Read Banggai 2 TOMUNDO-TOMUNDO 15 Bible Online

2 TOMUNDO-TOMUNDO 15 - Banggai bible

2 TOMUNDO-TOMUNDO 15

¹Doi taun koluakolono pitu Tomundo Yerobeam II nabapamarentaan doi Israel, Uzia Amazia napau tealimo tomundo doi Yehuda.

²Doiya kosinggato yana konaumur 16 kotaun tukon maparenta doi Yerusalem 52 kotaun kona kalumbit. Kotinano kosambuno Yekholya, boine doi Yerusalem.

³Pokakana kotamano, Uziakai lakukene kolangge-langge mo sanaanggene ko TEMENENO noano.

⁴Bai komo sineanggon yana aki namanase kotampat-tampat mososubaiyan pilogot, sampe korayat tataap mososubakon sosubakon tukon mosua kamangian idoo.

⁵Ko TEMENENO kubaiyo yana malaat sakisaa seselon kokulito mo minosikiton, tukon popolonggon yana mate donaseseloo aki natanga-tangalin. Yana inalaas doi meeng kobonua tukon binebaskanggono doi natugas-tugas. Konamalane Yotam parentayo korayat salaku nawakil.

⁶Kosalitano bailonggon mengenai Tomundo Uzia lapamo tinulis doi Tomundo-tomundo Yehuda Nabuku Tundun lalomo.

⁷ Uzia mate tukon tinadin doi batadinan tomundo-tomundo doi Daud Na Kota. Konamalane Yotam teali tomundo mosoboliyo yana.

⁸Doi taun kotolu kolonono alu Tomundo Uzia nabapamarentaan doi Yehuda, Zakaria Yerobeam II napau tealimo tomundo doi Israel tukon maparenta doi Samaria noom kobituwon konakalumbit.

⁹Yana pokakana kotomundo-tomundo mo maparenta loolukon momokubai lalim doi TEMENENO. Yana loingiyo Tomundo Yerobeam I, molapamo kubaiyo ko Israel miano baladosa.

¹⁰Salem Yabes napau pomeenggon molawane Tomundo Zakaria, tukon akateyo yana doi Yibleam, maka yana teali tomundo mosoboliyo yana.

¹¹ Tukon bunodoiya tealimokai oila komo lapamo TEMENENO dandikene doi Tomundo Yehu baikon konapau tumbu polong katulunan kosanggapo naikon teali tomundo doi Israel. Kosalitano bailonggon mengenai Tomundo Zakaria, tinuliso doi Tomundo-tomundo Israel Nabuku Tundun lalomo.

¹³Doi taun kotolu kolonono siyo Tomundo Uzia nabapamarentaan doi Yehuda, Salum Yabes napau tealimo tomundo doi Israel. Yana maparenta doi Samaria tongo meeng kobituwon

¹⁴sabab Menahem Gadi napau yana ampakon luwedoi Tirza taus doi Samaria, maka yana akateyo Salum, tukon yana tealimo tomundo mosoboliyo yana.

¹⁵Doi naambakonan lalomo luwedoi Tirza, Menahem manase kabus kokota Tifsah tukon daerah-daerah napoloolanikonan tukon akateyo kabus sasaibino kotumbuno. Salataa dokotadoo aki naiyase mokala doi yana, maka yana batayo koboiboine motianan tiano doi kotadoo. Kosalitano bailonggon mengenai Tomundo Salum, tongusokon konapomeenggon, tinuliso doi Tomundo-tomundo Israel Nabuku Tundun lalomo.

¹⁷Doi taun kotolu kolonono siyo Tomundo Uzia nabapamarentaan doi Yehuda, Menahem Gadi napau tealimo tomundo doi Israel, tukon yana maparenta doi Samaria 10 kotaun konakalumbit.

¹⁸Doi tempo natuboan yana baladosa doi TEMENENO sabab yana loingiyo Tomundo Yerobeam I, mo kubaiyo ko Israel miano baladosa.

¹⁹Pul tomundo Asyur lobosiyo ko Israel, Menahem beena doi yana 34.000 kokilogram koperak sulano yana natomboniiyo moekeenggele Menahem nakakuasaan doi Israel.

²⁰Menahem nakokubai molaate dodoydoo doiyamo yana pakisaayo komian-mian mokaasa doi Israel sulano napo matambakon lima kolono kodoy perak sasamba komian. Tobikon doiya Pul otinggale dotomundodoo tukon yana mule doi nalipu susuungo.

²¹Kosalitano bailonggon mengenai Tomundo Menahem tinulis doi Tomundo-tomundo Israel Nabuku Tundun lalomo.

²²Yana mate tukon tinadin, maka konapau Pekahya teali tomundo soboliyo yana.

²³Doi taun kolima kolonono tomundo Uzia nabapamarentaan doi Yehuda, Pekahya Menahem napau tealimo tomundo doi Israel tukon yana maparenta doi Samaria lua kotaun konakalumbit.

²⁴Yana baladosa doi TEMENENO sabab yana loingiyo Tomundo Yerobeam I nakulokisan, mokubaiyo ko Israel miano baladosa.

²⁵Daano komeeng komian moluwedoi sasaibino kona suludadu kapalano, doiyamo Pekah Remalya napau, pomeenggon tukon 50 komian moluwedoi Gilead. Maka doi meeng kobenteng lalomo doi tomundo nakamali doi Samaria yanila akateyo Pekahyo idoo tukon lua komian bailon mo sinombuikon Argob tukon Arye. Doibundu Pekah tealimo tomundo mosoboliyo Pekahya.

²⁶Kosalitano bailonggon mengenai Tomundo Pekahya tinuliso doi Tomundo-tomundo Israel Nabuku Tundun lalomo.

²⁷Doi taun kolima kolonono lua Tomundo Uzia nabapamarentaan doi Yehuda, Pekah Remalya napau tealimo tomundo doi Israel. Yana maparenta doi Samaria 20 kotaun konakalumbit.

²⁸Yana baladosa doi TEMENENO sabab yana loingiyo Yerobeam I nakulokisan mokubaiyo ko Israel miano baladosa.

²⁹Doi tempo Pekah nabapamarentaan, Tiglat-Pileser tomundo Asyur lambase kokota Iyon, Abel-Bet-Maakha, Yanoah, Kedes, Hasor, Gilead lipuno, Gilead tukon Naftali. Yana akute koidan kotumbuno salaku mian motinaan doi Asyur.

³⁰Doi taun kolua kolonono Tomundo Yotam Uzia napau nabapamarentaan doi Yehuda, Hosea Ela napau pomeenggon Yotam molawane Tomundo Pekah tukon yanila akateyo yana, maka Yotam teali tomundo mosoboliyo Pekah.

³¹Kosalitano bailonggon mengenai Tomundo Pekah lapamo tinulis doi Tomundo-tomundo Israel Nabuku Tundun lalomo.

³²Doi taun koluano Tomundo Pekah Remalya napau nabapamarentaan doi Israel, Yotam Uzia napau tealimo tomundo doi Yehuda.

³³Doiya kosinggato yana konaumur 25 kotaun tukon yana maparenta doi Yerusalem 16 kotaun konakalumbit. Kotinano doiyamo Yerusa Zadok napau.

³⁴Yotam lakukene kolangge-langge mosanaanggene ko TEMENENO noano, pokakana kotamano Uzia.

³⁵Bai komo sineanggon kotampat-tampat mososubaiyan pilogot aki namase sampe korayat banggadudul momeenggon momososubakon sosubakon tukon mosua kamangian idoo. Yotamkai komo bangune ko Tataapon Babasal Tambikon doi lembet doi TEMENENO Na Bonua.

³⁶Doi tempo Yotam nabapamarentaan, ko TEMENENO tambuuno mokapatuwo Rezin tomundo doi Siria tukon Pekah tomundo Israel sulano napo lobosiyo ko Yehuda. Kosalitano bailonggon mengenai Tomundo Yotam tinuliso doi Tomundo-tomundo Yehuda Nabuku Tundun lalomo.

³⁸Yana mate tukon tinadin doi batadinan tomundo-tomundo doi Daud Na Kota. Konapau Ahas komo teali tomundo mosoboliyo yana.