Read Banggai 1 TOMUNDO-TOMUNDO 6 Bible Online

1 TOMUNDO-TOMUNDO 6 - Banggai bible

1 TOMUNDO-TOMUNDO 6

¹Salomo natambuunan mokekendenge ko TEMENENO Na Bonua doi bituwon Ziw, doiyamo bituwon koluano, doi taun ko sanggapo doi namemerintaan lalomo, 480 kotaun salataa ko Israel miano naotinggalano ko Mesir.

²Koukulano do TEMENENO doo Na Bonua, taalikon doi lalomo doiyamo: kona kobulus 27 kometer, kobelano 9 kometer, tukon konakatandak 13,5 kometer.

³Doi taalikon kosalaano doi TEMENENO doo Na Bonua daano kogandariano kona kobulus 4,5 kometer tukon kobelano 9 kometer, pokakana konakebelan dobonuadoo koidan.

⁴Doi bonuadoo betoono talaat kololombong mo buang-buang mobebelan doi lalom.

⁵Doi potikunggon taalikon tonggulung dobonuadoo, doi betoono sembeleng tonggulungo kinubai kokombiang-kombiang moposusun. Dokombiang-kombiangodoo daano kotolu kosusuno, suwe-suwele konakatandak 2,2 kometer.

⁶Doi susuno komeengo kona kebelan sasamba kokombiango 2,2 kometer, doi susuno koluano kona kebelan sasamba kokombiango 2,7 kometer tukon doi susuno kotoluno kona kebelan kokombiango 3,1 kometer. Kosusuno doi bilit kobetoono lobian kona bondolongan tukon kosusuno doi babo betoono, sampe koposuungino dokombiang-kombiangoo balak-balako moola napinotaamikon tukon do TEMENENO doo Na Bonua betoono maunaaki nabinuang dobetoono.

⁷Kobalak-balako mopinake doiyamo kayung kauwalu doi Libanon. Tataapon usokan doi kombiang-kombiang posuungino doi susuno bilit tangabos doi taalikon lalom, tukon doi susuno koluano tukon kotoluno daano kotukalo mopinutar. Doibundu Salomo konoikenemo dobonuadoo palapoono. Tuuk doiya yana mapake lata-lata tukon dopi moluwedoi kayung kauwalu Libanon. Kona malumbitan do TEMENENO doo Na Bonua nabinangunan, mau natongo soisik aki natololongol koamaat alalo, olowang kai pakakas besi, sabab kobatu-batu mopinake tuuk doi bangunanoo lapamo sinadiakon tau-tauson salataa daanoon doi napini-pinipisan. Bunomokai doiya Salomo nakokondongano do TEMENENO doo Na Bonua polong polapakon.

¹¹Doibundu ko TEMENENO bantile doi Salomo,

¹²“Kalu ikoo taatiyo sasaibino koaturan tukon Daku parentah, Yaku naikon lakukanggene tuuk doikoo oila komo lapamo kudandikene doi tamamu Daud.

¹³Yaku naikon dungol doi bonua nia lalomo ikoo moekekendenge doi Israel miano tanga-tangano. Yaku aki naikon kuotinggale yanila.”

¹⁴Bunonaiyamokai Salomo nalapaano do TEMENENO doo Na Bonua;

¹⁵Posaapon kobetoono motaalikon doi lalom linapisi tukon kayung kauwalu doi Libanon, tambuun luwedoi soaano polong doi palapoono. Kosoaano kinubai luwedoi kayung kauwalu biasa.

¹⁶ Doi bonuadoo lalomo, taalikon doi tonggulungo minokubaikon kombiango tukon kinubai kosasanggal pangatango moluwedoi kayung kauwalu, tambuun doi soaano polong doi palapoono. Tukon dokombiangoo sinombuikon Kombiang Moliyous tuuno; kona kobulus siyo kometer.

¹⁷Kokombiango mo posasalaanggon tukon do Kombiang Moliyous tuuno sinombuikon Kombiang Mo Babasal, tukon kona kobulus 18 kometer.

¹⁸Posaapon kobetoono dobonuadoo taalikon doi lalom linapis tukon kayung kauwalu doi Libanon, sampe kobetoon batu-batuno aki natokita tuuno. Dopalapisodoo binubungai tukon binotik dikat saono tukon bubunga mo tebeleka.

¹⁹Kombiang Moliyous tuuno mokinubai doi TEMENENO doo Na Bonua lalomo sinadiakon tuuk bangabosan TEMENENO na Peti Perjanjian.

²⁰ Dokombiangodoo konakobulus, konakebelan tukon kona katandak pokakana, doiyamo siyo kometer. Balabaan doi Kombiang Moliyous tuuno salaanodoo luwedoi kayung kauwalu doi Libanon. Doi tataapon usokan doi kombiangoo binonotii rante mosoni. Posaapon taalikon doi lalomo do TEMENENO doo Na Bonua tongusokon ko Kombiang Moliyous tuuno tukon kobalabaano linapis tukon mosoni tulen.

²³ Doi Kombiang Moliyous tuuno inusoli koidan lua koiyayon modaano kokapilo doi surgaa timbalango mo kinubai luwedoi kayung zaitun. Looluakon dotimbalangoo suwe-suwele kona katandak 4,4 kometer;

²⁴koukulano tukon kondodoongo pokakana. Suwe-suwele daano kolua kokapilo, sasamba dokapilodoo 2,2 kometer konabulus. Napotangaiyan loluakon dokapilodoo tubono luwedoi timbalangoo suwe-suwele 4,4 kometer.

²⁷Looluakon dotimbalango inabos pinoloulikon doi Kombiang Momoliyous Tuuno lalomodoo sampe meeng kokapilo moluwedoi sasamba dotimbalangoo singgile kosasanggalo, tukon kokapilo bailonggon posinggil-singgil doi kombiangoo tanga-tangano.

²⁸Looluakon doiyayonoo mo daano kokapilo timbalango doi surgaa linapis tukon mosoni.

²⁹Posaapon kosasanggalo taalikon doi lalomo do TEMENENO doo Na Bonua binubungai tukon iyayon modaano kokapilo doi surgaa mobinotik, kayung-kayung palem batango, tukon bubunga mo tebeleka.

³⁰Do TEMENENO doo Na Bonua soaano lalomo posaapon linapis tukon mosoni.

³¹Doi tataapon usokon doi Kombiang Moliyous tuuno lalomodoo kinonoikon kolua kodopi mokinubai tataapon moluwedoi kayung zaitun. Dotataaponoo mbambano taalikon doi babo kondondoongo tobonnuk mamangan doi tanga-tangano.

³²Loolua dodopidoo binubungai tukon iyayon modaano kokapilo doi surgaa timbalango mobinotik, kayung palem batango tukon bubunga motebeleka. Kotataapon dopino, kinubai koiyayon modaano kokapilo doi surgaa timbalango tukon binotik kokayung-kayung palem batango, sasaibino linapis tukon mosoni.

³³Doi tataapon usokon doi kombiang komeengo lalomo, doiyamo kombiang babasal, kotataapono inobosi bingkaino moluwedoi kayung zaitun, kondodoongo tapanapat sangkap mobulusan.

³⁴Tukon koidan lua kodopi loono mokinubai tataapon moluwedoi kayung kauwalu biasa, tukon suwe-suwele moola nalinipat.

³⁵Dotataapon dopi-dopinodoo binubungai tukon iyayayon modaano kokapilo doi surgaa timbalango mobinotik, kayung palem batango tukon bubunga motebeleka. Sasaibino dobotikodoo linapisi mosoni.

³⁶Do TEMENENO doo Na Bonua salaano kinubai kobasaleano taalikon doi lalom. Dobasaleanodoo tinikumi pagar betoon mo polapis-lapis: doi babo sasamba kolapiso tolu kobatu, daano komeeng kolapiso tolu kobatu, daano komeeng kolapiso luwedoi kayung kauwalu doi Libanon.

³⁷Do TEMENENO doo Na Bonua pondasino kinubai doi bituwon Ziw, doiyamo bituwon koluano, doi taun kosanggapo Salomo namemerintaan.

³⁸Tukon doi bituwon Bul, doiyamo bituwon koaluno, doi taun kosongulono meeng namemerintaan Salomo, Salomo lapamo alapayo mokekendenge do TEMENENO doo Na Bonua, tapaat doi tempo natantukanano. Pitu kotaun konakalumbit dobonuadoo nakinokondongan.