Read Banggai 2 TOMUNDO-TOMUNDO 14 Bible Online

2 TOMUNDO-TOMUNDO 14 - Banggai bible

2 TOMUNDO-TOMUNDO 14

¹Doi taun koluano Yoas Yoahas nabapamarentaan doi Israel, Amazia Yoas napau tealimo tomundo doi Yehuda.

²Doiya kosinggato yana kona umur lua kolonomo lima kotaun, tukon yana maparenta doi Yerusalem lua kolono siyo kotaun konakalumbit. Kotinano doiyamo Yoadan moluwedoi Yerusalem.

³Amazia lakukanggene kolangge-langge mosanaanggene ko TEMENENO noano, bai yana aki napokakana Daud, konatauwa.

⁴Pokakana kotamano, yanakai aki namase kotampat-tampat basosubaiyan pilogot, sampe korayat banggadudul momeenggon mososubakon sosubakon tukon mosuwa kamangian indaa.

⁵Mosoisobit salataa bukuan konakadudukan, Amazia ukume mate kopagawe-pagawe moakateyo kotamano.

⁶ Bai dopagawe-pagawedoo napau-pau aki nainakate, sabab yana loingiyo ko TEMENENO Naparenta doi Musa nabuku lalomo mobantile buno naiya, “Inai moukume mate konaorangtua sabab kokulokisanoo napai labuk-labuk komo lakukanggene, tukon inai moukume mate kolabuk-labuk sabab kokulokisanoo naorangtua komo lakukanggene. Sasamba komian tongo moola inukum mate sabab yana komo lakukanggene kokulokisan susuungo.”

⁷Doi meeng kopolobosian lalomo, Amazia mangakate 10.000 kosuludadu moluwedoi Edom doi Asin Pepelako, tukon lambase kokota Sela. Dokotadoo yana sombuikene Yokteal. Polong bunodoiya dokotadoo dokotadoo tataap kosambuno Yokteel.

⁸Doibundu Amazia makapatu bitobito doi Yoas tomundo Israel sulano nalawane yana doi polobosian lalomo.

⁹Bai Tomundo Yoas tongo kapatuwo kona potimbili. “Daano kotempono meeng komosolot palasoniton doi Libanon Bunggulo kapatuwo nabilita nia doi kauwalu batango tukon bantile, ‘Eh kauwalu batango, beekenemokai doi kupau komupau boineno sulano nateali naboloki.’ Bai doibundu alonokai idoo komeeng koiyayon mosolot mo pipiike domosolotoo mosoniton.

¹⁰Ikoo, Amazia, todudul banggabanggaal, sabab ikoo lapamo lungguiyo ko Edom miano. Jadi, bolikonkai domu kamananganoo lapamo sukup? Konamondokan ikoo dungolo tolong doi bonua! Tuuk oila ikoo momoumbolii langge-langge mo tongo naikon osilakayo kobutomu tukon murayat?”

¹¹Bai Amazia tomundo Yehudadoo aki namopusinggon Yoas tomundo Israel nabantilan-bantilan. Tobikon doiya, Tomundo Yoas tukon nasuludadu yanila taus doi Bet-Semes doi Yehuda tukon yanila polobosi tukon Amazia indaa.

¹²Kosuludadu Yehuda tukon sasaibino konasuludadu linungguimo tukon yanila bulen doi nabonua suwe-suwele.

¹³Yoas lakoyo Amazia, maka ampakon doi Yerusalem tukon yana baakemo dokotadoo pagaro mobinetoon konakobulus aki nakulang akinalobian lua kosakato kometer, tambuun doi Tataapon Efraim Babasal polong doi Tataapon Babasal Pasuno.

¹⁴Sasaibino komosoni tukon perak tukon sasaibino kopakakas mo linaat doi TEMENENO Na Bonua, tukon koidan sasaibino kobuat doi kamali, talalaing moimoiya komian pomain sandera Yoas babayo doi Samaria.

¹⁵Kosalitano bailonggon mengenai Tomundo Yoas, tongusokon kona batalengaan nalawanano Amazia tomundo Yehuda doiya lapamo tinulis doi Tomundo-tomundo Israel Nabuku Tundun lalomo.

¹⁶Yoas mate tukon tinadin doi tomundo-tomundo natinadinan doi Samaria. Konapau Yerobeam II teali tomundo mosoboliyo yana.

¹⁷Salataa Yoas tomundo doi Israel matemo, Amazia tomundo doi Yehuda, daanoon motubo 15 kotaun koidan.

¹⁸Doi Yerusalem daano kopomeenggonan mo yase akateyo Amazia. Tobikon doiya yana dampas doi Lakhis, bai konamusuh-musuh lelenggene yana indaa tukon yanila akateyomo. Kobajano inalakit doi adalan tukon binaba doi Yerusalem, maka natinadin doi batadinan tomundo-tomundo doi Daud Na Kota. Maka korayat doi Yehuda lantike Uzia, Amazia namalane teali napai tomundo. Doiya kosinggato Uzia konaumur sodo 16 kotaun. Kosalitano bailonggon mengenai Tomundo Amazia tinuliso doi Tomundo-tomundo Yehuda Nabuku Tundun lalomo.

²²Salataa lapa kotamano namatean, Uzia lambase koikoidan kokota Elat tukon yana bangunemo koidan.

²³Doi taun kosongulono lima Amazia Yoas napau nabapamarentaan doi Yehuda, Yerobeam II Yoas napau tealimo tomundo doi Israel, tukon yana maparenta doi Samaria 41 kotaun konakalumbit.

²⁴Yana baladosa doi TEMENENO, sabab yana loingiyo Yerobeam I nakulokisan molapamo kubaiyo ko Israel miano baladosa.

²⁵ Yerobeam II naiyamokai komo lambase koikoidan posaapon ko Israel tanono, luwedoi loloon mo polong doi Hamat taalikon lembet polong doi Tobun Mate doi lalom. Doiya pokokonoi tukon TEMENENO nadandi, Israel miano na Mian Bisa, lolo napeleani, doiyamo Nabi Yunus Amitai napau Gat-Hefer miano.

²⁶Ko TEMENENO kitayo bulaando konasakisaawan ko Israel miano, tukon akiyo komeeng komiankai motulungiyo yanila.

²⁷Ko TEMENENO aki namakasuutiyo moakamanase kabus ko Israel sidutu-posidutukon, tobikon doiya yana tulungiyo yanila lolo doi Yerobeam II.

²⁸Kosalitano bailonggon mengenai Yerobeam II, mengenai batalengaan doi polobosian-polobosian lalomo tukon bulaando kona lambasano koikoidan ko Damsyik tukon Hamat luwedoi Yehuda tuuk doi Israel, sasaibino lapamo tinulis doi Tomundo-tomundo Israel Nabuku Tundun lalomo.

²⁹Yerobeam II mate tukon kinibul doi bakibulan tomundo-tomundo. Konamalane Zakaria teali tomundo mosoboliyo yana.