Read Banggai 1 TOMUNDO-TOMUNDO 9 Bible Online

1 TOMUNDO-TOMUNDO 9 - Banggai bible

1 TOMUNDO-TOMUNDO 9

¹Sambuno Salomo alapayo mokekendenge ko TEMENENO Na Bonua tukon kotomundo nakamali tukon sasaibino kona binatetelikon,

² ko TEMENENO okitakene koidan kobutongo doiyana pokakana komo teali Gibeon.

³Ko TEMENENO bantile doiyana, “Komusambeang lapamo kulengele, tukon nabonua nia molapamo ikoo kekendenge budodoiya Yaku bantilemo baikon tealimo tampat motangalaas tuuk bakaledaan doi Yaku sidutu-posidutukon. Yaku sidutu palatikanggene tukon dagaiyo natampat nia.

⁴Kalu ikoo tulutiya-Ku tukon moloyos konoamu tukon jujur pokakana kotamamu Daud, tukon ikoo tataatiyo koaturan-aturan tukon Daku parenta-parenta,

⁵ maka Yaku naikon tapaatiyo Daku dandi doi tamamu Daud baikon konapau natumbu paisoboli kotulunan naikon sidutu parentayo ko Israel.

⁶Bai kalu ikoo kai mukatulunan totonggulunga-Ku tukon aki nataat doi aturan-aturan tukon doi Kuparenta-parenta tukon ikoo sosubaiyo kotemeneno-temeneno bailon,

⁷maka Yaku naikon siikayo Daku mian Israel miano naluwedoi tano molapamo Yaku beekene doi yanila. Yaku naikon otinggale koidan nabonua nia mo lapamo Yaku tataapkanggene teali tampat bakaledaan doiya-Ku. Doiyayaandomo ko Israel miano naikon tinotulai tukon kinokumbit.

⁸ Nabonua kaledaan nia naikon teali meeng kobonua lapono mo totombuni tobikon doiya sasamba komian moalon idoo naikon ngginggim tukon matakut. Yanila naikon bantile, ‘Bulaando ko TEMENENO mokubaiyo bunodoiya natano nia tukon nabonua nia?’

⁹Maka komian naikon timbiliyo, ‘Tobikon yanila otinggalemo ko TEMENENO, yanila na Mian Bisa, molapamo antekene konapo katulunan tobuat luwedoi Mesir. Yanila sosubaiyomo kotemeneno-temeneno bailon. Doiyamokai kosababpo tobikon ko TEMENENO naolubatene nabalaa nia doi yanila.’ ”

¹⁰Tomundo Salomo nabangunano ko TEMENENO na Bonua tukon kotomundo nakamali lua kolono kotaun konakalumbit.

¹¹Sasaibino kopakakaso luwedoi kayung kauwalu doi Libanon tukon kayung kauwalu biasa tukon sasaibino kopakakaso bailon mo luwedoi mosoni Tomundo Salomo napinalaluukanggon motuuk doi bangunanoo mo lapamo Tomundo Hiram beekene doiyana. Salataa lapamo dolimangoo, Tomundo Salomo beekenemo doi Tomundo Hiram kolua kokota doi wilayah Galilea.

¹²Sambuno lapa doiya Hiram ampakono mokitayo dokota-kotadoo mo bineekon doiyana, bai yana aki nasanaang.

¹³Yana bantile doi Salomo, “Utusonggu, buno naiyamokai kokaliangano dokota-kotadoo ikoo mobeekene doiyaku?” Doiyamokai kosababpo dadaerahdoo daanoon mobinantil Kabul.

¹⁴Lobian luwedoi 4.000 kokilogram komosoni Hiram molapamo kapatuwo doi Salomo.

¹⁵Tomundo Salomo maparenta tukon pakisaa doi tempo nabinangunan ko TEMENENO Na Bonua, tomundo nakamali, Yerusalem pagaro mobinetoon tukon tuuk batambunan buta taalikon lalom ko TEMENENO Na Bonua. Yana mapake kokubai mo pokakana koidan tuuk nabangunano koidan kokota Hazor, Megido tukon Gezer. (

¹⁶Kota Gezer doiyamo meeng kokota doi tempo looluk molinobosi tukon tomundo Mesir lungguiyo, maka kotumbuno inakate tukon sinua kokotano. Doibundu dokotadoo tomundo Mesir beekenemo doi naboine salaku palaseen doi oloyo nabanikaan tukon Salomo.

¹⁷Jado dokotadoo Salomo komo bangune koidan.) Tukon limang pinakisaan koidan, Salomo bangune koidan ko Bet-Horon-Hilir,

¹⁸Baalat, Taamar doi Yehuda padango moluas,

¹⁹kota-kota bangabosan kinaan, tukon kota-kota nainabosan kokereta polobosian tukon koada-adalano. Kotetel sasaibino motuuk doi bangunano ko Yerusalem, Libanon, tukon doi posaapon konawilayah kakuasaan lapamo yana laksanakanggene.

²⁰Tuuk limang pinakisaadoo Salomo parentakene komian-mian mokatulunan Amori miano, Het, Feris, Hewi tukon Yebus. Yanila nia daanokai bangsa Kanaan natulunan mo aki nalinaat inakate kabus luwedoi Israel miano salataa yanila nadungoliyano dolipudoo. Polong budodoiya konapo katulunan daanoon moteali ata.

²²Salomo aki natealikene ko Israel miano ata; tongo yanila tinugaskanggon salaku suludadu, suludadu kapalano, suludadu talengano, kereta polobosian komondaano, tukon suludadu pasukano momapake adalan.

²³550 Kopagawe mo binee tanggung jawab luwedoi mian-mian molakukanggene kolimang pinakisaa doi bubulando kokaliangano Salomo nalimang kinubai.

²⁴Kobuta taalikon doi lalom ko TEMENENO Na Bonua Salomo mosumboliikene mian mo timbuniyo salataa konaboloki, doiyamo tomundo Mesir naboine, biyol luwedoi kota Daud ampakon doi nakamali molapamo Salomo bangune.

²⁵ Tolu luunggon sataun Salomo namososubakon sosubakon mosinua tukon sosubakon podamean doi balabaan bunggono mo lapamo yana kekendenge tuuk doi TEMENENO. Yana koidan mosua kamangian motuuk doi TEMENENO. Bunomokaidoiya Salomo naalapaano ko TEMENENO Na Bonua.

²⁶Tuuk kona suludadu doi tobun, Tomundo Salomo mosumbolii mian-mian momokubai kapal-kapal doi Ezion-Geber, loolani ko Elot doi Minanga Akaba tokoluano, doi wilayah Edom.

²⁷Tomundo Hiram makapatu mian-mian mobalimang doi nakapal modaano konapangalaman tuuk doi talabutan polaing-laing Salomo namian-mian mobalimang doi nakapal.

²⁸Yanila biasa talabut doi tano Ofir tuuk yanila mondokii 14.000 kokilogram komosoni tukon yanila babakene doi Salomo.