Read Banggai 1 TOMUNDO-TOMUNDO 22 Bible Online

1 TOMUNDO-TOMUNDO 22 - Banggai bible

1 TOMUNDO-TOMUNDO 22

¹Doi luaan kotaun lobian konakalumbit akiyo kopolobosian antara Israel tukon Siria.

²Bai doi taun kotoluno, Yosafat tomundo Yehuda taus moduutiyo Ahab tomundo Israel.

³Akiyoon Yosafat naduutiyo Ahab, Ahab lapamo bantile doi sasaibino konasuludadu kapalano, “Komuyu toiyomo baikon kokota Ramot doi Gilead doiya koonggita! Bulaando moaki ndalambase koidan doi tomundo Siria?”

⁴Salataa Yosafat lubat, maka Ahab sadaiyo, “Ikoo yase motaus polaing tukon yaku molobosiyo ko Ramot?” Yosafat timbiliyo, “Monondok! Kita taus polaing-laing. Suludadu tukon dakupasukan mo molokiti adalan naikon pototongi tukon suludadu tukon komu pasukan mo molokiti adalan.

⁵Bai konamondokan kita mansadaikene looluk doi TEMENENO.”

⁶Sambuno lapa doiya Ahab pototongikenemo uga-ugaate 400 konabi maka yana mansadai doi yanila, “Kai moola kutaus molobosiyo ko Ramot kai aki?” Yanila timbiliyo, “Moola! Ko TEMENENO naikon salakanggene dokotadoo doi Tuan.”

⁷Bai Yosafat mansadai koidan, “Oilakai naimbaa akiyo konabi bailon mo moola mansadai doi TEMENENO tuuk doi kita?”

⁸Ahab timbiliyo, “Daano komeeng, doiyamo Mikha Yimla napau. Bai yaku mosikitene yana, sabab yana aki biasa matantukanggon meeng kolangge mo monondok doiyaku; sidutu tongo moaki namonondok.” Yosafat timbane, “Ah, inai mobantile bunodoiya!”

⁹Doibundu Ahab yana uange komeeng kopagawe doi kamali maka nasumboliiyo yana sulano namosobit ampakon mondobotiyo Mikha.

¹⁰Doi tempodoo Ahab tukon Yosafat, yanila mapake pakean dinas, tukon yanila osulang doi kulusii batomundoan doi tampat bagilingan gandum doi Samaria tataapono babasal salaano, doi tempo sasaibino konabi mo pelenggene konapo patantukon.

¹¹Daano komeeng donabi-nabidoo, kosambuno Zedekia Kenaana napau, yana mokubai tanduk-tanduk moluwedoi besi maka nabantile doi Ahab, “Naiyamokai ko TEMENENO nabinantil, ‘Tukon tanduk-tanduk mopokakana naiya Tuan naikon bobokiiyo ko Siria miano tukon manase yanila.’ ”

¹²Sasaibino konabi bailon setuju tukon yanila bantile, “Lobosiyomokai ko Ramot, Tomundo naikon manaang. Ko TEMENENO naikon beena kamanaangan doi Tomundo.”

¹³Dobito-bitodoo sodo nalobotiyo Mikha, yana bantile doi Mikha, “Sasaibino konabi bailon yanila lapamo tantukanggene baikon kotomundo naikon manaang. Kalu momoola Tama koidan sio mutantukanggene komo monondok pokakana yanila.”

¹⁴Bai Mikha timbiliyo, “Tukon TEMENENO sambuno mo tubo, yaku tongo naikon mabantil oilamo ko TEMENENO nabinatil doiyaku!”

¹⁵Salataa Mikha polong doi Tomundo Ahab salaano, dotomundodoo sadaiyomo doiyana, “Kai moola yaku tukon Tomundo Yosafat motaus lobosiyo ko Ramot, kai aki?” Mikha timbane, “Polobosiyomo. Pasti tuan manaang. Ko TEMENENO beena kamanangan doi Tuan.”

¹⁶Ahab timbiliyo, “Kalu ikoo basalita doiyaku tukon TEMENENO sambuno, bantilekai komo tutuu. Bula-bulaamo lunggon kubeenggon poingotii doikoo tentang dolanggedoo?”

¹⁷ Mikha balase koidan, “Yaku lapamo kitayo baikon kosuludadu Israel yanila nggalanggabut doi bunggul-bunggul. Yanila pokakana kodomba mo akiyo kopototoolino, tukon ko TEMENENO lapamo bantile tentang yanila, ‘Namian-mian nia akiyo konapo katua. Sobiiyomokai yanila namule tukon salamat.’ ”

¹⁸Maka Ahab bantile doi Yosafat, “Tutuukai dakubantilanoo, kai aki? Takainomo yana aki nabiasa mo tantukanggene komo monondok doi yaku! Sidutu tongo molokis!”

¹⁹ Mikha bantile koidan, “Budodoiya lengele koidan oilamo ko TEMENENO nabinantil! Yaku kitayo ko TEMENENO moosulang doi Nakulusii batomundoan doi surgaa, tukon sasaibino Kona malaekat kokondong loolaniyo Yana.

²⁰Ko TEMENENO sadaiyo yana, ‘Indee komo bidukiyo Ahab sulano naiyase taus polobosi tukon yana naikon mate doi Ramot doi Gilead?’ Domalaekat-malaekatoo napotimbili posasala.

²¹Konapupusan sosinggot lubat komeeng koroh. Yana loolaniyo ko TEMENENO tukon bantile, ‘Yakumokai komo bidukiyo yana.’

²²TEMENENO sadaiyo, ‘Bulaando kocarano?’ Do Rohdoo timbiliyo, ‘Yaku naikon ampakon tukon kubaiyo sasaibino Ahab nanabi sulano napo kala-kala.’ Ko TEMENENO bantile, ‘Monondok, lakukanggenemo doiya, ikoo naikon moola bujukiyo yana.’ ”

²³Boobuskoidan Mikha bantile, “Nah, doiyamokai komo teali! Ko TEMENENO lapamo kubaiyo Tuan nanabi-nabi bakala-kala doi Tuan sabab ko TEMENENO lapamo tantukanggene sulano natepokiikene kobalaa doi Tuan.”

²⁴Doibundu koidan majumokai Nabi Zedekia tukon yana loolaniyo Mikha maka nalaupe koduduso tukon bantile, “Aki namungkin ko TEMENENO na Roh mootinggale yaku tukon mobasilingan doikoo?”

²⁵Mikha timbiliyo, “Sio mukitayo kobukutiino doi tempo muusokan doi meeng kokombiang musapitan.”

²⁶“Polakoyo yana!” Tomundo Ahab naparenta, “tukon babayo yana doi Amon, wali kota, tukon doi Pangeran Yoas.

²⁷Sumboliiyomokai yanila nausekene doi talunggu lalomo, tukon beena yana kaan tukon monginum maunatongo soisik polong kuabalian tukon salamat.”

²⁸Mikha bantile, “Kalu Tuan abali tukon salamat, koalatino ko TEMENENO aki nabasilingan lolo doiyaku! Sasaibino komo daano naimbaa teali sakisii.”

²⁹Doibundu Ahab tomundo Israel, tukon Yosafat tomundo Yehuda yanila tauso molobosiyo kokota Ramot doi Gilead.

³⁰Ahab bantile doi Yosafat, “Yaku naikon babunokon mian biasa tukon yaku malaing mopolobosi, bai ikoo sio mumapake komu pakean batomundoan.” Bunomokai Ahab nababunokanan mian biasa salataa yana ampakon polobosi.

³¹Doiya kosinggato kotolu kolono lua kopanglima pasukan Siria kereta polobosian lapamo natomundo parentakene sulano konapo linobosi tongo tomundo Israel.

³²Jadi, salataa yanila kitayo Tomundo Yosafat, yanila sasaibino sangkayo yanamokai kotomundo Israel. Tobikon doiya yanila lobosiyo yana. Bai Yosafat nggeleamon,

³³maka yanilakai toiyomo baikon yana bolikon tomundo Israel. Sambuno buno doiya yanila tademo molobosiyo yana.

³⁴Tukon napokokonoiyan daano komeeng ko Siria nasuludadu kapalano yana panakene kona panamatano, bai aki nakonoikene doi langge mopinakituu. Bai dopanadoo matano komo kana Ahab tukon tadul konakalambi polobosian doi taambikon napinotaamikonan. “Yaku kanamo!” Ahab bantile doi napotolupuus nakereta. Putare tukon babayokai yaku tobuat luwedoi polobosian nia!

³⁵Bai sabab kopolobosian daanon momoonas, Tomundo Ahab tataap kokondong tukon inosinggalang doi nakereta lalomo mosasalaane kosuludadu Siria. Kosauno lomba luwedoi pakolo, lembus kokereta soaano. Doi nakinobianan kooloyono yana matemo.

³⁶Adukono sosoop kooloyo matano sasaibino ko Israel napasukan yanila pinalentakono momule doi kota tukon doi nalipu suwe-suwele,

³⁷sabab konapo tomundo matemo. Maka yanila mulemo tukon tadinemo Ahab bajano doi Samaria.

³⁸Salataa konakereta binilisii doi kolam Samaria, koboiboine balolowa daanoon momansau idoo, tukon koasu delepiyo kosau doi keretadoo, tapaat buno komo lapamo TEMENENO bantile.

³⁹Kosalitano bailonggon mengenai Tomundo Ahab, kamali mo moonggol kaliangano, tukon sasaibino kokota yana mokekendengemo, lapamo tinulis doi Tomundo-tomundo Israel Nabuku Tundun lalomo.

⁴⁰Salataa Ahab matemo, konapau Ahazia komo teali tomundo mosoboliyo yana.

⁴¹Doi taun kosanggapo Ahab Tomundo Israel nabapamarentaan, Yosafat Asa napau tealimo tomundo doi Yehuda.

⁴²Doiya kosinggato yana kona umur tolu kolonomo lima kotaun. Yana maparenta doi Yerusalem lua kolono lima kotaun konakalumbit. Kotinano doiyamo Azuba Silhi napau.

⁴³Pokakana kotamano Asa, Yosafat lakukanggene oila komo monondok doi TEMENENO napambaleng. Yana akateyo kabus luwedoi nabatomundoan sasaibino komala-malane balolowa tukon boi-boine mo daano konatugas doi tampat-tampat mososubaiyan pilogot mo daanoon mototinggal moluwe doi tamanodoo Asa nalounu. Bai dotampat-tampat basosubakonanoo susuungo aki naminanas. Korayat tataap yanila mososubakon sosuba tukon kamangian indaa. Yosafat mokubai kapal-kapal doi Tarsis tuuk mangalaan mosoni mo luwedoi Ofir, bai kapal-kapaldoo aki nateali talabut sabab kapal-kapaldoo manas doi Ezion-Geber. Tomundo Ahazia moluwedoi Israel yana kabiyo sulano komian mo balimang doi kapaloo natalabut polaing-laing tukon komian mo balimang doi Yosafat nakapal, bai Yosafat tolake maukai yana nadaano kona potoikonan momonondok tukon kotomundo Israel. Doibundu Yosafat mate tukon tinadin doi tomundo-tomundo natinadinan doi Daud nakota. Konapau Yoram teali tomundo mosoboliyo yana. Kosalitano bailonggon mengenai Yosafat, mengenai nabatalengaan (...)

⁴⁴

⁴⁵

⁴⁶

⁴⁷

⁴⁸

⁴⁹

⁵⁰

⁵¹

⁵²Doi taun kosongulono pitu Tomundo Yosafat nabapamarentaan doi Yehuda, Ahazia Ahab napau tealimo tomundo doi Israel tukon yana maparenta doi Israel lua kotaun konakalumbit.

⁵³Yana baladosa doi TEMENENO sabab yana tulutiyo kotamano tukon tinano nakokubai tukon Tomundo Yerobeam nakokubai mo mangaanikene ko Israel miano mokubai lalim.

⁵⁴Yana sosubaiyo ko Talapu tukon yana maangga doi yana. Tukon buno tamano mo maparenta mo akiyoon yana nateali tomundo, yanakai olubatene ko TEMENENO nanggimalan, Mian Bisa Israel miano nasinosubai.