Read Banggai 1 TOMUNDO-TOMUNDO 19 Bible Online

1 TOMUNDO-TOMUNDO 19 - Banggai bible

1 TOMUNDO-TOMUNDO 19

¹Tomundo Ahab salitaikene doi naboloki Izebel, komo lapamo Elia lakukanggene, tukon koidan bulaando Elia naakateyano sasaibino do Talapu-talapudoo.

²Maka Izebel makapatu bilita doi Elia konabantilano, “Boliisi sasaibino kopilogot naukume yaku tukon naakateyaku, kalu namodowa doi tempo pokakana naiya yaku aki kulakukanggene ikoo pokakana ikoo mo lapamo lakukanggene sasaibino do Talapu-talapudoo.”

³Elia lengele dobilitadoo yana matakuto, maka yana bulen sulano aki nainakate. Yana tukon napeleleani taus doi Bersyeba doi Yehuda. Indaa yana otinggalemo konapeleleanidoo,

⁴ maka yana ambakon aiai padang lalomo meeng kooloyo kona kalumbit doibundu yana tade doi meeng kokayung batango suukano momasalimbung. Idoo yana osulang tukon yana yasemo namate. “Yaku akimo kutaane koidan, TEMENENO,” konabantilano doi TEMENENO. “Alayomokai daku ansaang. Daku kokubai aki naliisiyo kona monondokan kotumbunggu nakokubai!”

⁵Doibundu yana ubanggon doi kayungo suukano tukon topiito. Aki namalumbit doibundu daano komeeng komalaekat mosinggile tukon bantile, “Elia bangun, tukon kaanokai!”

⁶Elia kitayo doi napotikunggonan, maka nakitayo doi naloolanian kooluno komeeng kopatolo koroti patolo mo sinua tukon meeng koselekan modaano kopaisuno. Salataa yana bangun maka yana kaano tukon monginumo dopaisudoo, doibundu ubanggono koidan.

⁷Doibundu koidan do TEMENENO doo namalaekat lubat koluano luunggon maka nasinggile koidan tukon bantile, “Elia, bangun, tukon kaanokai, sulano ikoo mumoola taane doi muambakonan lalomo moodoon.”

⁸Elia bangun, maka makaan tukon monginum. Sambuno lapa yana kaan tukon monginum paisu yana tealimo bukuanan tukon moolamo moambakon sangkap kolono kooloyo kona kalumbit doi Sinai Bunggulo, doi Mian Bisa natampat okitakanano kobutongo.

⁹Indaa Elia bamoolokon doi leeng lalomo. Maka ko TEMENENO bantile doiyana, “Elia, oila komu kinubai naimbaa?”

¹⁰ Elia timbiliyo, “Oh TEMENENO, Mian Bisa mo Babasal Konakuasa, yaku balimang sidutu tongo tuuk doikoo susuumu. Bai ko Israel miano lumbaiyo konapo paladandian. Yanila manase komubalabaan-balabaan tukon akateyo komunabi-nabi. Baimokai yaku susuunggu komo totinggal, tukon budodoiya yanila yase moakateyo yaku!”

¹¹“Tobuatokai luwedoi leengoo,” ko TEMENENO nabantilano doiyana, “tukon kokondongokai ampakon mangadap doiyaku doi bunggul bungkono.” Maka ko TEMENENO alon idoo, linolukoni tukon mbombuul mo puul makansang tuuno sampe kobunggul bungkono tabata tukon mapasa kobunggul-bunggul batu. Bai ko TEMENENO aki naokitakene kobutongo doi mbobuuloo lalomo. Sambuno lapa tade dombombuuloo, teali koleali, bai doi lealidoo lalomo ko TEMENENO aki naokitakene kobutongo.

¹²Doibundu lubatokai koaung, bai ko TEMENENO kai akiyo doi aungoo lalomo. Sambuno lapa doiya kodunia ndondoongo teali monondok, bobus koidan tololongol komeeng koalal poipoisik malamuyuk.

¹³Salataa Elia lengele doalaloo, yana tombukiyo koduduso tukon najubah, maka yana tobuat tukon kokondong doi lengoo babano. Maka yana lengele koalal mo bantile, “Elia, oila komu kinubai naimbaa?”

¹⁴Elia timbiliyo, “Oh TEMENENO, Mian Bisa Mobabasal Konakuasa, yaku sidutu balimang tongo tuuk Ikoo susuumu. Bai ko Israel miano lumbaiyo konapo paladandian tukon Ikoo. Yanila manase komu balabaan tukon akateyo komunabi-nabi. Baimokai yaku susuunggu komo totinggal, tukon budodoiya yanila yase akateyo yaku!”

¹⁵ TEMENENO bantile, “Abalimokai doi padang lalomo loolani ko Damsyik. Maka mutaus doi kota tukon kundongiiyomo lisison Hazael oluno bunggono salaku paloosan yana moinoduduk teali tomundo doi Siriya.

¹⁶ Kubaiyomokai buno doiya koidan doi Yehu Nimsi napau, sulano yana nateali tomundo Israel, tukon doi Elisa Safat napau moluwedoi Abel-Mehola, sulano yana nateali nabi mosoboliyo ikoo.

¹⁷Indee tolong komo aki Hazael naakateyo, naikon Yehu komo akateyo, tukon yanila mo luput luwedoi Yehu yanila naikon Elisa komo akateyo.

¹⁸ Bai 7.000 komian doi Israel yaku salamatene, doiyamo mian-mian mo tataap setia doiya-Ku tukon aki nabiasa somba mososubaiyo kobalambeaan Pilogotkai yanila naumayo.”

¹⁹Daano kooloyo meeng Elia lenggeto tukon pososuunggene Elisa mo daanoon mobalimang doi nakombung. Daano kosongulo lua kopaar kosapi roda doi salaano tukon Elisa susuungo babayo komeeng kopaar kosapi mo taibundukon. Salataa Elia alon loolani Elisa, Elia liate kona jubah tukon yana sambeikene doi Elisa bengeno.

²⁰Sambuno bunodoiya Elisa otinggalemo konasapi-sapi tukon bulen lelenggene Elisa, tukon bantile, “Pataikanaku looluk kupalamisi doi tamanggu tukon tinanggu, kalu lapamo yaku palamisi doibundu maka kumalaing Tama.” Elia timbane, “Ampakono. Yaku aki kupantane ikoo.”

²¹Elisa abali doi nakombung maka natembele konasapi-sapi. Kayung lodano yana pakeyo salaku kayung mosinua mo kinubai pasaang dosapi-sapidoo sailo. Doibundu yana ebe-ebesemo dosailoo doi namian-mianoo tukon yanila kaanemo. Salataa lapa doiya Elisa tauso momalaing Elia tukon yana teali napotombonii.