Read Banggai 1 TOMUNDO-TOMUNDO 20 Bible Online

1 TOMUNDO-TOMUNDO 20 - Banggai bible

1 TOMUNDO-TOMUNDO 20

¹Daano kooloyo meeng Benhadad, tomundo Siria, yana pototongikene sasaibino kona suludadu, tukon pomeenggon kotolu kolono lua kotomundo bailon tukon kereta polobosian, tukon naadalan, yana lubotiiyo tukon lobosiyo kokota Samaria.

²Maka yana mosumbolii bito-bito sulano naampakon doi Ahab, tomundo Israel, doi kotadoo tukon nateteba nia,

³“Tomundo Benhadad tuntute sulano ikoo musalakanggene doiyana komosoni, suasa, komubolo-boloki, tukon mupau-pau mo buku-bukuan.”

⁴Ahab timbiliyo, “Pelenggene doi tuan Tomundo Benhadad baikon yaku satujuiyo. Yana moola naalayo yaku tukon sasaibino dakulangge.”

⁵Doibundu sasaibino dobito-bitodoo abalimo koidan doi Ahab sulano yanila napelenggene kotuntutan bailon moluwedoi Benhadad. Bunonaiyamo konabantilan dotuntutanoo, “Looluk komai tomundo tuntute sulano ikoo musalakanggene doiyana komosoni, suasa tukon mubolo-boloki tukon mupau-pau.

⁶Bai budodoiya yana naikon mosumbolii suludadu kapa-kapalano sulano napalesayo komukamali tukon sasaibino komupagawe nabonua, tukon yanila alayo oilamo tolong kobarang-barang modaano koolino. Yanila naikon lubat doisumai namodowa pokakana natempo nia.”

⁷Maka Tomundo Ahab uangemo sasaibino kokatua-katua Israel tukon bantile, “Komuyu kusakisii susuunggu baikon naiya mian nia yase moosilakayo kita. Yana tuntute sulano kusalakanggene dokubolo-boloki tukon kupau-pau tukon mosoni suasa, tukon yaku aki kutolayo konatuntutanoo.”

⁸Sasaibino kokatua tukon rayat bantile, “Inai mopusinggene yana, Tuan! Inai motulutiyo kona mongiasan.”

⁹Tobikon doiya Ahab timbiliyo doi Benhadad nabito-bitodoo bunonaiya, “Pailukenemo Tuan domutomundodoo baikon yaku satujuiyo kona tuntutan tumbeno, bai kona tuntutan koluano nia aki kusetujuiyo.” Boobus koidan ampakonokai dobito-bitodoo, doibundu yanila abali koidan doi Ahab tukon bantile,

¹⁰“Komai Tomundo naikon makapatu suludadu mobadaang sulano naakamanase komu kota, sampe koamba-ambata mopotimbu-timbuni luwedoi mukotadoo mominanaso yanila moola akute mau natongo limanoila. Yana batotopi sulano sasaibino konapo pilogot naukume yana, tukon naakateyo yana, kalu yana aki nalaksanakanggene dolanggedoo!”

¹¹Tomundo Ahab timbiliyo, “Pailukene doi Tomundo Benhadad: Suludadu kapalano mo tuuno yanila lasayo sanaang kalu lapamo yanila polobosi, bolikon doi naakiyoonan napo polobosi.”

¹²Doi Ahab napotimbilidoo pinolonggono doi Benhadad doi tempo yana polaing-laing tukon tomundo-tomundo bailon mopomeenggon tukon yana tukon doiya kosinggato koidan yanila daanoon moinum-inum doi napo basandungan lalomo. Salataa yanila lengele dobilitadoo Benhadad parentayomo sasaibino kona suludadu kapalano sulano yanila nabato-batotobo molobosiyo kokota Samaria. Sambuno yanila pinalenta maka yanilakai bato-batotobomo.

¹³Daanoon yanila mobato-batotobo, daano komeeng konabi ampakon doi Ahab tukon bantile, “Ko TEMENENO bantile: ‘Ikoo kitayo dosuludadudoo mo badaang? Yaku naikon beena manaangan doikoo luwe yanila doi oloyo nia. Ikoo naikon toiyo baikon Yakumokai ko TEMENENO.’ ”

¹⁴Ahab sadaiyo, “Indee naikon komo sio namolobosi looluk?” Donabidoo timbiliyo, “Suludadu-suludadu mongula, polaing sasaibino kokapala daerah. Bunomokaidoiya ko TEMENENO nabantilan.” Tomundo sadaiyo koidan, “Tukon indee komo sio nakapalaiyo dopolobosianoo?” “Tuan susuungo,” donabidoo napotimbili.

¹⁵Maka dotomundodookai beena otunggul-otunggul doi suludadu-suludadu kapalano monguladoo mo teali pololaing sasaibino kokapala daerah. Sasaibino daano ko 232 kosuludadu kapalano. Doibundu yana lakukanggene pokakana tukon ko suludadu Israel nalinakukanggon. Sasaibino daano ko 7.000 komian.

¹⁶Kopolobosian natinambuunan akiyoon nakaput tukon doiya kosinggato Benhadad tukon dotomundodoo motolu kolono lua mo pomeenggon tukon yana yanila daanoon moinum-inum polong malangu doi napo basandungan lalomo.

¹⁷Komo loolukon tumbe doiyamo suludadu-suludadu monguladoo. Komian-mian Benhadad mo sumboliiyo sulano napo mbaleng-mbalenge komusuh, yanila popitoikenemo doi Benhadad baikon komeeng kotambuno kosuludadu daanoon moambakon molubotiiyo yanila luwedoi Samaria taalikon.

¹⁸Sambuno bunodoiya Benhadad maparentakenemo sulano domusudoo nasuludadu nalinako tubo-tubo, aki napinaduli oilakai yanila nia lubat molobosi kai yanila lubat podame.

¹⁹Suludadu-suludadu monguladoo mo lapamo Tomundo Ahab beena otunggul-otunggul yanila tambuuno mopalasimbat luwedoi kota Samaria, tukon Israel nasuludadu loolainge yanila.

²⁰Yanila suwe-suwele akateyo komusuh nasinasalaan. Ko Siria paimiano bulen, sabab ko Israel miano lelenggene yanila. Bai Benhadad luput. Yana molokiti adalan mobulenggene kobutongo tukon linolaing moimoiya kosuludadu mo molokiti adalan.

²¹Tomundo Ahab yana malaing doi polobosian lalomo tukon yana manase kokereta-kereta polobosian tukon akateyo koadalan-adalano. Doi oloyodoo ko Siria miano toupiyo kokalaan mobabasal.

²²Doibundu donabidoo lubat doi Ahab tukon bantile, “Budodoiya, konamonondokan tuan namule tukon atulemo komupasukan tukon mokubaimo tetel mo monondok tuuno, sabab kotomundo Siria naikon lubat molobosi koidan doi napupusan kotempo timul doi salaando nia.”

²³Benhadad nasuludadu-suludadu kapalano yanila bantile doi Benhadad, “Ko Israel miano nailah-ilah sinosubai kuasaiyo kobunggul, doiyamo kosababpo dobangsadoo nalungguiyo kita. Bai pasti kita moola lungguiyo yanila kalu kita polobosi doi buta nameseaan.

²⁴Konamonondokan budodoiya Tuan soboliyomo dotomundodoo motolu kolono lua tukon tuan susuungo nasuludadu-suludadu kapalano.

²⁵Doibundu siokai Tuan nabeena otunggul-otunggul doi pasukanoo mo pokakana konakadaang tukon dopasukan tumbenodoo mo linungguimo, linolaing adalan tukon kereta polobosian mo pokakana konakadaang doi tumbenodoo koidan. Kita naikon lobosiyo dobangsa Israeldoo doi buta meseaan, tukon naiya kita naikon manaango.” Tomundo Benhadad setuju, maka yana loingiyomo donasuludadu-suludadu kapalano naotungguloo.

²⁶Doi napupusan kotempo timul doi salaando koidan yana otunggule kona suludadu tukon yanila palabiyoko doi kota Afek sulano napolobosiyo ko Israel miano.

²⁷Ko Israel mianokai yanila osukupiyomo konapo suludadu tukon otunggulemo yanila. Maka dosuludadu Israeldoo palabiyoko momaju doi lua kopasukan lalomo tukon yanila basandungo posasalaan tukon do Siriadoo miano. Kalu pinokakanakon tukon Siria nasuludadu mo sasabul yanila koonoiyo dolipudoo, maka ko Israel napasukan tongo tokita buno lua kotambuno kombembe mosoisik.

²⁸Maka lubatokai komeeng konabi doi tomundo Ahab tukon bantile, “Naiyamokai ko TEMENENO nabinantil: ‘Maukai ko Siria miano nasuludadu badaang tuuno bai yaku beena kamanangan doikoo sabab yanila dugayo baikon yaku tongo kuasaiyo kobunggul bai doi lipu nameseaan aki. Ikoo tukon komu rayat naikon toiyo baikon Yakumokai ko TEMENENO. ’ ”

²⁹Pitu kooloyo konakalumbit ko Siria miano tukon Israel miano yanila tataap dungol doi napo basandungan lalomo, tukon yanila posasalaan. Doi oloyo kopituno yanila atambuunemo kopolobosian. Doi polobosianoo lalomo ko Israel miano mangakate 100.000 ko Siria miano.

³⁰Komian bailon mo luput, yanila bulen doi kota Afek, bai dokotadoo pagalo mobinetoon tabaako maka natikale ko 27.000 komian doi yaniladoo. Benhadad koidan bulenggene kobutongo doi kotadoo tukon yana basookon doi meeng kobonua doi kombiang taalikon lalom.

³¹Konasuludadu-suludadu kapalano lubat doiyana tukon yanila bantile, “Komian nabantilano, kotomundo-tomundo Israel yanila daanokai tomundo-tomundo modaano konaseang. Tobikon doiya pataikenemokai mai taus mangadap doi tomundo Israel tukon kami mapake toik moluwedoi karung salaku paloosan manasalan tukon kami lelesene koalos doi bulunggami salaku paloosan taaluukan. Boliisikai yana aki naakateyo Tuan.”

³²Maka yanilakai mapakemo toik moluwedoi karung tukon lelesene koalos doi bulungoila, doibundu yanila ampakono mangadap doi Ahab tukon bantile, “Benhadad daanokai Tuan naata. Yaku kabiyo sulano Tuan inai moakateyo yana.” Ahab timbiliyo, “Kai yana daano motubo, doutusonggudoo?”

³³Takainomo sasaibino Benhadad nasuludadu kapalanodoo daanokai montotiili paloosan mo monondok moluwedoi Ahab. Jadi, salataa Ahab bantile “utus”, yanila banggadudul motimbiliyo, “Tutuu, Benhadad daanokai Tuan utuso.” Maka Ahab bantile, “Antekenemo yana doisumai!” Salataa Benhadad polong, Ahab tobiyo yana molakit kereta.

³⁴Maka Benhadad bantile doi yana, “Yaku naikon abalinggene Tuan doi kota-kota molapamo tamanggu lambase luwedoi Tuan tamano. Tukon koidan Tuan moola mongokkondong pusat badagangan doi kota Damsyik pokakana kotamanggu nalinakukanggon doi Samaria.” Maka Ahab timbane, “Luwe Tuan nadandidoo, yaku naikon bebaskanggene Tuan.” Sambuno buno doiya Ahab mokubaimo paladandian tukon Benhadad doibundu yana sobiiyomo yana.

³⁵Luwe TEMENENO naparenta, daano komeeng konabi moluwedoi antara meeng kotambuno konabi yana sumboliiyo kotulano monanale yana. Bai dotulanodoo aki nayase.

³⁶ Maka do TEMENENO doo nanabi bantile doi tulanodoo, “Sabab ikoo aki muloingiyo ko TEMENENO naparenta, ikoo naikon sinoku singa kalu yana lapamo mule luwe naimbaa.” Tutuu. Mosobit tuuno sambuno lapa yana ampakon luwe idoo, yana sinokumo singa.

³⁷Doibundu donabidoo ampakon doi mian bailon tukon bantile, “Nanalemokai yaku!” Maka domianoo nanale yana polong pokolon.

³⁸Sambuno lapa doiya donabidoo mangala meeng kotoik patolo tukon tombukiyo koduduso, sulano komian naaki natingoniiyo yana, doibundu yana ampakono mokokondong doi loloon bibilo mototiiliyo kotomundo Israel naalon.

³⁹Salataa dotomundo Israeldoo alon, donabidoo bantile doiyana, “Tuan Mo Mulia, doi tempo yaku daano doi polobosian lalomo, daano komeeng kosuludadu kapalano mobabayo doiyaku komeeng komusuh mo linako. Dosuludadu-suludadudoo yanila bantile, Podagaiyokai namian nia mono-monondok. Kalu yana bulen, ikoo sio muinakate soboliyo yana kai beale 3.000 kodoy suasa,

⁴⁰Bai doi bundu salataa yaku daanoon mosibuk, domianoo dampaso.” Do Tomundodoo timbiliyo, “Ikoo lapamo tuwongikene koukuman doi butomu susuumu. Ikoo sio mutanggunge.”

⁴¹Donabidoo bukayo kotoik napotombuki duduso, maka dotomundodoo tingoniiyomo yana baanggokai meeng konabi.

⁴²Maka bantilokai donabidoo doi tomundo, “Naiyamokai ko TEMENENO nabinantil: ‘Komian molapamo yaku parentakene sulano nainakate bai ikoo beena kaluputan. Tobikon doiya ikoo sio mumate salaku posobolino. Komusuludadu naikon kabus mate sabab yanila tongo batadikene komusuh nasuludadu nadampasene kobutongo.’ ”

⁴³Sambuno lapa doiya do Tomundodoo mulemo doi Samaria tukon noano moaki nasanaang tukon nggimal.