Read Banggai 2 TOMUNDO-TOMUNDO 10 Bible Online

2 TOMUNDO-TOMUNDO 10 - Banggai bible

2 TOMUNDO-TOMUNDO 10

¹Tomundo Ahab daanoon kopitu kolono konapau tumbu doi kota Samaria. Tobikon doiya Yehu makapatu surat doi Samaria, doi sasaibino komo teali wali doi Ahab napau tumbu tukon doi sambu-sambu tukon pau-pau lakai doi kotadoo. Dosuratoo bunonaiya konabantilano,

²“Ahab napau tumbu daano doi popangawasan lalomo, tukon komuyu daano kopo roda polobosian, adalan, sinapan tukon kota modaano konabenteng. Tobikon doiya, salataa komuyu talimayo nasurat nia,

³pomosobit molilik komo monondok tuuno luwedoi antara Ahab napautumbudoo tukon poodudukemo nateali tomundo, maka pokakaate mobelayo yana.”

⁴Kosambu-sambu doi Samaria teali matakut. Yanila bantile, “Tomundo Yoram tukon Tomundo Ahazia aki namoola lawane Yehu, baimokai kita nia!”

⁵Tobikon doiya komo kapalaiyo kokamali tukon walikota tukon pau-paulakai tukon sasaibino komo teali wali Ahab napau tumbudoo yanila sasaibino pomeenggon momakapatu nabilita nia doi Yehu tukon donapo suratoo bunonaiya konabantilano, “Kami taaluuk doi Tuan tukon kami sanaang motalimayo oilamo tolong Tuan napinalentakon doikami. Kami aki mai mobingkat indee komianokai komo teali tomundo. Lakukanggenemokai komo monondok pokokonoi nainiyas.”

⁶Doibundu Yehu makapatu surat koidan doi yanila, konabantilano bunonaiya, “Kalu komuyu ala doiyaku, tukon basadia motulutiyo dakuparenta-parenta, poakateyomo doi Ahab napautumbudoo, tukon namodowa doi tempo pokakana naiya babayomokai koolu-olunoila doi yaku doi Yizreel.” Tomundo Ahab napau tumbu mo pitu kolonodoo yanila dungol doi pau-paulakai doi kota Samaria, tukon yanila komo pialayo.

⁷Salataa yanila talimayo doi Yehu nasurat, dopau-paulakai doi kota Samaria yanila akateyomo doi Tomundo Ahab napau tumbu mo pitu kolonodoo maka kopai olunoila inusokon doi bois lalomo tukon yanila kapatuwomo doi Yehu doi Yizreel.

⁸Salataa dolanggedoo pinopitoikon doi Yehu, yana maparentakenemo sulano Tomundo Ahab napau tumbu oluno-olunodoo napinosusunikon teali lua kotambuno doi kota tataapono babasal, tukon binatadikono idoo polong dodowa.

⁹Dowa-dowasoono tobuatokai Yehu doi tataapon babasaloo; maka nabantile doi mian-mian mo pototongi idoo, “Yakumokai komo posokongi molawane Tomundo Yoram tukon akateyo yana; komuyu akiyo kopo sala doi langgedoo. Bai sasaibino namian nia bolikon yaku komo akateyo.

¹⁰Naiyamokai kobukutiino baikon sasaibino ko TEMENENO nabinatil tentang Ahab napau tumbu naikon teali. Ko TEMENENO lapamo laksanakanggene oilamo ko nabinantil lolo doi Napeleleani Elia.”

¹¹ Doibundu Yehu akateyo sasaibino Ahab puli-pulino bailonggon modungol doi Yizreel, tukon sasaibino kopagawe, kotula-kotulano naposobatan, tukon kona imam-imam; akiyokai komeeng komian mo binatadikon tubo.

¹²Yehu otinggale ko Yizreel maka naampakon doi Samaria. Doi loloon tanga, doi tampat mosinombuikon “Pototooli nabasandungan”,

¹³yana pososuung tukon moimoiya tomundo Ahazia puli-pulino. Yana mansadai, “Komuyu indee miano?” Yanila timbiliyo, “Kami Ahazia puli-pulino, kami ampakon doi Yizreel moduutiyo sasaibino tomundo nakaluargaa tukon Tomundo boine Izebel napau tumbu.”

¹⁴Yehu parentayo kona suludadu tukon bantile, “Lakoyo yanila tukon inai poakateyo!” Maka linakomo domian-mianoo, maka yanila inakate doi naloolanian komeeng kobubung momootimo, yanila sasaibino sangkap kolono lua komian. Akiyo komeeng komiankai mobinatadikon tubo.

¹⁵Yehu banggadudukene konaampakonan. Doi loloon tanga, Yonadab, Rekhab napau sambute yana. Yehu beena salam doi yana tukon bantile, “Baanggokai naikita nia aki nda pomeenggon noa? Kai ikoo yase mosokongiyo yaku?” Yonadab timbiliyo, “Oode!” Yehu bolosiyo, “Kalu buno doiya, mai nda pokanggi lima.” Doibundu yanila pokanggimo lima, tukon Yehu tulungiyo Yonadab maka yana lakito doi naroda lalomo, maka bantile,

¹⁶“Mai mumalaing tukon ikoo susuumu sakisiiyo bulaando daku kokubai mo tuuk doi TEMENENO.” Maka yanila polaing-laing lakit roda ampakon doi Samaria.

¹⁷Salataa yanila polong indaa Yehu akateyomo sasaibino Ahab puli-pulino, akiyo komeeng komiankai mo totinggal. Dolanggedoo teali pokokonoi oila ko TEMENENO nabintil doi Elia.

¹⁸Yehu sumboliiyo ko Samaria tumbuno napototongi maka yana bantile, “Tomundo Ahab aki naiyase mosomba doi pilogot; tadukai yaku komo yase.

¹⁹Tobikon doiya pototongikenemokai sasaibino kotalapu-talapu tukon komian mososubaiyo tukon koimam-imam; tukon akiyo komeeng komiankai mo totinggal. Yaku naikon mososubakon sosubakon mo babasal motuuk doi Baal. Inde moaki nalubat naikon hinukum mate.” Bai doiya meeng kosiasat luwedoi Yehu moakateo saibino mosasubayo ko Baal.

²⁰Yehu mebee parenta nia: “Tantukeneno meeng kooloyo kusus tuuk sosubayo ko Baal!” Maka mian tantukeneno oloyo doo

²¹tukon Yehu umumkanggenemo doi posaapon ko Israel. Doi oloyo doo lubatokai sasaibino komo sosubaiyo kopilogot, akiyo komeeng komiankai komo totinggal. Yanila usok doi talapu nabonua bapulian tukon moono dobonuadoo luwedoi salaano polong doi tonggulungo.

²²Yehu maparentakene sulano komo uluse kopakean-pakean doi bonua bapulianoo sulano napo beekene dopakean-pakeanoo sosubaan doi mian-mian mo lubat sulano nasosuba doi pilogot. Sambuno lapa linaksanakanggon doparentadoo,

²³Yehu usokiyomo dobonua bapulianoo polaing Yonadab Rekhab napau, tukon bantile doi mian-mian modaano idoo, “Popalesayokai tukon potolitiyo oilakai sasaibino namian nia molubat tongo mososubaiyo kopilogot. Ina-inaikene nadaano naimbaa komo sosubaiyo ko TEMENENO.”

²⁴Maka Yehu tukon Yonadab mososubakono sosubakon doi Pilogot. Doi geduungoo tonggulungo, Yehu lapamo mongusol 80 kopengawal tukon suludadu kapalano. Yana koidan lapamo beena parenta doiyanila, “Komuyu sio poakateyo sasaibino domianoo. Indee komo batadikene daano komeeng komian moluwedoi yaniladoo momoola bulenggene kobutongo, naikon inakate!”

²⁵Tukon mosobit salataa Yehu mososubakon sosubakon, yana tobuat tukon bantile doi sasaibino kona suludadu-suludadu kapalano tukon sasaibino dopengawaloo, “Pousokokai tukon poakateyo yanila yanila sasaibino. Inai pobatadikene nadaano komeeng komiankai mo luput!” Sambuno mobantile bunodoiya maka yanila usoko tukon makanggi bakoko tukon yanila akateyomo sasaibino komian idoo, maka yanila tandane dobajan-bajanoo doi tonggulung. Doibundu yanila usok doitambiikon dobonuadoo bapulian lalomo,

²⁶tukon yanila tobuatenemo kopilogot timbalango maka napo suayo.

²⁷Dotimbalangoo inakamanas potololokon kobonuano maka dotampatoo tinealikon kakus polong doi oloyo nia.

²⁸Bunomokaidoiya Yehu naakateyano kabus komian-mian mososubaiyo kopilogot doi Israel.

²⁹ Tobikon doiya ko TEMENENO bantile bunonaiya doi Yehu, “Sasaibino daku pinalentakon doikoo sulano mulakukanggene tuuk doi Ahab nakatulunan lapamoikoo laksanakanggene. Tobikon doiya yaku paladandi baikon komupau tumbu polong katulunan kosanggapo naikon teali tomundo doi Israel!” Bai Yehu aki natootubo konoano motaatiyo ko TEMENENO naukum, Israel na Mian Bisa. Yana tongo tulutiyo Yerobeam nakokubai mokubaiyo ko Israel miano baladosa tukon yanila sosubaiyo kosapi mosoni timbalango yana moekekendenge doi Betel tukon doi Dan.

³²Doiya kotempono ko TEMENENO tambuunemo mopoipoisike ko Israel nalipu. Hazael tomundo doi Siria kuasaiyomo sasaibino ko Israel lipuno doi taambikon tolopot ko Yordan Paisunobatango

³³polong doi taambikon lalom pokakana kona odoonan kokota Aroer loolani ko Arnon Paisunobatango, tongusokon ko Gilead tukon Basan lipuno, Gad nabenseno natampat dungolan, Ruben tukon Manasye nabenseno taambikon doi tolopot.

³⁴Kosalitano bailonggon mengenai Yehu, tongusokon konajasa-jasa batalengaan, lapamo tinulis doi Tomundo-tomundo Israel Nabuku Tundun lalomo.

³⁵Yehu maparenta salaku tomundo doi Israel 28 lua kolono alu kotaun konakalumbit. Yana mate tukon tinadin doi Samaria. Maka konapau Yoahas teali tomundo mosoboliyo yana.