Ikoo, oh TEMENENO, daanokai Mian Bisa, tukon baikon Ikoomokai komo kubaiyo yanila abali doi Koo.”

³⁸Sambuno lapa yana mosambeang maka ko TEMENENO makapatu aung moluwedoi timbu maka suayo pupuldososubakonoo polaing kayungdoo, kobatu-batuno tukon kobutano tukon lalakene kabus kopaisu mo daano doi bubungoo lalomo.

³⁹Salataa sasaibino dorayatoo kitayomo dolanggedoo yanila sasaibino sosuleengget tootuku doi buta tukon yanila bantile, “Do TEMENENO doo Mian Bisa! Bisa-bisa do TEMENENO doo Mian Bisa!”

⁴⁰Maka bantilokai Elia, “Polakoyomokai do Talapu-talapudoo! Inai popataikene sulano nadaano komeeng komiankai mo luput!” Maka yanila lakoyomo do Talapu-talapudoo, doibundu Elia babayomo yanila doi Kison Paisunobatango tukon indaa yana akateyomo yanila sasaibino.

⁴¹Sambuno lapa doiya Elia bantilemokai doi Tomundo Ahab, “Budodoiya tadumokai Tuan naampakon kaan! Naapa koidan naikon udan, sabab kona momuukan linongolo.”

⁴² Maka Ahab ampakono kaan, tukon Elia tolibomo doi Karmel Bunggulo bunggono. Indaa yana sosuleengget tootuku tukon koduduso doibuta doi napotangaiyan looluakon kotuulo.

⁴³Yana bantile doi napeleleani, “Potolibomokai doi bungkukono tukon pombalengekai taalikon doi tobun.” Doatadoo liba, boobus yana abalimo tukon bantile, “Yaku aki kumokita oioila.” Polong pitu luunggon nasumboliiyo konaata moliba bulus sulano nakitayo.

⁴⁴Doi kopituno luunggon doatadoo abalimo tukon bantile, “Yaku kitayo kobunom poipoisik mo tongo buno mian limano palalaino konakabasal molubat luwedoi taalikon tobun.” Maka Elia bantile doi naatadoo, “Ampakono doi Tomundo Ahab, tukon sumboliiyomo yana nalokitiyo kona kereta tukon namosobit mule yana naaki natahalangi tukon udan.”

⁴⁵Doi sopiyoman lalomo tolong kotimbu teali antonggon, tukon puulo kombombuul mo makansang tukon tambuuno molubat koudan mobabasal. Ahab mosobit lokitiyo kona kereta maka yana mule doi Yizreel.

⁴⁶Doiya kosinggato Elia malaat bukuanan moluwedoi TEMENENO. Yana lipate kona jubah tukon yana keetene doi oako maka naobulen loolukoniyo Ahab doi popupuson kololoon polong doi kota Yizreel tataapono babasal.