Read Banggai 1 TOMUNDO-TOMUNDO 3 Bible Online

1 TOMUNDO-TOMUNDO 3 - Banggai bible

1 TOMUNDO-TOMUNDO 3

¹Tomundo Salomo pomeenggono ko Mesir tukon yana kilayomo kotomundo Mesir naboine. Sambuno lapa yanila moosowaan Salomo babayomo dona bolokidoo doi Daud nakota sulano nadungol idoo polong kotomundo nakamali tukon ko TEMENENO Na Bonua potikunggon ko Yerusalem nabenteng nalapa binangun.

²Sabab doiya kosinggato ko TEMENENO Na Bonua akiyoon nabinangun, korayat daano momososubakon sosuba doi bubula kotampat.

³Salomo seseange ko TEMENENO tukon loingiyo kotamano naotunggul-otunggul, bai yana daano momokolot tukon mososubakon iyayon doi bubula kotampat.

⁴Kotampat bakaledaan komo totoi tuuno talaat doi Gibeon. Salomo idan-idan namososubakon sosuba indaa. Daano kooloyo meeng, buno biasa, yana ampakon indaa koidan.

⁵Doi popokoo ko TEMENENO okitakene kobutongo doiyana doi monii lalomo tukon bantile, “Salomo, kabiyomokai oilamo komu iniyas, doiya naikon Kubeekene doikoo!”

⁶Salomo timbiliyo, “TEMENENO, ikoo lapamo otudoikene komuseang doi tamanggu Daud, domu peleleanidoo. Yana monondok, jujur tukon setia doikoo. Tukon salaku mupajamin baikon tuuk sidutu-posidutukon ikoo tataap moseange yana, ikoo beena doiyana meeng komalane mo polong budodoiya kona memerentaan mosoboliyo yana.

⁷Oh TEMENENO, daku Mian Bisa, Ikoo oduduke yaku moteali tomundo mosoboliyo kotamanggu, maukai yaku nia daano momongula tuuno tukon aki kutoiyo bulaando komemerentaan loloono,

⁸yaku daano doi bangsa tanga-tangano Ikoo mo lapamo lilike mo teali Mumian susu-Mu. Yanila meeng kobangsa mo babasal mo aki natangait kona kadaang.

⁹Tobikon doiya, TEMENENO, beenamokai doiyaku pandoiyan yaku mo palaluuwo tuuk moparentayo ko Mumian nia tukon doi naadilan tukon sulano namoola posasalakene oila komo monondok tukon oila komo kulokis. Kalu aki nabuno doiya, aki namungkin yaku momoola moparentayo komu mian mo babasal nia?”

¹⁰Ko TEMENENO talimayo monondok Salomo nakakabidoo

¹¹tukon bantile doiyana, “Sabab ikoo mangkabi pandoiyan sulano mumaparentaan tukon adil, tukon bolikon tuboan momalumbit kai kaasaan tuuk doi butomu susuumu kai komu musuh-musuh namatean,

¹²tobikon doiya domu kakabidoo Yaku daanokene. Yaku tealikene ikoo lobian komupandoiyan tukon lobian komumotoiyan moluwedoi indeemokai koidan komiano, mau doi lounu molapa maukai doi lounu salaando.

¹³Maukai oila komo aki mukabiyokai bai Yaku beekonggon koidan doikoo; polong ikoo pomatekon ikoo naikon kaasa tukon ikoo inodotii liise kotomundo bailon.

¹⁴Tukon kalu ikoo, pokakana kotamamu Daud, nataatiyano Yaku tukon loingiyo Daku aturan-aturan, Yaku naikon beena doikoo tuboan mo malumbit.”

¹⁵Sambuno bangun, Salomo toiyomo baikon ko Mian Bisa lapamo pobasalitai doi yana doi monii lalomo. Sambuno lapa doiya yana abalimo doi Yerusalem maka nakokondong doi TEMENENO na Peti Perjanjian salaano tukon yana mososubakon sosubakon mosinua tukon sosubakon podamean. Doibundu yana mokubaimo lamean tuuk doi sasaibino kona pagawe.

¹⁶Daano kooloyo meeng, lua koboine mo balolowa lubat momangadap doi Tomundo Salomo.

¹⁷Daano komeeng moluwedoi yaniladoo bantile, “Tomundo Mo Mulia, yaku tukon natulanggu boine nia momeeng podungoli meeng kobonua. Akiyo komian bailon mopodungoli tukon kami. Moimoiya kotempo molapamo, yaku mosuung meeng kopau malaneno. Lua kooloyo koidan naboine nia momeengkai mosuungo koidan meeng kopau malaneno.

¹⁹Doi meeng kopopook salataa kami daano momoolo, naboine nia mo meeng aki nasangaja yana pisaiyo konapau polong pomatekon.

²⁰Pintanga kopopook daano yaku mo moolo tomboosokon, yana bangung maka naalayo dakupau luwedoi lisukonggu. Dokupaudoo yana abesemo doi natampat mooloan, tukon donapaudoo mo matemo yana abesemo doi kutampat moolowan.

²¹Modowakon dodowa, salataa yaku bangun tukon mosusuwo dakupaudoo, yaku kitayo yana matemo. Sambuno yaku pale-palesayo, tokita yana bolikon kupau.”

²²“Kala!” Boinedoo momeeng nabantilano, “Komo daano motubo nia koonggu kupau, komo matemodoo koomu mupau!” “Aki!” Boinedoo tumbeno napotimbili. “Komo mate nia koomu mupau, tukon komo daano motubodoo koonggu kupau!” Bunomokai doiya konapogagaiyan doi tomundo salaano.

²³Sambuno lapa yanila mopogagai Tomundo Salomo bantile, “Komuyu suwe-suwele akuiyo baikon napau nia modaanoon motubo popau tukon domo matedoo akiyo komo akuiyo napau.”

²⁴Salataa bantile bunodoiya tomundo mosumbolii mian momangala sabel.

²⁵Doibundu tomundo maparentakene tukon bantile, “Patelemo koiya paunokon mo tubo nateali lua tukon koiya bineekon suwe-suwele malaat meeng kopatolo.”

²⁶Salataa yanila lengele doparentadoo, maka dopaudoo tinano tuuno yana bantile, “Ampun Tuan, inai moakateyo koiya paunokon beekenemo doiyana tolong.” Yana bantile buno doiya sabab naseangano tuuno donapaudoo. Bai boinedoo momeeng koidan yana bantile, “Oode, patelemo tolong, sulano luwedoi kami suwe-suwele akiyo komo laate!”

²⁷Boobuskoidan bantilokai Salomo, “Inai moakateyo dopaudoo! Salakanggenemo doi boinedoo tumbeno — Yanamo kotinano.”

²⁸Salataa ko Israel miano ndongoliiyo tentang Salomo nakaputusan doi palakaladoo lalomo, yanila masainding tukon odotiiyo doiyana. Sabab, tokitamokai baikon ko Mian Bisa lapamo beekene doiyana kohimat sulano konatindakan naadil.