Read Banggai 2 TOMUNDO-TOMUNDO 12 Bible Online

2 TOMUNDO-TOMUNDO 12 - Banggai bible

2 TOMUNDO-TOMUNDO 12

¹Doi taun kopituno Yehu nabapamarentaan doi Israel, Yoas tealimo tomundo doi Yehuda. Yana maparenta doi Yerusalem 40 kotaun konakalumbit. Kotinano kosambuno Zibya luwedoi kota Bersyebe.

²Tukon balakaat Imam Yoyada nadidikan, Yoas doi tempo natuboan yana sidutu lakukanggene kolangge-langge mo sanaanggene ko TEMENENO noano.

³Tongo komo sineanggon, kotampat balambeaan aki na minanas, sampe korayat daanoon mososubakon sosubakon tukon mosua kamangian idoo.

⁴ Daano kooloyo meeng Yoas uwange sasaibino ko imam tukon yana sumboliiyo yanila abese kodoy mo linaat luwedoi sosubakon-sosubakon doi TEMENENO Na Bonua, mau doy pebeal laksanakangganano kososubakon, maukai doy nasar.

⁵Sasamba koimam sio natanggung jawape luwedoi doydoo mo lapamo sinosubakon luwedoi mian-mian momeleleani. Dodoydoo naikon pinake tuuk kindokano ko TEMENENO Na Bonua pakakaso bailonggon mo manaso.

⁶Polong doi taun kolua kolonono tolu Yoas namaparentaan, sasaibino koimam akiyoon koidan yanila nakindendeke ko TEMENENO Na Bonua nalusakan.

⁷Tobikon doiya Yoas uange Imam Yoyada tukon imam bailonggon, tukon yana bantile, “Bulaando komuyu moakiyoon koidan pokindendeke ko TEMENENO Na Bonua? Tambuun doi oloyo nia komuyu akimo popinataikon moabese kodoy komuyu motalimayo. Sasaibino sio posalakanggene tuuk kindondokano ko TEMENENO Na Bonua.”

⁸Dopai imam-imamoo setuju sulano yanila akimo koidan namokombul doy moluwedoi rayat, tukon akimo koidan napo balatanggung jawab doi kindondokano ko TEMENENO Na Bonua.

⁹Maka Imam Yoyada mangala meeng kopeti derma tukon mokubaikene buango doi potutupino, maka yana abese doi naloolanian ko balabaan doi tataapon tambikon bakalinga kousokiyano ko TEMENENO Na Bonua. Sasaibino kodoy mo sinosubakon doi TEMENENO Na Bonua doiya sasaibino koimam-imam mo batugas doi tataapon usokan yanila usekene doi peti dermadoo lalomo.

¹⁰Sasamba luunggon kalu kodoy doi peti dermadoo badaango, tomundo nadulutulis tukon Imam Babasal yanila lubat tukon aite dodoydoo, maka napo bungkuse.

¹¹Salataa koaito lapamo yanila tulise, dodoydoo sinalakanggono doi sasaibino kopengawas poli-polimang pokindok doi TEMENENO Na Bonua doo. Koikoidan sasaibino dopengawasoo yanila beale sasaibino kotukang kayung natambo, kotukang mokubaiyo kobonuano,

¹²kotukang batu tukon pobuanga batu. Tukon koidan sasaibino dopengawaso komo mongoli kayung tukon batu, tukon komo atule sasaibino kodoy mobinalukon motuuk doi kindondokano do TEMENENO Na Bonua doo.

¹³Bai dodoydoo mau natongo soisikai aki napinake tuuk kinubai sasanggil-sasanggil perak, tolompet, lampu-lampu pakakaso kai pakakas bailonggon moluwedoi mosoni kai perak.

¹⁴Sasaibino kinubai pebeal doi tukang-tukang tukon kinubai pongoli bahan-bahan bangunan mo pinalaluukanggon.

¹⁵ Sasaibino dopengawas balimanganoo yanila jujur tuuno, jadi aki napalaluu kinabi kolapulano dodoydoo moluwedoi yanila.

¹⁶ Kodoy moluwedoi sosubakon posoboli lugi tukon komo luwedoi sosubakon poompuni lalim aki nainusokon doi peti dermadoo lalomo. Dodoydoo bineekon doi imam-imam.

¹⁷Doi lounudoo Hazael tomundo Siria lobosiyo tukon dudukiyo kokota Gat. Maka yana batetel molobosiyo ko Yerusalem koidan.

¹⁸Doibundu Yoas makapatu doy posoboli doi yana. Dodoydoo yana laate luwedoi sasaibino kososubakon mo doi loolukonoo molapamo sinalakanggon doi TEMENENO luwedoi Yoas susuungo, tukon luwedoi Yosafat, Yoram tukon Ahazia, tukon nai yanila nia doiyamokai kotomundo mobalimang tumbe tukon yana. Koidan luwedoi mosoni modaano doi kaas lalomo doi TEMENENO Na Bonua tukon kotomundo nakamali. Maka Hazael aki nateali lobosiyo ko Yerusalem.

¹⁹Doibundu Yehuda nabatomundoan pagawe-pagaweno yanila yanila pomeenggon molawane Tomundo Yoas. Lua komian moluwedoi yanila, doiyamo Yozakar Simeat napau, tukon Yozabat Somel napau, yanila akateyo Yoas doi meeng kobonua mo binangun doi buta natinambunan bunggono taambikon doi tolopot ko Yerusalem, doi loloon moobulus doi Sila. Yoas tinadin doi tomundo-tomundo natinadinan doi Daud nakota. Napau Amazia teali tomundo mosoboliyo yana. Kosalitano bailonggon mengenai Tomundo Yoas lapamo tinulis doi Tomundo-tomundo Yehuda Nabuku Tundun lalomo.