Read Banggai 2 TOMUNDO-TOMUNDO 13 Bible Online

2 TOMUNDO-TOMUNDO 13 - Banggai bible

2 TOMUNDO-TOMUNDO 13

¹Doi taun kolua kolonono tolu Yoas Ahazia nabapamarentaan doi Yehuda, Yoahaz Yehu napau tealimo tomundo doi Israel, tukon yana maparenta doi Samaria songulo pitu kotaun konakalumbit.

²Pokakana Tomundo Yerobeam mo maparenta moakiyoon yana namaparenta, Yoas koidan baladosa doi TEMENENO tukon mangaanikene ko Israel miano baladosa koidan. Yana aki naotinggale konakokubai-kokubai mo lokis.

³Tobikon doiya ko TEMENENO nggimoliiyo ko Israel sampe yana batadikene Hazael tomundo Siria tukon napau Benhadad, badaang luunggon nalungguiyo ko Israel.

⁴Maka Yoahas basambeang doi TEMENENO, tukon TEMENENO lengele donasambeangoo, sabab ko TEMENENO kitayo bulaando konakulokisan kotomundo Siria napipiikano ko Israel miano.

⁵Ko TEMENENO beekene doi Israel miano komeeng kokatua moosodiiyo yanila luwedoi Siria nakakuasaan sampe yanila tubo amana pokakana doi napo tuboan tumbeno.

⁶Maukai nabuno doiya ko Israel miano aki natade molakukanggene kolalim-lalim mo inatambuun luwedoi Tomundo Yerobeam. Yanila banggadudul molakukanggene dolalim-lalimoo, tukon yanila tongo batadikene ko Asyera Pilogot boine timbalango natataap daano doi Samaria.

⁷Ko Israel nasuludadu lapamo tomundo Siria lopuwo sampe Tomundo Yoahas konasuludadu mopake adalan tongo lima kolono, 10 koroda polobosian, tukon 10 kosuludadu.

⁸Kosalitano bailonggon mengenai Tomundo Yoahas tukon sasaibino konajasa batalengaan tinulis doi Tomundo-tomundo Israel Nabuku Tundun lalomo.

⁹Yana mate tukon tinadin doi Samaria. Konapau Yoas teali tomundo mosoboliyo yana.

¹⁰Doi taun kotolu kolonono pitu Tomundo Yoas nabapamarentaan doi Yehuda, Yoas Yoahas napau tealimo tomundo doi Israel tukon maparenta doi Samaria 16 kotaun konakalumbit.

¹¹Yana koidan baladosa doi TEMENENO sabab loingiyo Tomundo Yerobeam nakulokisan mo lapamo mangaanikene ko Israel miano mokubai lalim.

¹²Kosalitano bailonggon mengenai Tomundo Yoas, tongusokon kona batalengaan doi polobosian lalomo molawane Amazia tomundo Yehuda, tinulis doi Tomundo-tomundo Israel Nabuku Tundun lalomo.

¹³Yoas mate tukon tinadin doi batadinan tomundo doi Samaria. Konapau Yerobeam II teali tomundo mosoboliyo yana.

¹⁴ Daano kotempo meeng Nabi Elisa masakit sosoonggon, tukon Tomundo Yoas lubat moduutiyo yana. Salataa Yoas kitayo Elisa adukono mate, yana kokiil tukon bantile, “Tamanggu, Israel napembela mo babasal!”

¹⁵“Alayomokai kopana batango tukon panano!” Elisa naparenta doi yana. Doibundu Yoas alayomo,

¹⁶maka Elisa sumboliiyomo yana mobato-batotobo sulano namapana. Dotomundodookai batotobomo, tukon Elisa abese kolimano doi tomundodoo limano bungguto.

¹⁷Doibundu pokokonoi tukon donabidoo naparenta, dotomundodoo bukayo kolombong-lombong mo sasalaan doi Siria. Doibundu Elisa bantile, “Lapaasemokai komupana!” Tukon mosobit salataa dotomundodoo lapaase dopanadoo, donabidoo nggeleamon tukon bantile, “Ikoomokai ko TEMENENO napana. Tukon donapanadoo ko TEMENENO naikon lungguiyo ko Siria. Ikoo naikon polobosi lawane ko Siria doi Afek tukon ikoo lungguiyo yanila.”

¹⁸Elisa sumboliiyo Tomundo Yoas moalayo konapana-pana bailonggon tukon yana umbasene doi buta. Dotomundodoo umbase kobuta tolu luunggon, maka natade.

¹⁹Elisa nggimal, tukon bantile, “Konatutuuwan ikoo sio muumbase polong lima kai noom luunggon, sampe ikoo moola akamanase kabus kobangsa Siria. Bai budodoiya ikoo tongo tolu luunggon mulungguiyo yanila.”

²⁰Aki namalumbit doibundu Elisa matemo tukon tinadino. Doi lounudoo komusuh-musuh moluwedoi Moab sidutu molobosiyo kotano Israel idan luunggon sataun.

²¹Daano kooloyo meeng doi tempo daano komoimoiya komian modaanoon momatadin mian mo mate, sosinggoton yanila mokitayo komusuh moluwedoi Moab molubat. Banggadudul yanila mosakukene dobajanoo doi Elisa nakinibulan lalomo maka yanila bulen. Sambuno dobajanoo tosinggilikon doi Elisa bajano bukuno, dobajanoo polaing tubo koidan maka kokondong.

²²Popupuson Yoas nabapamarentaan, Hazael tomundo doi Siria lailainggene ko Israel miano.

²³Bai ko TEMENENO seange konaumat tukon ompuniyo konapai lalim. Yana aki naiyase mobatadikene yanila nainakate kabus bai yana tulungiyo yanila, sabab naperjanjian tukon Abraham, Ishak tukon Yakub. Polong budodoiya ko TEMENENO aki natoliminggene konamian.

²⁴Doibundu Hazael tomundo doi Siria matemo, tukon napau Benhadad komo teali tomundo.

²⁵Maka Yoas tomundo doi Israel lungguiyomo Benhadad tolu luunggon tukon alayomo koidan kokota-kota mo lapamo Benhadad lambase doi tempo Tomundo Yoahas Yoas tamano nabapamarentaan.