Read Banggai 1 TOMUNDO-TOMUNDO 4 Bible Online

1 TOMUNDO-TOMUNDO 4 - Banggai bible

1 TOMUNDO-TOMUNDO 4

¹Salomo tealimo tomundo doi posaapon kotano Israel.

²Naiyamo kosambu-sambu mo tatandak Salomo mooduduke: Imam-imam: Zadok, Azarya Zadok napau, Abyatar Dulutulis negara: Elihoref tukon Ahia, doiyamo sisia napau-pau Bendahara negera: Yosafat Ahilud napau Suludadu talengano: Benaya, Yoyada napau Pangawas sasaibino kobupati: Azarya, Natan napau Pongotunggul Tomundo: Imam Zabud, Natan napau Komo kapalaiyo korumah tangga doi kamali: Ahisar Komandor balimangan: Adonilam, Abda napau

⁷Salomo mongoduduk songulo lua kobupati doi posaapon kotano Israel. Konapai tugas doiyamo mopotongikene kobahan kinaan mo luwedoi napowilayah suwe-suwele tukon dokinaanoo tuuk doi tomundo tukon sasaibino komian doi nakamali. Memeeng kobupati yanila paisosoboli momokombul dokinaanoo tukon tanggung jawape doi meeng kobituwon lalomo doi sasamba kotaun.

⁸Dobupatidoo mosongulo lua yanila kinapalai meeng kogubernur. Naiyamo kosambuno sasaibino dobupatidoo tukon konapoo lipu kinuasai: Ben-Hur: Efraim bunggulo lipuno Ben-Deker: Kota Makas, Saalbim, Bet-Semes, Elon, Bet-Hanan Ben-Hesed: Kota Arubot, Sokho, tukon posaapon kodaerah Hefer Ben-Abinadab, Tafat nalangkai Salomo naboine: posaapon kodaerah Dor Baana Ahilud napau: Kota Taanakh, Megido, tukon posaapon kodaerah loolani ko Bet-Sean, loolani kokota Saltan taalikon lalom kokota Yizreel polong potimbang kokota Abel-Mehola tukon kota Yokmeam. Ben-Geber: kota Ramot doi Gilead, kampung-kampung doi Gilead Yair miano Manase nakaturunan koona, daerah Argob doi Basan; sasaibino 60 kokota mobabasal mo kinoonggol tukon pagar mobinetoon tukon mosinupat tambaga doi mbamba-mbambano Ahinadab Ido napau: daerah mahanaim Ahimaas, Basmat nalangkai Salomo naboine: daerah Naftali <(...)

²⁰Korayat Yehuda tukon Israel kona kadaang pokakana kobone doi tobun bibilo. Yanila tubo sanaang sabab konapoo kinaan tukon konapo ininum sukup tuuno.

²¹ Sasamba kokaluargaa daano kona anggur asino tukon ara asino. Polong pomatekon Salomo korayat doi Yehuda tukon Israel mo luwedoi Dan polong doi Bersyeba konapotuboan aman tukon sanaang. Sabab sasaibino kotomundo doi taambikon talise ko Efrat taaluuk doiyana, tukon sasaibino kobangsa moluwedoi negara-negara doi napololanikonan konabatomundoan posobat tukon yana. Kobuta doi tambikon talise ko Efrat Paisunobatango moluwedoi Tifsah doi Efrat Paisunobatango bibilo banggadudul doi talise kokota Gaza doi Filistin polong doi napokalalatanan ko Mesir, sasaibino Salomo kuasaiyomo. Komian-mian doi lipudoo taaluk doiyana tukon babeal lulu. Kolangge-langge mokinaan Salomo mo palaluuwo sasamba kooloyo doiyamo 5.000 koliter kotarigu mo alus, 10.000 koliter kotatigu mokasar, 10 kosaapi mokinandang, 20 kosapi doi padang, tukon 100 kodomba. Sangalaasan doiya, koidan jonga, kijang, menjangan tukon unggas.

²⁶ Salomo daano 12.000 konasuludadu momapake adalan 40.000 kokandang motuuk doi adalan-adalan motandane kona kereta-kereta.

²⁷Secara paisoboli, konakalumbit meeng kobituwon sasamba kobupati salakanggene kona langge kinaan motuuk doi Tomundo Salomo tukon motuuk doi sasaibino komian mo malaat kinaan doi kamali-kamali, sampe yanila aki napokakurangan oioila.

²⁸Sasamba dobupatidoo mebeekon koidan kogandum tukon laing motuuk doi sasaibino Salomo naadalan, mau adalan mo linokiti maukai adalan patandan roda. Doadalanoo nakinaan binabakon doi nakandang pokokonoi tukon mo pinalaluu.

²⁹Ko Mian Bisa beena doi Salomo kohikmat, tukon motoiyan mobolikon langge, tukon pangalatian moatean tuuno.

³⁰Doi tano-tano taalikon tolopot tukon doi Mesir akiyo komian molobiyoniiyo kona pandoiyan doi yana.

³¹ Yana bisa-bisa mopandoi luwedoi sasaibino komian. Yana konapandoiyan lobiyoniiyo Etan Ezrahi miano, Heman, Kalkol, tukon Darda Mahol napau-pau. Salomo sambuno totoi doiyayaando kotano-tano napotikunggonan konabatomundoan.

³² Daano 3.000 kososombot tukon lobian doi sololon konanian yana mokarange.

³³Yana moola moposalitai tentang kokayung-kayung batango tukon tatanaman-tatanaman — luwedoi kauwalu batango doi Libanon polong doi bulung-bulung hisop mo tubo doi batu-batu sanggal. Yana moola posalitai koiyayon-iyayon, pokakana andeno kounggas, iyayon motolondok tukon ikan.

³⁴Ko tomundo-tomundo doi posaapon kodunia salataa yanila lengele tentang Salomo napandoiyan yanila mosumbolii mian doiyana sulano namondongolii yana.