Read Banggai 2 TOMUNDO-TOMUNDO 16 Bible Online

2 TOMUNDO-TOMUNDO 16 - Banggai bible

2 TOMUNDO-TOMUNDO 16

¹Doi taun kosongulono pitu Tomundo Pekah Remalya napau nabapamarentaan doi Israel, Ahas Yotam napau tealimo tomundo doi Yehuda.

²Doiya kosinggato kona umur sodo 20 kotaun tukon yana maparenta doi Yerusalem 16 kotaun konakalumbit. Yana aki namoloingi kalakuan monondok luwedoi Tomundo Daud, doiyamo konapo tauwa, bai yana lakukanggene komo aki nasanaanggene ko TEMENENO noano, na Mian Bisa.

³ Yana tubo buno tomundo-tomundo Israel, tukon koidan yana sosubakene konamalane susuungo salaku sosubakon doi pilogot, loingiyo kokabiasaan mo lokis doi mian-mian molapamo TEMENENO siikayo moluwedoi lipu Kanaan salataa ko Israel miano usokiyo dolipudoo.

⁴Ahas mososubakon sosubakon tukon kamangian doi tampat-tampat mososubaiyan pilogot doi bunggul-bunggul doi kayung-kayung mo masalimbumbung suukano.

⁵ Doi lounudoo tomundo Edom kuasaiyo koidan kokota Elat tukon yana siikayo ko Yehuda paimiano mo dungol idoo. Ko Edom miano doibundu yanila lubat tukon tataapo doi kotadoo polong doi oloyo nia. Doi lounudoo koidan Rezim tomundo doi Siria tukon Pekah Tomundo Israel yanila lubat tukon lobosiyo ko Yerusalem, bai aki namoola yanila lungguiyo Ahas.

⁷Ahas makapatu bito-bito doi Tiglat-Pileser tomundo Asyur tukon nateteba nia, “Yaku muata mo setia; tobikon doiya, yaku kabiyo, siokai mulubat tukon musalamatene yaku luwedoi tomundo Siria tukon tomundo Israel mo daanoon molobosikon.”

⁸Ahas mangala mosoni tukon perak mo luwedoi TEMENENO Na Bonua, tukon buat doi tomundo nakamali, maka yana kapatuwo salaku tambo doi tomundo Asyuroo.

⁹Tomundo Tiglat-Pileser yana talimayo Ahas nakakabi, maka yana lobosiyo tukon lambase ko Damsyik. Kotumbuno yana akute salaku mian-mian motinaan doi Kir, tukon kotomundono, doiyamo Tomundo Rezin, yanila akateyo koidan.

¹⁰Salataa Tomundo Ahas ampakon doi Damsyik sulano napososuung tukon Tomundo Tiglat-Pileser, yana kitayo kobalabaan doi kotadoo. Maka yana makapatu doi Imam Uria doi Yerusalem kosontono dobalabaanoo tukon koukulano motapaat tukon tontong konatinulisan.

¹¹Maka Uria kekendenge komeeng kabalabaan pokakanamo tukon sonto tukon doukulan yana motalimayomo, tukon yana alapayomo akiyoon Ahas naabali.

¹²Salataa yana polong doi Damsyik, Ahas kitayo baikon dabalabaanoo lapamo lapa.

¹³Maka doi balabaanoo bungkono yana mososubakono sosubakon iyayon tukon sosubakon gandum. Yana koidan mokundang sosubakon anggur tukon sau moluwe doi sosubakon podamean doi balabaanoo bungkono.

¹⁴ Ahas kitayo baikon kabalabaan moluwe doi tambaga mo inalaasanggon tuuk doi TEMENENO tangabos doi antara TEMENENO Na Bonua tukon dobalabaanoo mo boolu. Tobikon doiya dobalabaan tambagadoo yana biyelemo moluwe doi TEMENENO Na Bonua salaano taalikon doi lembet doi nabalabaan mo booludoo.

¹⁵Sambuno lapa doiya yana bantile doi Uria, “Pakeyomokai nakubalabaan nia mo babasal tuuk mosuwaan sosubakon dowa-dowa tukon sosubakon popook doiyamo sosubakon mosinosubakon luwedoi tomundo tukon rayat, tukon kundangemokai idoo kososubakon anggur moluwe doi rayat. Kundongiiyo koidan dobalabanoo bungkono sasaibino koiyayon sauno mo sinosubakon. Tukon dobalabaanoo tambaga momalumbito batadikenemokai yaku komo pakeyo sulano kumangkabi potudoikon moluwedoi doi Roh-roh.”

¹⁶Uria laksanakanggene kotomundo naparenta.

¹⁷ Doibundu Ahas manase koloda-loda tambaga mo pinake doi TEMENENO Na Bonua tukon yana ndikuke kogumbang-gumbang moluwe doi loda-lodadoo bangabosan paisu moluwe doi tambaga mobabasal mo daano doi bungguto kosapi songulolua moluwe doi tambagadoo yana alayomo koidan tukon abesene doisoaan bungkono moluwe doi batu.

¹⁸Maka konamangalaan noa doi tomundo Asyur noano, Ahas manase kotomundo natampat doi rayat salaano doi TEMENENO Na Bonua, tukon tutupe kotataapon usokan moinalaasanggon tuuk doi tomundo.

¹⁹Kosalitano bailonggon mengenai Tomundo Ahas tinuliso doi Tomundo-tomundo Yehuda Nabuku Tundun lalomo.

²⁰ Ahas mate tukon tinadin doi batadinan Tomundo-tomundo doi Daud Na Kota. Konapau Hizkia komo teali tomundo mosoboliyo yana.