Read Banggai 2 TOMUNDO-TOMUNDO 11 Bible Online

2 TOMUNDO-TOMUNDO 11 - Banggai bible

2 TOMUNDO-TOMUNDO 11

¹Salataa Atalya toiyomo baikon Tomundo Ahazia, napau, momatemo, yana maparentakenemo sasaibino Ahazia nakaluargaa sulano nainakate.

²Yoas Ahazia napau yana adukon inakate koidan pososinggat kotomundo namalane bailonggon, bai yana luput sabab yana sinalamaton luwedoi napiipi Yoseba, Yoas tukon komo pialayo yana yanila binaba tukon sinookon doi meeng kokombiang mooloan doi TEMENENO Na Bonua.

³Noom kotaun konakalumbit Yoseba napialaano dopaudoo doi TEMENENO Na Bonua lalomo doi tempo Atalya namaparentaan salaku tomundo boine.

⁴Doi taun kopituno, sasaibino kosuludadu kapalano padagai tomundo boine napilibadi tukon sasaibino kopadagai kamali Imam Yoyada uwange yanila sulano napososuung tukon yana doi TEMENENO Na Bonua. Indaa yana sumboliiyo yanila batotopi sulano napo laksanakanggene konatetel. Yana tudoikene Yoas. Tomundo Ahazia namalane, doiyanila,

⁵tukon beena parenta doiyanila, “Kalukai komuyu batugas doi oloyo Tadean, soobos tolu doi komuyu sio nabadagai doi kamali,

⁶kosoobos koidan sio nabadagai doi Sur tataapono babasal, tukon kolabino sio nabadagai doi tataapon babasal pongawal-pongawal bailon tonggulungo.

⁷Looluakon domianoo tambuno molapamo lapa konatugas doi oloyo Tadean, siokai napo badagai doi TEMENENO Na Bonua tukon bakoko moaki namapake salung sulano napo dagaiyo Tomundo Yoas. Komuyu sio poloolainge yana doiyaando konaampakonan, tukon sasamba komian mo sosobayo koolaniyo komuyu, komuyu sio poakateyo.”

⁹Sasaibino dosuludadudoo kapalano yanila taatiyo Yoyada naparenta tukon babakene doi yana konapai suludadu mo batugas tukon komo lapamo lapa konatugas doi oloyo Tadeanoo.

¹⁰Yoyada beekene doi suludadu-suludadu kapalanodoo Tomundo Daud nakalait-kalait tukon natombinde-tombinde mo inabos doi TEMENENO Na Bonua.

¹¹Maka sasaibino kopengawal, suwe-suwele mataani bakoko moakiyo kosalungo, yanila mangala tampat potikunggon taambikon doi salaano doi TEMENENO Na Bonuadoo namoola aman.

¹²Sambuno lapa doiya Yoyada babayo Yoas doi tonggulung, maka yana obosikene kosogo batomundoan doi oluno, tukon salakanggene doi yana ko Mian Bisa Nabuku Ukum. Yoas linantik salaku tomundo tukon dolanggedoo inumumkanggon doi rayat. Sasaibino korayat balaup-laup tukon wowookon tukon yanila bantile, “Tubo kotomundo!”

¹³Tomundo boine Atalya lengele sasaibino kopengawal tukon rayat alalo mo wowookon. Yana moso-sobit ampakon doi TEMENENO Na Bonua, sabab idoo daano badaang komian mo pototongi.

¹⁴ Yana kitayo dotomundo booludoo mokokondong doi tataapon usokiyano ko TEMENENO Na Bonua tukon idoomo konalinantikan, tukon yana tinikum suludadu-suludadu kapalano tukon mian-mian mopuuke kotorompet. Sasaibino korayat wowookon labalaba tukon yanila puuke kotorompet. Atalya nggimal tukon siake konapakean, tukon nggeleamon, “Khianat! Khianat!”

¹⁵Yoyada aki napataikene Atalya nainakate doi naloolanian ko TEMENENO Na Bonua, jadi yana bantile doi sasaibino kosuludadu kapalano, “Babayomokai yana doi tonggulung loloiyo loloiyo kopangawal nabarisan tukon poakateyo indee komo kakaate mosalamatene yana.”

¹⁶Yanila lakoyo yana, maka napo babayo doi kamali. Yana inakate indaa doi tataapon Adalan Babasal salaano.

¹⁷Imam Yoyada sumboliiyo Tomundo Yoas tukon rayat sulano napo mokubai perjanjian tukon TEMENENO baikon yanila naikon teali TEMENENO Naumat. Yana koidan sumboliiyo tomundo namokubai perjanjian tukon rayat.

¹⁸Sambuno lapa doiya sasaibino korayat lobosiyo tukon manase ko Talapu nabonua bapulian. Ko Balabaan tukon kotimbalang-timbalang minanas tukon Matan, Talapu kapalano inakate doi balabaan-balabaanoo salaano. Yoyada tugaskanggene kopengawal sulano nadagaiyo ko TEMENENO Na Bonua,

¹⁹maka yana polaing sasaibino kosuludadu kapalano, sasaibino kotomundo napengawal pelibadi tukon sasaibino kokamali pangawalo tukon sasaibino korayat yanila loolainge tukon antekene Tomundo Yoas luwedoi TEMENENO Na Bonua ampakon doi kamali. Yoas usok loloiyo kotataapon Pongawal Babasal, maka yana osulang doi kulusii batomundoan bungkono.

²⁰Sasaibino korayat labalaba, kokotakai aman sabab Atalya inakatemo.

²¹Doi tempo Yoas natealian tomundo doi Yehuda kona umur sodo pitu kotaun.