Read Banggai 2 TOMUNDO-TOMUNDO 18 Bible Online

2 TOMUNDO-TOMUNDO 18 - Banggai bible

2 TOMUNDO-TOMUNDO 18

¹Doi taun kotoluno Tomundo Hosea Ela napau nabapamarentaan doi Israel, Hizkia Ahas napau tealimo tomundo doi Yehuda.

²Doi tempodoo yana konaumur 25 kotaun tukon yana maparenta doi Yerusalem 29 kotaun konakalumbit. Kotinano kosambuno Abia Zakharia napau.

³Hizkia sidutu lakukene kolangge-langge mo sanaanggene ko TEMENENO noano pokakana Tomundo Daud tumbunoila.

⁴ Yana manase kotampat-tampat mososubaiyan pilogot, tukon lomboyo kona lambe-lambea tukon manase ko Pilogot Boine Asyera timba-timbalango. Yana koidan manase kombinda moluwedoi tambaga Musa mokubaiyo mo binantil Nehustan. Sabab, polong doi tempodoo ko Israel miano daanoon momosua kamangian tuuk odotiiyano dobinda tambagadoo.

⁵Doi antara sasaibino kotomundo Yehuda, mau komo akiyoon maukai komo lapamo Hizkia nabatomundoan, akiyo komo pokakana yana. Yana maangga doi TEMENENO, Israel na Mian Bisa, tukon setia doi yana.

⁶Aki nabiasa yana momalawan doi TEMENENO. Sasaibino ko TEMENENO naparenta mo bineekon doi yanila lolo doi Musa, Hizkia taatiyo tukon tutuu.

⁷Doiyamo kosababpo ko TEMENENO tataap tulungiyo yana sampe yana malaat hasil doi sasaibino kona usaha lalomo. Yana aki natulutiyo kotomundo Asyur, tukon aki naiyase taaluuk doi yana.

⁸Yana lungguiyo ko Filistin miano, tukon lambase konapai tampat dungolan, luwedoi desa mopoipoisik tuuno polong doi kota mo paling babasal, tongusokon ko Gaza tukon kolipu doi napotikunggonan.

⁹Doi taun kosanggapo Hizkia nabapamarentaan, doiyamo taun kopituno Tomundo Hosea nabapamarentaan doi Israel, Salmanaser tomundo doi Asyur yana lubotiiyo tukon lobosiyo ko Samaria.

¹⁰Salataa tolu kotaun konakalumbit konalinobosian, ko Samaria linungguimo. Doiya konatealian doi taun konoomo Hizkia nabapamarentaan, tukon taun kosiyono Hosea nabapamarentaan.

¹¹Doibundu tomundo Asyur akute ko Israel miano salaku mian motinaan doi Asyur, kosoobos luwedoi yanila tinampatkanggon doi kota Halah, kosoobos loolani ko Habor Paisunobatango doi Gasan lipuno, tukon kosoobos koidan doi kota-kota doi tano Madai.

¹²Ko Samaria linunggui sabab ko Israel miano aki nataat doi TEMENENO, napo Mian Bisa. Yanila akiyenggenemo koperjanjian TEMENENO mo lapamo kubaiyo tukon yanila, tukon yanila lumbaiyo sasaibino Musa naparenta, donapeleleanidoo. Yanila aki naiyase molongol tukon aki naiyase motulutiyo.

¹³Doi taun kosongulono sangkap Hizkia tomundo Yehuda nabapamarentaan, kokota-kota Yehuda modaano konabenteng Sanherib tomundo Asyur lobosiyo tukon lungguiyo.

¹⁴Maka doi Sanherib mo daano doi Lalkhis, Hizkia kapatuwo nabilita nia, “Yaku salamo. Tobikon doiya yaku kabiyo sulano Tuan nasanaang moatadeyo kopolobosian motuuk doikami. Sasaibino Tuan natuntutan naikon yaku daanekene.” Sanherib timbiliyo baikon Hizkia namakapatu doi yana 10.000 kokilogram kosuasa, tukon mosoni 1.000 kokilogram.

¹⁵Tobikon doiya, sasaibino kosuasa modaano doi TEMENENO na Bonua lalomo tukon kas doi kamali lalomo doiya Hizkia kapatuwo doi Sanherib.

¹⁶Komosoni doi TEMENENO Na Bonua tataapon-tataapono tukon komo lapamo Hizkia konoikene susuungo doi tataapon mbamba-mbambano, yana alayo tukon kapatuwo koidan doi Sanherib.

¹⁷Bai dotomundo Asyuroo makapatu luwedoi Lakhis komeeng kopasukan babasal sulano nalobosiyo ko Yerusalem. Dopasukanoo tolu suludadu kapalano komo katuaiyo doiyamo meeng kotalenga, meeng kopongulus lobo mo ininum, tukon meeng kosuludadu kapalano pololaingo kotomundo. Salataa yanila polong kotadoo yanila mangala tampat doi kombung, mo binantil Kombung Penatu loolani komeeng kogoot mo molombakon paisu luwedoi dolaak taambikon babo.

¹⁸Maka yanila nggeleamon uange Tomundo Hizkia. Sambuno bunodoiya tobuato Hizkia napagawe tolu komian pososuunggene yanila. Dopagawedoo motolu doiyamo Elyakim Hizkia napau mokapalaiyo kobatomundoan doi kamali, Sebna dulutulis negara, tukon Yoah Asaf napau dulutulis doi tomundo nakamali.

¹⁹Daano komeeng kosuludadu kapalano Asyuroo yana bantile, “Pelenggenemokai doi Hizkia kotomundo Asyur nabantilan nia: ‘Bulaando ikoo moanggene kobutomu bukuan?

²⁰Ikoo anggene tongo bantilan tolong moola nasoboboliyo kosuludadu nasiasat tukon nabukuanan? Indeekai komu binalaanggon, sampe ikoo barani molawane ko Asyur?

²¹Ikoo takainomo moinikene ko Mesir nabantuan, bai doiya buno pokakana komian momapake padang batango sulano nateali natongkat; bai dotongkatoo moloto sabab aki namatikas tukon tataduk kolimamu. Bunomokai doiya kotomundo Mesir nainandekonan doi sasaibino komian mo moini doi yana.’ ”

²²Koikoidan do Asyuroo nasuludadu kapalano yana bantile, “Kai uga-ugaate komuyu bantile baikon komuyu moini doi TEMENENO, mu Mian Bisa? Doi tempo Tomundo Hizkia namaparentakanano ko Yehuda miano tukon ko Yerusalem miano yanila tongo bakaleda doi balabaan salaano doi Yerusalem, bolikonkai donaminanasoo balabaan tukon tampat-tampat sosubaan doi TEMENENO susuungo?

²³Budodoiya luwe tomundo Asyur sambuno yaku barani potaani baikon komuyu binee 2.000 koadalan, pasti komuyu aki naikon pomotooli mian mopokakana doiya sulano popipiike yanila!

²⁴Tuuk doi potumbokiiyano komai suludadu kapalano mopependek kona pangkat, komuyu bolikon posukatan. Maukai pomoinikene koidan ko Mesir namakapatu bantuan loda polobosian tukon pasukan mo mapake adalan!

²⁵Komuyu anggene kami molobosi tukon lungguiyo kopo tano akiyo ko TEMENENO nabantuan? TEMENENO susuungokai komo sumboliiyo kami molobosi tukon naakamanase!”

²⁶Maka Elyakin bantile, doi Sebna tukon Yoah doi suludadu kapalanodoo, “Tuan, basilinganokai tukon silingan Aram doi kami, sulano mai mangalati. Inai momapake silingan Ibrani, sabab doiya korayat modaano doi kota pagaro mobinetoon yanila mangalatikene doiya.”

²⁷Dosuludadudoo kapalano timbane, “Tongokai doi komuyu tukon potomundo tolong sampe kotomundo Asyur utuse yaku sulano kupelenggene sasaibino nia? Aki! Yaku koidan basilingan doi rayat mo osulang doi pagar mobineetoonoo, mopolaing tukon komuyu yanila naikon kaane konatai susuungo tukon yanila susuungo naikon inume konasosiit.”

²⁸Doibundu dosuludadudoo kapalano kokondong tukon nggeleamon doi silingan Ibrani lalomo tukon bantile, “Polengele oila kotomundo Asyur nabinatil:

²⁹‘Inai Inai poiyase kalu Hizkia tipuwo komuyu; yana doo aki namoola salamatene komuyu.

³⁰Inai pondongoliiyo konabidukan sulano pomoini doi TEMENENO. Inai poaanggene ko TEMENENO naikon salamatene komuyu kai pantane kosuludadu Asyur molungguiyo kopokota.

³¹Inai pondongoliiyo Hizkia. Yaku, tomundo Asyur maparentakene sulano potobuat luwedoi kota tukon pomangaku kalah. Sulano pomoola makaan anggur saano moluwedoi muasi susuumu, tukon koara saono moluwedoi mukayung susuumu, tukon komuyu monginum paisu moluwedoi mububung susuumu,

³²sulano kubiyolomiyu doi meeng kotano mo adukon buno potano. Indaa daano koanggur asino mo hasilkanggene koanggur doi komuyu, gandum asino mo hasilkanggene kotarigu mo teali pokinaan. Doi tanodoo daano badaang kokayung zaitun, zaitun lisisono tukon dokot. Kalu komuyu tulutiyo oilamo daku pinalentakon doi komuyu, komuyu naikon tubo, komuyu aki pomate. Inai pondongoliiyo Hizkia! Yana tongo tipuwo tukon bantile baikon ko TEMENENO naikon salamatene komuyu.

³³Kai biasa kobangsa bailon napilogot moola salamatene kotano luwedoi kukakuasaan?

³⁴Inaandokai kotano Hamat tukon Arpat napilogot-pilogot? Inaandokai ko Sefarwaim, Hena, tukon Iwa napilogot-pilogot? Kai daano komo lubat mosalamatene ko Samaria?

³⁵Oilakai kopilogoto komo biasa olupute kotano luwedoi kukakuasaan? Aki namungkin ko TEMENENO mosalamatene ko Yerusalem?’ ”

³⁶Salataa yanila ndongoliiyo doiya, ko Yerusalem tumbuno yanila aki napo motimbili, sabab Tomundo Hizkia lapamo maparentakene sulano yanila tongo batingaakon tolong.

³⁷Maka Elyakim, Sebna, tukon Yoah yanila siake konapo pakean salaku paloosan susaan, doibundu yanila ampakon molapule doi tomundo oila komo lapamo dosuludadu kapalano doi Asyuroo bantile.