Read Banggai 2 TOMUNDO-TOMUNDO 1 Bible Online

2 TOMUNDO-TOMUNDO 1 - Banggai bible

2 TOMUNDO-TOMUNDO 1

¹Salataa Ahab tomundo Israel matemo, kolipu Moab miano yanila lobosiyo kobangsa Israel.

²Daano kooloyo meeng Tomundo Ahazia moluwedoi Israel yana tuwong luwedoi nakamali doi Samaria doi tingkat babo gandariano, sampe kona pakol babasal tuuno. Sambuno buno doiya yana mosumboliimo bito-bito mo ampakon masadai doi Baal-Zebub, pilogot doi kota Ekron doi Filistin, oilakai yana naikon tangalin kai aki.

³Bai ko TEMENENO namalaekat sumboliiyo Elia, donabidoo mo luwedoi Tisbe sulano nataus mopososuunggene Tomundo Ahazia nabito-bitodoo sulano nabantile, “Oilakai doi Israel akiyo ko Mian Bisa sampe komuyu yase motaus mangkabi pongotunggul doi Baal-Zebub, pilogot doi kota Ekron doo?

⁴Pailukenemokai doi tomundo baikon ko TEMENENO bantile bunonaiya, ‘Ikoo aki naikon mutangalin, ikoo naikon mate!’ ” Salataa Elia laksanakanggene do TEMENENO doo naparenta,

⁵maka abalimokai dobito-bitodoo doi tomundo, maka dotomundodoo sadaiyo yanila, “Bulaando komuyu moabali?”

⁶Yanila timbiliyo, “Meeng komala-malane yana lubat pososuunggene kami, tukon sumboliiyo mai abali sulano mai pailukene doi Tuan baikon ko TEMENENO bantile bunonaiya doi Tuan, ‘Oilakai doi Israel akiyo ko Mian Bisa, sampe ikoo mosumbolii mangkabi pongotunggul doi Baal-Zebub, pilogot doi kota Ekron? Ikoo aki naikon mutangalin, ikoo naikon mate!’ ”

⁷Tomundo sadaiyo yanila, “Bulaando kondondoongo domianoo?”

⁸ Yanila timbiliyo, “Konajubah tukon konapabaang doi owako luwedoi kulit.” Dotomundodoo bantile, “Oh, doiya Elia!”

⁹Salataa lapa doiya yana mosumbolii lima kolono kosuludadu tukon meeng kokapalano maka yanila taus molakoyo Elia. Dosuludadudoo kapalano tauso mopososuunggene Elia mo daanoon moosulang doi meeng kobunggul bunggono. Maka dosuludadudoo kapalano bantile, “Eh, Mian Bisa napeleleani, tomundo parentayo ikoo muobulus!”

¹⁰ Elia timbiliyo, “Kalu yaku nia tutuu Mian Bisa napeleleani, siokai kobilat naobulus luwedoi timbu tukon nasuayo kabus ikoo tukon sasaibino komu pololaing!” Salataa lapa konabantilan obulusokai kobilat mo luwedoi timbu tukon suayo dosuludadudoo kapalano tukon dona pololaingoo mo lima kolono.

¹¹Maka dotomundodoo utuse komeeng kosuludadu kapalano bailon polaing-laing kolima kolono koidan konapololaing. Yanila ampakon tukon bantile doi Elia, “Eh, Mian Bisa napeleleani, tomundo parentakene ikoo muobulus diabudoo nia koidan!”

¹²Elia timbiliyo, “Kalu yaku tutuu Mian Bisa napeleleani, siokai kobilat naobulus luwedoi timbu tukon nasuayo kabus ikoo tukon sasaibino pololaing!” Salataa lapa konabantilano bunodoiya obulusokai kobilat moluwedoi Mian Bisa tukon suayo kabus dosuludadudoo kapalano tukon dona pololaingoo molima kolono.

¹³Doibundu koidan dotomundodoo utuse komeeng kosuludadu kapalano polaing-laing tukon lima kolono kona pololaing. Dosuludadudoo kapalano yana tolibo doi bunggul bunggonodoo tukon salataa yana polong doi Elia salaano yana ladanggene kotuulo tukon bantile, “Ompuniyomokai kami, oh Mian Bisa napeleleani! Mamaasikanakukai tukon sasaibino dakupololaing. Inai moakateyo kami!

¹⁴Lua dosuludadudoo kapalano mobailon polaing-laing tukon pololaing yanila mate tosua aung mo luwedoi timbu, bai yaku kabiyo, mamaasikanakukai!”

¹⁵Doi tempodoo koidan bantilokai ko TEMENENO Namalaekat doi Elia, “Inai matakut! Laingemokai Yana moobulus luwedoi bunggul nia bunggono.” Tobikon doiya Elia tukon dosuludadudoo kapalano yanila taus doi tomundo.

¹⁶Maka Elia bantile doi tomundo, “Ko TEMENENO bantile, ‘Ikoo moumbolii mian momangkabi otunggul doi Baal-Zebub pilogot doi kota Ekron bunopokakanakai doi Israel moakiyo ko Mian Bisa mo moola nasinadai. Tobikon doiya ikoo aki naikon mutangalin, ikoo naikon mate!’ ”

¹⁷Sambuno lapa doiya maka matemokai Ahazia pokakana komo lapamo TEMENENO bantile lolo doi Elia. Sabab Ahazia akiyo konapau mala-malaneno, maka koutuso Yoram teali tomundo mosoboliyo Yana. Doiya kona tealian doi taun koluano Yerobeam Yosafat napau nabapamarentaan, natealian tomundo doi Yehuda.

¹⁸Kosalitano bailonggon tentang oilamo Tomundo Ahazia nalinakukanggon lapamo tinulis doi Tomundo-tomundo Israel Nabuku Tundun lalomo.