Read Banggai 1 TOMUNDO-TOMUNDO 7 Bible Online

1 TOMUNDO-TOMUNDO 7 - Banggai bible

1 TOMUNDO-TOMUNDO 7

¹Salomo mokokondong koidan meeng kokamaling motuuk doi butongo susuungo. Dokamalingoo yana mo ekekendenge songulo tolu kotaun konakalumbit maka nalapa.

²Doi Kamalingoo Salomo mokubai meeng koduunggon mosinombuikon “Mosolot Libanon Bonuano.” Koukulano: konakobulus 44 kometer, konakebelak 22 kometer, tukon kona katandak 13,5 kometer. Dobonuadoo daano kotolu kosudong dadalo moluwedoi kayung kauwalu doi Libanon; sasamba kodadalo tongokkondong luwedoi songulo lima kosudongo tukon doi babo kinonoikon kolata-latano moluwedoi kayung kauwalu doi Libanon. Kopalapon-palapoono tokubai luwedoi kayung mo pokakana tukon tutupiyo dolata-latanodoo.

⁴Dobonuadoo kosasanggalo doi bobo tukon bakalingano daano kololombongo: tolu kodadalo doi sasanggalo momeeng posasalaanggon tukon kotolu kodadalo doi sasanggaloo bailon. Kotataapon-tataapono tukon kololombongo bingkaino kondondoongo tapanapat sangkap tukon bulusan.

⁶Salomo koidan mokkondong “Bonua Pototongian.” Konakobulus dobonuadoo 22 kometer tukon konakebelan 13,5 kometer. Dobonuadoo salaano daano kogandariano moposusuni tukon daano kotukalo.

⁷Kobonua bailon doiyamo, “Bonua Batomundoan” mosinombuikon koidan Bonua Mangadilian. Na Bonua nia luwedoi soaano polong doi kaso-kasono linapis tukon kayung kauwalu doi Libanon. Nai bonua nia naiyamokai Salomo naputusiyano kopalakala-palakala mo inadili.

⁸ Salomo nadungolan kinubai pokakana kogedung-gedung bailonggon tukon talaat doi basaleano bailon doi Bonua Bangulusan tonggulungo. Tuuk konaboloki, doiyamo tomundo Mesir naboine, Salomo mokubaikene koidan bonua mo pokakana.

⁹Sasaibino dobangunanoo, tongusokon kobasaleano konakabasal, luwedoi pondasino polong doi atono, kinubai luwedoi batu-batu mo mono-monondok. Dobatu-batudoo lapamo sinadiakon doi bakalian batu, tukon pinatol pokokonoi koukulano; taalikon doi lalomo tukon taalikon doi tonggulungo kinesea tukon galagadi.

¹⁰Dobonua-bonuadoo pondasino mo kinubai luwedoi batu-batu mo babasal mo daano koolino. Dobatu-batudoo daano komo 3,5 kometer konakobulus, daano koidan komo sanggap kometer.

¹¹Doi bungkukono kinonoikon kobatu-batu bailon mo maaling koolino tukon pinotoli pokokonoi koukulano, maka natinutup tukon kayung kayung kauwalu doi Libanon.

¹²Kokamaling basaleano mo pinagar betoon tukon kobasaleano mopinagar betoon taalikon doi lalomo doi TEMENENO doo Na Bonua tukon dobonuadoo pososuungan taalikon doi TEMENENO doo Na Bonua salaano, suwe-suwele tokubai luwedoi meeng kolapiso kokayung kauwalu moluwedoi Libanon doi bunggut memeeng tolu kolapiso kobatu.

¹³Doi kota Tirus daano komeeng komala-malane kosambuno Huram yana tutuu ahli tukon badaang kona pangalaman doi mokubaiyan sasaibino kokaliangano kobarang moluwedoi tambaga. Kotamano matemo Tirus miano tukon koidan dotamanodoo daanokai meeng komian moahli doi mokubaiyan sasaibino kokaliangano kobarang-barang mo luwedoi tambaga. Kotinano luwedoi Naftali nabenseno. Tomundo Salomo lapamo mosumbolii mian mondokiiyo Huram sulano nalubat tukon nakapalaiyo sasaibino kolimang mokubaiyan barang-barang mo luwedoi tambaga. Maka lubato Huram tukon limangemo oilamo Salomo nakinabi.

¹⁵Huram mokubai lua kosudong moluwedoi tambaga suwe-suwele kona katandak 8 kometer, kobooto 5,3 kometer tukon kona bondolongan kotambagano 7,4 kosentimeter. Dosudong-sudongoo buang doi lalomo.

¹⁶Tuuk doi sudongoo molua Huram mokubaikene suwe-suwele oluno mo luwedoi tambaga, tukon suwe-suwele konakatandak 2,2 kometer

¹⁷kondondoongo pokakana kobubunga bakung konakatandak 1,8 kometer. Sasamba dosudongoo oluno binubungai tukon lua kodadalo kodelima saono moluwedoi tambaga. Doi sasamba dosudongoo oluno binubungai lua kosakato kodelima saono. Maka Huram mokubai rante mo inanam moluwedoi tambaga maka naabese doi sudong-sudongoo bunggono. Sasamba dosudongoo doi bunggono daano korante mo inanam moluwedoi tambaga moinabos idoo, tukon doi rante moinanamoo bunggono koidan daano komeeng kopoombosii mo matimbuk. Doi pombosiidoo bunggono mo matimbukkia naimbaamo

²¹dosudongoo olu-oluno kondodoongo mobuno bubunga bakung kinonoikon doi sudong-sudongoo. Dosudong-sudongoo inabos doi tataapon salaano kousokan doi TEMENENO doo Na Bonua — komeeng taalikon lalom, tukon komeeng koidan taalikon doi lembet. Komo taalikon doi lalom sinombuikon Yakhin, tukon komo taalikon doi lembet sinombuikon Boas. Bunomokai doiya Huram naalapaano kokubaiyano dosudong-sudongoo.

²³Doibundu Huram mokubai meeng koloyang moluwedoi tambaga mo matimbuk, tukon koukulano bunonaiya: kolalomo 2,2 kometer, kogariso doi tangano 4,4 kometer tukon kobooto 13,2 kometer.

²⁴Potikunggon kobibilo doi tonggulungo binubungai tukon lua kodadalo kodikat saono, mo pinolombotikon posinggat-singgat tukon doloyangoo.

²⁵Doloyangoo inabos doi songulo lua kosapi bunggono mokinubai luwedoi tambaga — kotolu sasalaan doi lembet, kotolu doi lalom, kotolu doi talise, tukon kotolu koidan doi tolopot.

²⁶Konakobondolong doloyangoo 75 kosentimeter. Kobibilo bunopokakana kosasanggil bibilo mo tobonunuk doi tonggulung buno bubunga bakung motebeleka. Dobaakoo moola nainontoki uga-ugaate 40.000 koliter.

²⁷Huram mokubai koidan songulo koroda moluwedoi tambaga suwe-suwele konakobulus 1,8 kometer, konakebelan 1,8 kometer, tukon konakatandak 1,3 kometer.

²⁸Doroda-rodadoo tokubai luwedoi dopi-dopi motapanapat mo kinonoikon doi bingkaino lalomo.

²⁹Dodopi-dopidoo binubungai tukon binotik kosinga, sapi tukon iyayon modaano kokapilo doi surgaa timbalango. Doi bingkai-bingkaino — doi babo tukon doi bilit do singa tukon dosapidoo timbalang-timbalango — tokooton kobubunga dadalo mobinotik.

³⁰Sasamba dorodadoo daano kosanggapo korodano moluwedoi tambaga tukon kona poros roda luwedoi tambaga koidan. Dokeretadoo pasuno mosanggap daano kosudong pataanino sombe moluwedoi tambaga tukon bubunga dadalo doi tonggulungo sembeleng.

³¹Doi tambikon babo dosudong pataaninodoo mosanggap pinosumbokiikon doi meeng kobingkai momatimbumbuk sulano nataaniyo kosombeno. Dosudong-sudong pataaninodoo susuungan konakatandak 44 kosentimeter doi dopidoo mo tanapat bunggono, tukon 22 kosentimeter doi adeno. Doi bingkaidoo babano daano kobotik-botiko.

³²Kona katandak koroda-rodano 66 kosentimeter; konatangabosan doi dopi-dopidoo adeno. Konaporos rodano tukon kokeretano bunopokakana meeng koobos.

³³Doroda-rodanodoo pokakana tukon kokereta polobosian rodano; kopoboot rodano, kojali-jalino, poros tukon koroda uuno jali-jalino sasaibino tokubai luwedoi tambaga.

³⁴Sasamba kopasuno kokeretadoo tambikon doi yade, daano kosanggap kosudong pataano. Tukon dosudong-sudongoo adukon buno meeng koobos tukon kokeretano.

³⁵Doi potikunggon taambikon babo dokeretadoo daano kobibilo kona kebelan 22 kosentimeter. Sudong pataanino tukon kodopi-dopino sasaibino adukon buno meeng koobos tukon kokeretano.

³⁶Kosudong-sudong pataano tukon dodopi-dopinodoo binubungai tukon iyayon modaano kokapilo doi surgaa timbalango, singa, tukon kayung palem batango doi naandomo tolong kona daanoan kotampat mokosong tuuk doiya, pinolainggon kobubunga dadalo doi napotikunggonan.

³⁷Bunomokai doiya kokubaiyano dokereta-keretadoo. Sasaibino pokakana — kondondoongo tukon koukulano.

³⁸ Huram mokubai koidan songulo kosombe mobabasal, sasamba koroda meeng kosombe. Sasamba dosombedoo kona garis tangano 1,8 kometer tukon moola momuat 800 kolitar kopaisu.

³⁹Doi TEMENENO Na Bonua taalikon doi lalom Huram mangabos lima kokereta, tukon kolima taalikon doi lembet. Baak moluwedoi tambagadoo inabosanggon doi pasuno taalikon doi napokalalatanan kotolopot tukon lalom.

⁴⁰Huram mokubai koidan tobunan-tobunan, sikoop-sikoop tukon manggo-manggo. Sambuno lapa doiya lapamokai lapa sasaibino konalimang motuuk doi Tomundo Salomo doiyamo balimangan motuuk doi TEMENENO Na Bonua. Naiyamokai kololongguno molapamo yana kubaiyo: Lua kosudong babasal Lua kosudong oluno kondondoongo mobuno manggo moinabosanggon doi sudongoo molua bunggono Rante moinanam doi sasamba kosudong oluno Sangkap kosakato kodelima saono mo kinubai luwedoi tambaga mosinusun doi lua kodadalo potikunggon korante moinanam doi sasamba kosudong oluno Songulo kokereta Songulo kosombe mobabasal Baak moluwedoi tambaga Songulo lua kosapi mo kinubai luwedoi tambaga motumbake dobaakoo Tobunan-tobunan, sikoop-sikoop tukon manggo-manggo. Sasaibino kololonggu motuuk doi TEMENENO doo Na Bonua, Huram mokubaiyo tuuk doi Tomundo Salomo, kona kinubaiyan luwedoi tambaga, tukon ngginilal polong didilengan.

⁴⁶Tomundo sumboliiyo Huram mokubaiyo dobarang-barangoo doi makalian logam antara Sukot tukon Sartan doi Yordan Pepelako.

⁴⁷Tukon koidan Salomo aki nasumboliiyo sulano natinimbang dobarang-barangoo moluwedoi tambaga, sabab koaito todudul badaang. Jadi, konakotoong dobarang-barangoo aki natinoi.

⁴⁸ Salomo koidan mosumbolii mokinubai ko TEMENENO Na Bonua lolonggu-lolongguno baikon moluwedoi mosoni. Naiyamokai kololonggu-lolongguno mo kinubaidoo: Balabaan Meda tuuk roti mo sinosubakon doi Mian Bisa Songulo kopelita aino mo inabos doi Kombiang Moliyous tuuno salaano, doiyamo kolima taalikon doi lalom tukon kolima taalikon doi lembet. Bubunga Pelita-pelita Sepit-sepit Sasanggil-sasanggil Pakakas popisoi pelita Manggo-manggo Pinggan-pinggan bangabosan bara Engsel-engsel mopinake tuuk doi Kombiang Moliyous tuuno tataapono tukon TEMENENO Na Bonua tataapono doi tonggulung.

⁵¹ Salataa Tomundo Salomo lapamo alapayo mobangune ko TEMENENO Na Bonua, yana abese doi bonuadoo lalomo sasaibino koperak, mosoni tukon barang-barang bailon molapamo kotamano Daud sosubakene doi TEMENENO.