Read Banggai 2 TOMUNDO-TOMUNDO 17 Bible Online

2 TOMUNDO-TOMUNDO 17 - Banggai bible

2 TOMUNDO-TOMUNDO 17

¹Doi taun kosongulono lua Tomundo Ahas nabapamarentaan doi Yehuda, Hosea Ela napau tealimo Tomundo doi Israel, tukon yana maparenta doi Samaria siyo kotaun konakalumbit.

²Yana baladosa doi TEMENENO, bai kona dosa aki napokakana konakadaang tomundo-tomundo Israel nadosa momaparenta looluk.

³Yana Salmaneser tomundo Asyur lobosiyo tukon lungguiyo, sampe sasamba kotaun yana sio nababeal lulu doi Tomundo Salmanaser.

⁴Bai doi meeng kotempo, Hosea makapatu bito-bito doi So tomundo Mesir sulano namangkabi bantuan. Sambuno lapa doiya Hosea tademo momebeal lulu sasamba kotaun doi tomundo Asyur. Sambuno Salmanaser toiyo tentang Hosea nakakubaidoo, yana lakoyo Hosea tukon yana usekenemo doi talunggulalomo.

⁵Doibundu Salmaneser tomundo Asyur lubatiiyo ko Israel tukon lobosio ko Samaria. Doi taun kotoluno luwedoi molobosiano,

⁶— mo pokakana taun kosiyono Hosea nabapamarentaan — Salmanaser lambasemo ko Samaria. Maka ko Israel miano inakuto salaku mian-mian motinaan doi Asyur. Kosoabos luwedoi yanila inaboso doi kota Halah, kosoobos doi naloolanian ko Habor Paisunobatango doi Gozan lipuno, tukon kosoobos koidan doi kota-kota tano Madai.

⁷Ko Samaria tuwong sabab ko Israel miano baladosa doi TEMENENO, yanila na Mian Bisa, mo lapamo salamatene yanila luwedoi tomundo Mesir, tukon babayomo yanila tobuat luwedoi tanodoo. Yanila sosubaiyo ko temeneno bailon

⁸tukon loingiyo kokabiasaan kobangsa-bangsa mo lapamo TEMENENO siikayo nakabiasaan doi tempo kobangsa Israel naampakonan molobosiyo dabangsa-bangsadoo. Bangsa Israel tulutiyo koadat istiadat tomundo-tomundo Israel molapamo tataapene.

⁹Tukon yanila lakukanggene mo aki TEMENENO napataikene, napo Mian Bisa. Yanila mongokkondong tampat-tampat mososubaiyan pilogot doi sasaibino konapo kota, mau doi kota poipoisik maukai doi kota babasal.

¹⁰ Doi sasamba kobunggul bungkono, tukon sasamba kokayung momasalimbung suukano, yanila mongokkondong lambea-lambea tukon Pilogot Boine Asyera timba-timbalango.

¹¹Yanila koidan mosua kamangian doi sasaibino kobalabaan tuuk doi pilogot, pokakana kobangsa-bangsa molapamo TEMENENO siikayo nakabiasaan moluwe doi lipu Kanaan. Yanila sosubaiyo kopilogot, maukai ko TEMENENO nalapamo patanggene. Sasaibino konapai kokubai mo lokis olubatene ko TEMENENO nanggimalan.

¹²

¹³Ko TEMENENO makapatu bito-bito tukon nanabi-nabi doi Israel miano tukon Yehuda sulano yanila napelenggene napoingotii nia: “Potademokai momokubai lokis tukon taatiyomokai sasaibino koparenta tukon ukum mo lapamo Yaku beekene doi tumbumuyu tukon doi komuyu lolo doi sasaibino konabi Daku peleleani-peleleanidoo.”

¹⁴Bai ko Israel miano tukon Yehuda miano aki naiyase molongol. Yanila matikas konoano pokakana kotumbunoila moaki namaangga doi TEMENENO, napo Mian Bisa.

¹⁵Ko Israel miano tukon Yehuda miano aki naiyase motaatiyo ko TEMENENO naparenta-parenta tukon aki nasetia doi perjanjian mo lapamo Yana kubaiyo tukon tumbunoila. Yanila aki napopusinggon ko TEMENENO napanga-panganuukon, bai yanila tongo sosuba doi pilogot-pilogot moakiyo kogunano, sampe yanilakai akiyono kotakoso. Yanila tongo loingiyo kobangsa-bangsa nakokubai doi potikunggon yanila, maukai ko TEMENENO nalapamo pantanggene.

¹⁶ Yanila lumbaiyo sasaibino ko TEMENENO naukum, napo Mian Bisa, tukon yanila mokubai lua kosapi moluwedoi tambaga sulano nasinosubai. Yanila kubaiyo kopilogot boine Asyera timbalango, sosubaiyo koiyayon-iyayon tukon sosubaiyo ko Pilogot Baal.

¹⁷ Yanila sosubakene konapo pau-pau salaku sosubakon mosinua doi pilogot. Yanila mapake motoiyan minasaindinggon tukon yanila mangkabi otunggul moluwedoi tolosupa-tolosupa mo moola potoikon tukon roh-roh molokis. Yanila yase tuuno molakukene kolangge-langge moaki nasanaanggene ko TEMENENO noano.

¹⁸Sampe ko TEMENENO nggimal tuuno doi yanila tukon ko TEMENENO akimo koidan napalaatikanggene yanila. Ko TEMENENO sakukenemo yanila luwedoi buta molapamo bineekon doi yanila, komo totinggal tongokai Yehuda nabatomundoan.

¹⁹Ko Yehuda mian-miano aki nataatiyo ko TEMENENO naukum-ukum, napo Mian Bisa. Yanila tongo loingiyo ko Israel miano nakabiasaan,

²⁰tobikon doiya ko TEMENENO akimo koidan naakuiyo sasaibino ko Israel miano. Yana ukume tukon salakanggene yanila doi napo musu-musu mo lokis. Ko TEMENENO akimo koidan napalatikanggene yanila, bai tongo aisene yanila luwedoi buta mo lapamo bineekondoi yanila.

²¹Salataa ko TEMENENO poalaasene ko Israel luwedoi Yehuda, ko Israel miano oduduke Yerobeam Nebat napau teali napai tomundo. Maka Yerobeam kubaiyo yanila otinggale ko TEMENENO tukon yanila kubaiyomo kolalim-lalim mo babasal.

²²Yanila loingiyo Yerobeam nakokubai tukon yanila tataap molakukanggene sasaibino kodosa Yerobeam mokubaiyo,

²³sampe konapupusan ko TEMENENO akimo napalaatikanggene yanila, bai tongo sakukene yanila luwedoi buta molapamo bineekon doi yanila. Doiya teali pokokonoi tukon TEMENENO napoingotiikon molapamo bineekon doi yanila lolodoi napeleleani, sasaibino konabi. Bunomokai doiya ko Israel miano nabinabaan doi bangaisonan doi Asyur, tukon idoomokai konapai dungolan polong doi oloyo nia.

²⁴Salaku posobolino ko Israel miano molapamo inakut doi bangaisonanoo, tomundo Asyur odungele yanila doi kota-kota Samaria, mian-mian moluwedoi Babel, Kuta, Awa, Hamat, tukon Sefarwaim. Domian-mianoo yanila dungoliyomo kokota-kota tukon tataapo idoo.

²⁵Doi tempo napai dungolan tumbe-tumbeno idoo yanila aki naodotiiyo ko TEMENENO; doiyamo kosababpo sampe ko TEMENENO olubatene kosinga-singa mo sokuwo kosoobos luwedoi yaniladoo.

²⁶Maka komian popitoikene doi tomundo Asyur baikon komian-mian yana moabesemo doi kota-kota doi Samaria yanila aki natoiyo dolipudoo pilogoto naukum-ukum. Doiyamo kosababpo dopilogotoo olubatene kosinga sulano yanila nasokuwo yanila.

²⁷Tobikon doiya tomundo Asyur yana maparentakene sulano meeng koimam moluwedoi antara sasaibino komian mo tinaanoo molapamo sinakukon doi Asyur, nakinapatu koidan doi Samaria. “Bintekene namule tukon nadungol idoo sulano yana namoola otunggule domian-mianoo tentang lipudoo pilogoto naukum-ukum,” tomundo nabantilano.

²⁸Maka meeng koimam Israel, mo lapamo binaba luwedoi Samaria inantokon doi Asyur, yana mule tukon dungol doi Babel. Indaa yana mongotunggul rayat bulaando konatutuuwan kososubaiyano ko TEMENENO.

²⁹Bai komian-mian mo dungol doi Samariadoo yanila tataap kubaiyo konapai uuno-uuno tukon yanila abese doi talapu-talapu nabonua bapulian lalomo Israel miano mo dungol doi kotadoo looluk mokekendenge. Sasamba kogolongan kubaiyo kona uuno susuungo doi kota yanila mo dungoliyo.

³⁰Ko Babel miano kubaiyo ko Pilogot Sukot-Benot timbalango, ko Kuta miano kubaiyo ko Nergal timbalango, ko Hamat miano kubaiyo ko Asima timbalango,

³¹ko Awa miano kubaiyo ko Nibhas tukon Tartak timbalango, tukon Sefarwaim miano yanila sosubakene konapai pau-pau salaku sosubakon mosinua doi Pilogot Adramelekh tukon Anamelekh.

³²Sangalaasan kososubaiyano dopilogot-pilogotoo, yanila koidan sosubaiyo ko TEMENENO. Yanila molilik antara yanila bubula komian tuuk mobatugas salaku imam tukon tuuk mososubakon doi bonua-bonua puli.

³³Jadi, yanila sosuba doi TEMENENO, bai koidan yanila sosuba doi pilogot-pilogot, pokokonoi tukon konapo adat istiadat doi napo lipu sinuungan.

³⁴ Polong doi oloyo nia yanila daanoon moambakonggene konapo adat istiadat. Yanila aki nabakaleda doi TEMENENO, tukon koidan aki napo taatiyo koukum-ukum tukon TEMENENO Naparenta-parenta molapamo yana beekene doi Yakub nakatulunan, mo sinombuikon koidan Israel.

³⁵ Ko TEMENENO lapamo mokubai perjanjian pokakana naiya tukon Israel miano, “Inai bakaleda doi ilah-ilah bailon; inai mosomba mososubaiyo kai leleaniyo yanila, kai mososubakon sosubakon-sosubakon doi yanila.

³⁶ Odotii Yakukai, TEMENENO, mo lapamo babayo komuyu tobuat luwedoi Mesir tukon kuasa mo babasal; somba doi Yaku tukon mososubakon sosubakon doi Yaku.

³⁷Taatiyokai sidutu koukum-ukum tukon parenta-parenta mo lapamo Kutulise tuuk doi komuyu. Inai mobakaleda doi ilah-ilah bailon,

³⁸tukon inai motoliminggene koperjanjian antara Yaku tukon komuyu.

³⁹Taatiyo Yaku, TEMENENO mu Mian Bisa, maka Yaku naikon sodiiyo komuyu luwedoi mumusuh-musuh.”

⁴⁰Bai do Samariadoo tumbuno aki naiyase molongol; yanila tataap bataani doi napo adat istiadat.

⁴¹Jadi, yanila sosubaiyo ko TEMENENO, bai koidan yanila sosubaiyo kopilogot. Polong doi oloyo nia konapai katulunan daanoon molakukanggene dolanggedoo.