Read Banggai 1 TOMUNDO-TOMUNDO 8 Bible Online

1 TOMUNDO-TOMUNDO 8 - Banggai bible

1 TOMUNDO-TOMUNDO 8

¹ Sambuno lapa doiya Tomundo Salomo sumboliyomo sasaibino komo katuaiyo kobenseno tukon komian moluwedoi bangsa Israel sulano nalubat doiyana doi Yerusalem sulano napobiyele ko TEMENENO Na Peti Perjanjian luwedoi Sion, Daud na Kota, doi TEMENENO Na Bonua.

² Doibundu yanila sasaibino lubato pokokonoi ko Oloyo Babasal Sandung Loon doi bituwon Etanim lalomo.

³Salataa sasaibino dokatua-katuadoo pototongimo, sasaibino koimam bingkatemo do Peti Perjanjianoo,

⁴tukon yanila babayomo doi TEMENENO Na Bonua. Ko TEMENENO Na Sandung tukon sasaibino kololongguno biniyol koidan doi TEMENENO Na Bonua tukon komo biyeledoo doiyamo sasaibino koimam tukon Lewi miano.

⁵Tomundo Salomo tukon sasaibino korayat Israel pototongi doi Peti Perjanjianoo salaano maka yanila mososubakon doi TEMENENO kodomba tukon sapi moaki natangait konakadaang.

⁶Sambuno lapa doiya sasaibino koimam babayomo do Peti Perjanjianoo doi TEMENENO Na Bonua lalomo tukon yanila abesemo taambikon doi iyayonoo modaano kokapilo doi surgaa timbalango doi Kombiang Moliyous tuuno lalomo.

⁷Dotimbalangoo kapilo topopong tombukiyo dopetidoo tukon kokayung-kayung patanggungo.

⁸Kayungdoo patanggungodoo bulusan tuuno, sampe kobundu-bunduno tokita luwedoi Kombiang Moliyous tuuno salaano. (Polong doi oloyo nia daanoon idoo.)

⁹ Doi Peti Perjanjianoo lalomo akiyokai kolangge meeng alaasene lua kobatu. Dobatu-batudoo lapamo Musa usekene idoo doi Bunggulo Sinai, salataa ko TEMENENO namokubaiyan paladandian tukon ko Israel miano doi tempo yanila naambakonan lalomo luwedoi Mesir taus doi lipu Kanaan.

¹⁰ Doi tempo sasaibino koimam tobuat luwedoi TEMENENO doo na Bonua sosinggoton dobonuadoo kononoimo bunom.

¹¹Luwedoi nababasalan konadaanooan ko TEMENENO maka dobunomo nggilep-nggilep sampe sasaibino domianoo akimo namoola usok koidan sulano napolaksanakanggene konapai tugas.

¹² Maka sambeangokai Salomo, konabantilano, “Ikoomokai komo abese kobunom doi timbu, oh TEMENENO. Bai ikoo lobian komu kilaano modungol doi bunom nakalipookanan lalomo.

¹³Budodoiya yaku kekendenge komeeng kobonua mo monondok tuuk Doikoo, teali Mutampat dungolan sidutu-posidutukon.”

¹⁴Sambunolapa Tomundo Salomo mosambeang, yana mbalenge sasaibino kona rayat modaano mokokondong idoo, maka yana mangkabikene Mian Bisa nabalakaat doi yanila.

¹⁵ Yana bantile, “Doi loolukonoo ko TEMENENO paladandi doi tamanggu Daud bunonaiya, ‘Salataa Yaku babayo Daku mian tobuat luwedoi Mesir, doi posaapon kolipu doi Israel akiyokai komeeng kokota Yaku molilike moteali tampat nabinangunan komeeng kobonua mo ginunakanggon teali tampat bakaledaan doi Yaku. Bai ikoo, Daud, Yaku lilike ikoo sulano ikoo muparentayo Daku mian.’ Tanggaalo ko TEMENENO Israel miano na Mian Bisa mo lapamo tapaatiyo donadandidoo!”

¹⁶

¹⁷ Boobuskoidan Salomo bantile, “Kotamanggu Daud lapamo bateteliyo sulano nakekendenge komeeng kobonua tampat bakaledaan doi TEMENENO Israel na Mian Bisa.

¹⁸Bai ko TEMENENO bantile doiyana, ‘Komu makasuutoo monondok.

¹⁹ Bai, bolikon ikoo, bai mopaukai naikon komo bangune dakubonuadoo.’

²⁰Budodoiya ko TEMENENO lapamo tapaatiyo konadandi. Yaku tealimo tomundo Israel mosoboliyo kotamanggu, tukon yaku lapamo koidan mobangune komeeng kobonua tampat bakalean doi TEMENENO, Israel na Mian Bisa.

²¹Doi TEMENENO doo Na Bonua lalomo lapamo kusadiayo kotampato nainabosan do Peti Perjanjianoo koantoko batu paladandian antara TEMENENO tukon ndakaturunan salataa yana babayo yanila tobuat luwedoi Mesir.”

²²Sambuno lapa doiya, doi rayat modaano salaano, Salomo kokondong sasalaane kobalabaan maka tidekene loluakon kolimano

²³tukon nasambeang, “TEMENENO, Israel na Mian Bisa! Doi timbu kai dunia akiyo komo pokakana Ikoo! Ikoo tapaatiyo Komu dandi tukon otudoikene Komu seang doi Mumian mo setia tukon mo taat tukon tootubo konoano doi Koo.

²⁴Ikoo lapamo tapaatiyo komu dandi doi tamanggu Daud. Oilamo komu dinandikonoo lapamo Ikoo laksanakanggene doi oloyo nia.

²⁵ Ikoo koidan lapamo paladandi doi tamanggu baikon kalu kona katurunan bisa-bisa motaat doi Koo pokakana yana, maka naikon daano komeeng komian mo luwedoi nakatulunan komo teali tomundo doi Israel. Budodoiya oh TEMENENO Israel miano na Mian Bisa, tepaatiyomokai koidan komo lapamo Ikoo dandikene doi tamanggu Daud, domu peleleanidoo.

²⁶

²⁷ Bai, oh Mian Bisa, kai bisa Ikoo moiyase dungol doi dunia nia? Posaapokai kotimbu aki nasukup konaluasan tuuk doi Koo, oilakai koidan nabonua kaledaan nia yaku mobangune!

²⁸Oh TEMENENO, daku Mian Bisa, yaku mupeleleani! Bai lelengelekai daku sambeang, tukon talimayomokai daku kakabi oloyo nia.

²⁹ Boliisi oloyo popook Ikoo lindungiyo nabonua nia molapamo Ikoo piliyo salaku tampat bakaledaan doi Koo. Boliisi luwedoi Mutampat dungolan doi surgaa Ikoo lengele tukon ompuniyo yaku tukon Komu mian kalu naikon kami mangadap doi bonua nia tukon mai sambeang doi Koo.

³⁰

³¹Kalu daano komeeng komian motinudu daano kona salah motuuk doi mian bailon tukon binaba doi Mubalabaan doi bonua kaledaan nia lalomo sulano nabatotopi baikon yana akiyo kona salah,

³²oh TEMENENO, siokai Ikoo mundongoliiyo doi surgaa tukon Ikoo muputusiyo Komu ata-ata nia napalakala. Hukumemo modano konasalah pokonsikene konakakubai, tukon bebasenemo moakiyo konasalah.

³³Kalu naikon ko Israel miano mumian namusuh-musuh lungguiyomo tobikon napo lalim, doibundu yanila abali doi Ikoo tukon odotiiyomo Ikoo salaku TEMENENO, tukon doi bundu yanila lubat doi bonua kaleda nia tukon sambeang momangkabi ampun doi Koo,

³⁴boliisi Ikoo mundongoliiyo yanila doi surgaa. Boliisi Ikoo muompuniyo Komu mian nalalim nia tukon mubabayo yanila napo abali doi tano mo lapamo Ikoo beekene doi napo katurunan.

³⁵Kalu andeno Komu mian mobaladosa doi Koo tukon Ikoo ukume yanila tukon aki muobulusene koudan maka yanila nalubat mobadodoloon luwedoi napo lalim tukon yanila odotiiyo Ikoo salaku TEMENENO, tukon doibundu koidan yanila mangadap bonua kaleda nia tukon yanila sambeang doi Koo,

³⁶boliisi Ikoo doi surgaa mundongoliiyo yanila. Tukon ompuniyomokai Komu mian Israel miano nalalim tukon konapo tomundo. Otunggulkene doi yanila sulano napolakukene oila komo kana. Nalapa doiya oh TEMENENO, obulusenemo koudan naimutano nia, tano molapamo Ikoo beekene doi Mumian sulano nateali koonila sidutu-posidutukon.

³⁷Kalunaikon natano nia tinepak malaalan kai panakit, tukon kotatanaman-tatanaman mbombuul moonas lusake, panakiton kai kinaan betek, kai kalu naikon Komu mian linobosi musuh, kai tinepaki sesel,

³⁸boliisi Ikoo mundongoliiyo konapo sambeang. Kalu luwedoi mumian Israel miano daano komo susah konoano tukon sambeang doi Koo tukon tidekene kolimano taalikon doi bonua kaleda nia,

³⁹boliisi Ikoo doi mudungolan lalomo doi surgaa Mulengele tukon muompuniyo tukon mutulungiyo yanila. Tongo Ikoomo kai komo toiyo kobangkapi noano. Tobikon doiya lakukanggenemo sasamba komian pokokonoi tukon konakokubai-kokubai,

⁴⁰sulano Komu mian nataat doi Ikoo sidutu polong kona kalumbit yanila daano modungol doi lipu Ikoo mobeekene doimai turunan.

⁴¹Kalu daano komeeng komian molulubaton doi tano mo odoon yana lengele tentang Komubabasalan tukon tentang kolangge-langge minasaindinggon mo lapamo Ikoo lakukanggene doi Mumian, maka nalubat doi bonua kaleda nia sulano naodotiiyo Ikoo tukon nasambeang doi Ikoo,

⁴²

⁴³boliisi Ikoo doi surgaa Mundongoliiyo konapo sambeang tukon Mudaanekene konapo kakabi. Tukon kalu bunodoiya sasaibino kobangsa doi posaapon kodunia toiyo Ikoo tukon taat doi Ikoo pokakana Komu mian Israel miano. Yanila toiyo baikon nabonua nia Ikoo mokekendenge daanokai meeng kotampat bakaledaan motuuk doi Ikoo.

⁴⁴Kalunaikon Ikoo parentayo Komu mian sulano napoampakon polobosi molawane konamusuh, tukon inaandomokai konapo daanoan, yanila naikon mangadap doi kota Ikoo mopiliyomo nia tukon yanila sambeang sasalaane nabonua nia molapamo Ikoo bangune tuuk doi Koo,

⁴⁵boliisi Ikoo doi surgaa mundongoliiyo donapo sambeangoo, tukon Ikoo beekene kokamanangan doi yanila.

⁴⁶Kalu daano Komu mian mobaladosa doi Ikoo — konabisa-bisaan akiyokai komeeng komian moaki nabaladosa — maka tobikon Komu nggimalan Ikoo batadikenemo yanila musuh nalungguiyo, tukon yanila binaba salaku mian motinaan doi meeng kotano mo odoon kai loolani,

⁴⁷boliisi Ikoo mulengele konapo sambeang. Kalukai doi tanodoo yanila otinggale konapo lalim-lalim, tukon yanila sambeang doi Koo tukon yanila mangakukene baikon yanila lapamo baladosa tukon mokubai lokis, lengelemokai konapo sambeang, oh TEMENENO.

⁴⁸Kalukai doitanodoo yanila sanaang tukon bisa-bisa yanila mootinggale konapo lalim-lalim, tukon yanila sambeang doi Koo tukon mangadap doi tano nia Ikoo molapamo beekene doimai turunan, doi kota Ikoo molilike tukon nabonua kaleda nia mo lapamo Ikoo bangune motuuk doi Koo nia,

⁴⁹maka luwedoi Mudungolan doi surgaa siokai Ikoo mulengele konapo sambeang tukon Ikoo seseange yanila.

⁵⁰Ompuniyomo sasaibino konapo lalim tukon konapo kulokisan motuuk doi Koo, tukon kubaiyomo konapo musuh-musuh nakubaiyo yanila tukon monondok.

⁵¹Sabab yaniladoo daanokai Mumian susuumu Ikoo molapamo babayo tobuat luwedoi Mesir doi tano inaando yanila nasinakisaawan.

⁵²Boliisi Ikoo, oh TEMENENO Mian Bisa, siokai musidutu palaatikanggene Komu mian Israel miano tukon kotomundono. Tukon Ikoo sanaang molengele konapo sambeang sasamba luunggon napo makabi tulung doi Koo.

⁵³Ikoo, oh TEMENENO Mian Bisa, Ikoo lapamo lilike yanila luwedoi antara sasaibino kobangsa sulano nateali Mumian susuumu, pokakana komo lapamo Ikoo bantile doi yanila lolo doi Musa, doi tempo Muandanano komai tulunan natobuatan luwedoi Mesir.”

⁵⁴Bunomkai doiya Salomo nasambeangan tukon naladangganano kotuulo doi balabaan salaano tukon kolimano yana tidekene doi babo. Sambuno lapa doiya yana kokondongo

⁵⁵tukon alalo mobabasal yana mangkabi Mian Bisa nabalakaat motuuk doi sasaibino komian mopototongi idoo, konabantilano,

⁵⁶ “Ngginaalo ko TEMENENO mo lapamo mebee kaamanan doi Namian pokakana komo lapamo Yana dandikene lolo doi Musa dona peleleanidoo. Sasaibino komo monondok modandikenemo lapamo Yana tepatiyo.

⁵⁷Boliisi ko TEMENENO nda Mian Bisa naloolainge kita bunopokakana Yana naloolaingano konda katulunan. Boliisi Yana naaki naotinggale kita.

⁵⁸Boliisi Yana natealikene kita mian-mian mo setia doi Yana sulano nda sidutu tubo loingiyo Kona mongiasan tukon taat doi sasaibino koaturan tukon parenta mo lapamo beekene doi ndakatulunan.

⁵⁹Boliisi ko TEMENENO nda Mian Bisa, nasidutu neneeke naikon konda sambeang tukon nda kakabi mo lapamo yaku pelenggene nia doi Yana. Boliisi Yana nasidutu otudoikene Kona monondokan doi namian Israel miano tukon kotomundono tukon beekene doiyanila oilamo konapo pinalalukanggon sasamba kooloyo.

⁶⁰Tukon nabuno doiya sasaibino kobangsa doi dunia naikon toiyo baikon tongo TEMENENO susuungokai ko Mian Bisa, akiyo kobailonggon.

⁶¹Siokai komuyu, kona mian nasidutu setia doi TEMENENO, nda Mian Bisa tukon kita taat doi Naaturan-aturan tukon Kona parenta-parenta buno komo lapamo komuyu lakukene doi oloyo nia.”

⁶²Salataa lapa doiya Tomundo Salomo tukon sasaibino komian mo pototongi idoo yanila mososubakono sosubakon doi TEMENENO.

⁶³Komo tuuk sosubakon podamean Salomo mososubakon 22.000 kosapi tukon 120.000 kodomba. Bunomokai doiya tomundo tukon sasaibino konarayat namokubaiyan upacara baselaan TEMENENO Na Bonua.

⁶⁴Doi oloyodoo Salomo selayo taalikon tanga kobasaleano doi TEMENENO doo Na Bonua salaano. Doibundu doi basaleanodoo yana mososubakon mosinua, gandum mosinosubakon, tukon iyayon inakko motuuk doi sosubakon podamean. Sasaibino doiya sinosubakonggon idoo sabab kobalabaan mokinubai luwedoi tambaga todudul poipoisik sampe aki nausok sasaibino dososubakonoo.

⁶⁵Doi TEMENENO Na Bonua doo Salomo tukon sasaibino ko Israel miano yanila mokubai lamekanano ko Sandung Loon pitu kooloyo konakalumbit. Yanila lubat luwedoi daerah mo pokakana konaodoonan ko Loloon Hamat doi lembet polong doi napokalalatanan ko Mesir doi lalom.

⁶⁶Doi oloyo koaluno Salomo sumboliiyomo domian-mianoo namule. Yanila sasaibino nggaale yana doibundu yana abalimo doi napobonua tukon noanoila molaba, sabab sasaibino kobalakaat mo lapamo TEMENENO beekene doi Napeleleani Daud tukon doi bangsa Israel Namian.